Eremyas 44 - Fanawbuid tagsibaliwas Fakayabian

Yawi at ngay Longan sa sangay Taw Israel Tagbanwan sis Talun Igiptu

¹ Yawi nalong sas Eremyas sabaliwa ngay taw Udyu tagbanwan sis fawalan fag alvngvdan talun Igiptu: si sangay furuan Migdul, Takpanes ay Memfis, ay anggan yangay tagbanwan sis fasiunan fag alvngvdan talun Igiptu.

² Katatuy Yawi, Israel at Dius, at longan: “Nalag wam ku nafadasug fag faurianan sas furuan Erusalem ay sa sangay taw Uda. Ay katsi kanya fag furuan anrasras wan ay we gbanwan ya sanya,

³ aroro sa sangay taw tagbanwan sanya at ngay asalanan. Kanya fagayu nafadotama angku siginan nu girug at ngay famaebebanglu ay nu gseg tibak fagsegan at fagyudun toglag ay anggan at ngay mangaguyang at fagyudun toglag.

⁴ Malayun oma nu gsugu au ku ngay fagsuguan fag ngay taglong laman namararang sa anya fagayu te, lag gfakamulun fagayu at mauri tagfadotama angku.

⁵ Dewa katanya, kanya fagayu wa kaylat gdungugan ku ngay taglong. Ay kanya fagayu wa naubun at ngay fagmauriun ay wa nafaragang nu girug famaebebanglu laman sa tibak fagsegan.

⁶ Nu katanya, nafadasug au sa anya fagayu at maksvn ku fandotaman. Nu kadotama au anya fagayu kata afuy nu girug at ngay furuan tagsis Uda ay Erusalem, ay dasug katsi kanya fag ngay furuan mabaluanan way lang ay marasrasan.

⁷ “Au Yawi at Mabalyanan, Israel at Dius, ginto au te, wain ay fagnafauriun ay ngay sadili? O nunda kaylat wam ngay taw Uda nu kamin, ngay mangama, ngay mangena, ngay baguama ay anggan at bagu kasalug fag ngay sisian?

⁸ Wain ay fakauriun angku siginan nu kawat am tibak fagsegan? Ay girug am ngay famaebebanglu laman sa kafag ngay fagsegan sanya sis talun Igiptu nu inda nu gbanwan am. Ay nafauri am ay ngay sadili ay nafa sik ngay masuya ay nafae fakaplaun am ayu sa sangay talun sas fagdaul daga.

⁹ O nunda yam nalyam ay ngay mangaguyang, ay ngay fun, ay at ngay mangena at nafakamulun fag ngay mauri sis talun Uda ay sis Erusalem.

¹⁰ Dasug katsi, yam kamababaun ay yam kalimu angku. Ay wam gfaning ku ngay suguan ay ku ngay faugali ku nafon sa ayu ay sa ay ngay mangaguyang.

¹¹ “Nu katanya, au Yawi at Mabalyanan, Israel at Dius, mafalganan kwan namaurianan ay namamin fagdaul talun Uda.

¹² Am at kinsawad tagleleg sis talun Uda at nafabulunan glao sties talun Igiptu, umbul ban am, fagayu am at yud e kwa ay anggan takadungug. Kabul ban am sis awayan ay sis fanlunus. Ay e gfauri ban ay e gfalingun ayu.

¹³ Gfaurianan au ayu siginans fanlunus ay fakasaitun ay awayan, kaduge am gbanwan sis Igiptu, kata nu nafaurianan au Erusalem.

¹⁴ Fagayu ban am at kinsawad fag ngay taw Uda at nanamanwan sas talun Igiptu kabul waban am. Wa ban am malagyu ya sas Uda dewa am kaylat yay kafoli ay namanwan sanya. Wa ban am mauli ya nu bunway nusnga sinu way lang ban at nalagyu.”

¹⁵ Ngayuk taw Udyu at maful ay tagdungugan Eremyas. Kanya fagayu tagbanwan sas fawalan ay sas fasiunan fag alvngvdan sis talun Igiptu. Sanya fag ngay mangama at nasaful te, at ngay mangena girug ngay famaebebanglu laman sat ngay fagsegan, ay fagayu mangena at maful nalong sas Eremyas te,

¹⁶ “Wami gafanud am ngay nalong sa emi sas Yawi at ngayan!

¹⁷ Gfakamulun ami nusnge wain em fakaylatun. Nangirug ami ngay famaebebanglu sa em fagsegan at nafangayan te, Tagsis Banwa fag Mangena fag Fagsegan! Ay namon ami sa anya fanginum fag ngay fanggalangun kata em nafakamulun si sangay furuan tagsis Uda ay sis Erusalem at ngay fagaweanan, kata em ngay mangaguyang, ay em ngay fun, ay em ngay tagfangguna at nafakamulun. Ebi manabayan tua nu gbanwan ami: ngayu tua em fakonun, ay di e kadasug sa emi at mauri.

¹⁸ Dewa katanya, gina ami nafaragang girug famaebebanglu laman sas fagsegan fag Mangena tagsis Banwa ay gina ami nafaragang gfon sa anya ngay fanginum fag fanggalangun, anke fagidapun ami ay ngayu at kinbul sas awayan ay sas fanlunus.”

¹⁹ Ngay mangena nalong yangay te, “Em ngay mangama saful way nu nangirug ami ngay famaebebanglu laman sas fagsegan fag Mangena tagsis Banwa, ay nu namon ami em ngay fanggalangun fag ngay fanginum, ay nu gfatama ami tinapay takata kanya fag fagsegan at kawalungan.”

²⁰ Nu katanya, Eremyas nabalus sa anya fagayu te,

²¹ “O nu glong am, Yawi wa nasaful te, am ay anggan ay ngay mangaguyang, ay ay ngay fun, ay ay ngay tagfangguna, ay fagayu am, girug am ngay famaebebanglu fag fanggalangun laman sa sangay fagsegan sis Uda fag ngay furuan ay sis Erusalem fag ngay dalan?

²² Yawi wa nkagwanta ay ngay nafakamulun at mauri ay at masuya, nu katanya, kanya narasras ay talun ay ansik mabaluanan aroro we gbanwan ya.

²³ Andasug sa ayu takatanya fag faurianan aroro nairug am ngay famaebebanglu sa tibak fagsegan at nafae asalanan ayu sas Yawi. Wam nafaning at ngay suguan, at ngay faugali ay at ngay foyungan.”

²⁴ Eremyas gfataglayun glong sa sangay taw te, “Ngay taw Uda tagbanwan stes talun Igiptu, dungugani Yawi at foyungan.

²⁵ Yawi at Mabalyanan, Israel at Dius, glong te, ‘Am fag ngay dadwa nafafasludan am ay fatuyanan sas fagsegan fag Mangena tagsis Banwa, siginan nu girug am ngay famaebebanglu ay nu gfon am ngay fanginum fag ngay fanggalangun. Agvd, fataglayuni ay fakamulun, ay fafasludani ay fatuyanan.

²⁶ Dewa katanya, ngay taw Uda tagbanwan sis talun Igiptu dungugani ku longan. Gfatuyanan au te, siginan ban katsi, nusnga sinu fag taw we malong ya ku ngayan. Kwa ban kaylat ya nu glong am ku ngayan gina am gfatuyanan, ay nu glong am te, “Gfatuyanan au sas Fun Dius Yawi, tagleleg fag Dius.”

²⁷ Abat ngate kban gdiri ayu laman e fagmasineun am, gfaurianan kway ban ayu. Ay fagayu am tagbanwan stes talun Igiptu, kabul ban am sas awayan, sas fanlunus yakmay ban am ankamin.

²⁸ Ay dewa ban anke sawad siginans fagawayanan ay anfoli sas Uda, wa ban am ngayu ya. Siginan ban takatanya at kinsawad fag ngay taw Uda tagbanwan sis talun Igiptu, sumaful te, sinu ke longan at matuyan: at ngay longan o ku longan.

²⁹ Kanya ban at fagsafulan te, namaurianan au ayu ste fag talun, laman sumaful am te, gfafasludan au ku longan te, namaurianan au ayu.

³⁰ Gfon kban Igiptu at fun Kufra, talun Igiptu at fun, sat ngay fawayan takaylat gfabul anya kata ku nafakamulun sas Sedekya talun Uda at fun, sat fawayan fag fun Nabukudunusur talun Babilunya at fun takaylat yangay gfabul anya. Au, Yawi, taglong tuy.’ ”