Eremyas 45 - Fanawbuid tagsibaliwas Fakayabian

Sik Foyungan laman sas Baruk

¹ Gina sis faufatk banwa Yuyakim, fun Usyas at baguama, nu gfunan sis Uda, Baruk nariruk Eremyas fag taglong at ngay nalong sa anya.

² Eremyas nalong te, “Baruk, katatuy Yawi, Israel at Dius, at longan sa emu:

³ ‘Nalong o te, sik mafanyuan way o lang, aroro Yawi nafamut am fagidapun. Kalufuy wo gfandeng ay wo e buknga ya gfiangalay.’

⁴ “Baruk, katatuy yangay Yawi at longan, ‘Nanrasras kban tuy fag talun ku nawat. Nanggulad kban ku natanum. Ay namakamulun kban takatatuy sas fagdaul talun.

⁵ Lag o grvbvy ya nusnge wain fag ramraman at mafanud. Aroro gfadasug kban faurianan sas fagayu taw, dewa katanya, gfalangfe ktua ban emu nusnga nday ban nu glao o. Au, Yawi, taglong tuy.’ ”