Eremyas 43 - Fanawbuid tagsibaliwas Fakayabian

Nataban Eremyas sas Talun Igiptu

¹ Eremyas nu nafoyung wan Yawi at longan sabaliwa anya fagayu,

² Asarya, Usaya at baguama, ay Ukanan, Kareak at baguama, ay tiba yak mangama takamuag nalong sas Eremyas te, “Kamuag way o! Yawi em Dius wa nasugu emu laman nanlong o sa emi te, wami masine glao sas talun Igiptu laman namanwan sanya.

³ Ay Baruk, Nerya at baguama at nafaylatan emu laman namagbilug o emi sa sangay taw Babilunya laman gfabul emi ay mannga nantaban.”

⁴ Nu katanya, Ukanan, Kareak at baguama, ay at ngay ufud fag ngay fun tagfawayan ay fagayu taw wa nafaning Yawi at suguan te, banwani way gugat sis talun Uda.

⁵ Abat ngate, Ukanan ay at ngay ufud fag ngay tagfawayan nataban at kinsawad fag ngay taw Uda at kinfoli sas Uda siginan at fagsaruayanan fag ngay talun.

⁶ Galo yangay sanya anggan ngay mangama, mangena ay sisian, ay anggan fun at ngay baguina, ay Nebusaradan fag tagfangguna ngay tagulit at nafatigwanan sas Gedalya, Akikam at baguama, Safan at fufu. Kanya fagayu nataban yangay Eremyas fag taglong ay Baruk, Nerya at baguama.

⁷ Kanya fagayu abat ngate nafaning Yawi, nafataglayun way nu glao sas talun Igiptu, ay andasug sas furuan Takpanes.

⁸ Ay gina sis Takpanes, Yawi nalong sas Eremyas te,

⁹ “Gina ngay taw Uda gdama, namul o sik ngay gang tagbia ay saksaki sasad daga sis wabilug dalan tagsas Igiptu at fun at bale.

¹⁰ Sanya ginan, longi sa anya fagayu te, ‘Yawi at Mabalyanan, Israel at Dius, glong te, Gsugu kban ku fagsuguan Nabukudunusur, Babilunya at fun, ay namoli au at fagmalunggungan sis tungud ku nasaksak ste fag ngay gang ay kanya nangawat at bale ramit sit tungud.

¹¹ Ay sanya ginan ban kanya namawayan talun Igiptu ay kabul ban sas fakasaitun at nafalganan kabul, ay gatabanan ban at nafalganan gatabanan, ay kabul ban sas awayan at nafalganan kabul.

¹² Ay kanya ban girug talun Igiptu at ngay fagsegan at ngay bale. Ay girug yangay ban tibak fagsegan, ay tiba ban e gbuba wan. Ay kanya ban gfasine talun Igiptu kata ngay tagalaga tupa nu gbul ngay tuma siginan at ngay lanbung. Sanya ginan ban, fun Nabukudunusur glao manabayan siginans talun Igiptu.

¹³ Kanya ban grufa wan ngay fagsegan at turuk sis furuan Bet-Semes sis talun Igiptu, ay girug wan sanya fag ngay fagsegan at ngay bale.’ ”