Eremyas 42 - Fanawbuid tagsibaliwas Fakayabian

Ngay Taw Get sas Eremyas te, Darangini anya Fagayu

¹ Sanya ginan, Ukanan, Kareak at baguama, ay Asarya, Usaya at baguama ay at ngay ufud fag tagfawayan, ay fagayu taw, at yud e kwa ay anggan takadungug nanangakbang sas Eremyas.

² Ay kanya fagayu glong sas Eremyas te, “Fagayu ami at kinsawad gfainfanyuan ami sa emu te, darangini emi sam Dius. Ebi, ngayu oma mi, dewa katanya katsi, glag wo, wami ngayu ya.

³ Darangini sas Yawi am Dius, laman kanya gfoyung emi nu dada ban nu glao ami ay nu setain ban em fakamulun at masine.”

⁴ Ay Eremyas nalong te, “Agvd, gdarangin kban ayu sa ay Dius Yawi sabaliwa ay fagetun, ay gfoyung kban ayu nu setain at famalus. Ay kwa ban gsuksuk sa ayu nusnge wain.”

⁵ Ay kanya fagayu glong yay fia sas Eremyas te, “Yawi am Dius tagfatuyan ban nu dway mi gfafasludan at longan fagayu at nafoyung emu.

⁶ Dewa ban maylat ay wa maylat sa emi, gfaning ban mi Yawi at longan laman ban manabayan tuami.”

⁷ Ay nu nlangfe safuluk menit, Yawi naringang sas Eremyas.

⁸ Nu katanya, Eremyas nafaful Ukanan, Kareak at baguama, ay fagayu at tagfawayan ay anggan fagayu taw, at yud e kwa ay anggan takadungug.

⁹ Sanya ginan, Eremyas nalong sa anya fagayu te, “Ay fagetun sa angku te, darangini ayu sas Yawi, Israel at Dius, katsi katatuy at famalus sa ayu:

¹⁰ ‘Nu gbanwan tua ban am gugat ste fag talun, gfadog kyay ban gfalindug ayu ay kwa ban gfaurianan ya ayu. Gtanum kban ayu ay kwa ban ggulad ya. Aroro at matuyan, anbalu au sa ku nafadasug sa ayu fag faurianan.

¹¹ Lag am kalimu ya Babilunya at fun aroro gufud ktua ban gugat ayu ay gfalangfe siginan at daluap.

¹² Kafanyu kban ayu. Ay nangawat kban sik balyawvtan laman Babilunya at fun kafanyu tua ayu ay kaylat nu namanwan am ste ay talun.’

¹³ “Dewa katanya, nu dway ban am gfaning ay Dius Yawi, ay nu glong way ban am te, ‘Wa ban ngaduge nu gbanwan ami ste fag talun,

¹⁴ ay glao ban mi sas talun Igiptu ay namanwan ami sanya, aroro sanya we awayan ay di malunus,’

¹⁵ katatuy Yawi at Mabalyanan, Israel at Dius, at famalus, ‘Fagayu am at kinsawad fag ngay taw Uda, nu e algan wayam nanlao sas talun Igiptu ay namanwan sanya,

¹⁶ galo way ban gugat ayu ay fakalimuun fag awayan ay fag fanlunus, ay kabul ban am sanya.

¹⁷ Fagayu ban takaylat namanwan sas talun Igiptu kabul ban sas awayan, sas fanlunus, ay sas fakasaitun. Ay nusnga sinu ban wa malangfe ya ay malagyu siginan ku fagnamadasugun fag faurianan.’

¹⁸ Yawi at Mabalyanan, Israel at Dius, glong yay fia te, ‘Nu setain nu gfalag au sa sangay taw Erusalem nu kadotama au maksvn, gfalag kyangay ban sa ayu ku fandotaman nu glao way ban am sas talun Igiptu. Ngay taw ban maksvn nu gfauri ayu. Kanya ban fagayu gfalingun ay gngayan ban ayu te, mauri, ay wa ban am makafoli ya stae fag talun.’

¹⁹ “Am fag ngay taw Uda at kinsawad, Yawi glong sa ayu te, ‘Lag am glao sas talun Igiptu.’ Amatangi fia ku ngay famararang sa ayu katsi.

²⁰ Wa masine ay fakamulun. Nafababaun am naet sa angku laman nangakbang au sa ay Dius Yawi ay gdarangin laman sa ayu ay nafatuyanan am te, gfakamulun ban am fagayu at nalong sa ayu.

²¹ Dewa katanya, nu nafoyung au ayu ay Dius Yawi at longan, wam kaylat gfaning.

²² Nu katanya, katsi gfatuyanan au sa ayu te, kabul ban am sas awayan, sas fanlunus, ay sas fakasaitun sis talun Igiptu, ay nusnga nday ban nu gbanwan am.”