Eremyas 41 - Fanawbuid tagsibaliwas Fakayabian

Nafabul Gedalya

¹ Sis fafituk magdanun ginanya fag banwa, Ismael nalao sas Gedalya sas Mispa, gadgaloan safuluk taw. (Ismael, Netanya at baguama ay Elisama at fufu tagsiginans fun at kalongan. Kanya ebi fun at tagfangguna at sadi. Ay Gedalya, Akikam at baguama.) Ay kaduge kanya fagayu gfangon,

² Ismael anlindug gasfuan at fagsuguan fag safulu ay siginan at fiso tagsumbalian at uyup, kanya fagayu nafabul Gedalya, Akikam at baguama, Safan at fufu. Nu katanya, nafabul wan Babilunya at fun at nafili fag fun sirut sas fagdaul talun Uda.

³ Ismael ay at fagsuguan fag safulu nafabul yangay fagayu taw Udyu tagsis Mispa, ay anggan Babilunya at ngay tagfawayan.

⁴ Ay balabag di sbalabag, gina ngay taw bagu gsaful te, Gedalya anbul wan,

⁵ waluk safuluk mangama siginans Sekem, Samarya ay Silu, nalao sas Mispa. Kanya fagayu naufo at ngay umi, ay nagirat at ngay lanbung ay nafilas ayu sirut at ngay bilug laman gfalag te, kabalu. Kanya fagayu e buba ngay fanggalangun laman famauseganan Yawi, ay e ngay buba yangay famaebebanglu fag ngay fanggalangun laman sas Yawi at bale.

⁶ Ay Ismael nu naduksun siginans Mispa, gwayway ay nafablang ngay taw ay glong te, “Gewan, nanlag am at kinfasludan sas Gedalya.”

⁷ Kanya fag waluk safuluk mangama nu ndasug sanya fag furuan, Ismael ay at ngay fagsuguan nafabul at fituk safulu, ay nafatong sa sik bubun.

⁸ Ay wa nafabul at safulu aroro kanya fagayu nalong sas Ismael te, “Lag o gfabul emi! Namon ban mi sa emu em ngay trigu, barli, langis ay deut em nafasuksuk si em gamasun.”

⁹ Ismael at fagfatongan kafag ngay taw at bilug anggan Gedalya at bilug, fun Asa at fagagbilugun fag bubun. Ay ebi kafag bubun fun Asa at nafaali gina Baasa, Israel at fun, nafawayan anya. Ismael nafapnu kafag bubun at ngay nafabul.

¹⁰ Ay Ismael nataban at kinsawad fag ngay taw Mispa: fun at ngay baguina ay anggan Nebusaradan at nafatigwanan sas Gedalya fag ngay taw laman at fagulitun. Ay sanya ginan Ismael anfoli wan sas talun Amun gfadgaloan at ngay nataban.

¹¹ Ay Ukanan, Kareak at baguama, ay at ngay fagsuguan nadungug sabaliwa Ismael at nafakamulun mauri.

¹² Kanya nafaful at ngay fagsuguan ay nanamafalo Ismael laman namawayan. Ay kanya fagayu nasud anya si sik tagbia fag fagfungsuan mamam sis Gibyun.

¹³ Ismael at nataban fag ngay taw maksvn nu guseganan nu nalag Ukanan ay at ufud fag ngay fun tagfawayan.

¹⁴ Ay kanya fagayu nanamablang Ukanan.

¹⁵ Dewa katanya, Ismael ay at fagsuguan fag walu nalagyu sas Amun.

¹⁶ Ismael nu nafabul Gedalya ay nataban ngay taw siginans Mispa, Ukanan ay at ngay fagsuguan nafaful kanya fag ngay taw: ngay tagfawayan, ngay mangena, ngay sisian ay anggan ngay tagfangguna sis fun at bale, ay nataban anya fagayu siginans Gibyun.

¹⁷ Ay kanya fagayu nataglayun sas Gerut-Kimam munakbang sis Betleem ay andasug sas talun Igiptu.

¹⁸ Aroro kanya fagayu kalimu ngay taw Babilunya aroro Ismael nafabul Gedalya, Babilunya at fun at nafili fag fun sirut sas fagdaul talun Uda.