Eremyas 40 - Fanawbuid tagsibaliwas Fakayabian

Nafalfas Eremyas

¹ Nebusaradan fag tagfangguna ngay tagulit sis Rama gina nafalfas Eremyas, Yawi e longan. Ginanya, Eremyas masiukan salambitan magamut ngay taw Erusalem ay ngay taw Uda at natabanan sas talun Babilunya.

² Ay Nebusaradan nu nalag Eremyas nalong te, “Yawi, am Dius nalong te, grasras ban furuan Erusalem.

³ Ay anfasludan kata at longan. Anfasludan takatanya aroro am ngay kaiban nafakamulun at mauri sas Yawi ay wa gfaning anya.

⁴ Katsi, gfalfas kwa emu, ay gluas kwan at fansiuk emu fag salambitan. Ay nu masine tua sa emu aloi angku sas talun Babilunya ay galaga kban emu. Ay nu dway o kaylat si way emu.” Ay Nebusaradan gdog yay glong sas Eremyas te, “Damai fagdaul talun; masine way o glao nusnga nday am fakaylatun.

⁵ Nu kaylat yay o kafamato ste, afolii way sas Gedalya, Akikam at baguama, Safan at fufu. Ay talun Babilunya at fun nafili anya laman tagalaga ngay furuan sis Uda. Masine way o gbanwan magamut Gedalya ay at ngay fagfagtainanan ay dewa nday am fakaylatun gbanwan.” Sanya ginan, Nebusaradan nafon anya ngay fakonun ay sik ngay famonun, ay Eremyas nalfas wan.

⁶ Nu katanya, Eremyas nalao sas Gedalya sas Mispa ay sanya wan nu gbanwan magamut at kinfamato fag ngay taw.

Gedalya Gfunan Talun Uda

⁷ Sis talun Uda e ngay tagfawayan ay at ngay tagfangguna at yud nafababaun sa sangay taw Babilunya ay tagsuksuan sas talun buid. Kanya fagayu nadungug te, Babilunya at fun nafili Gedalya laman fun sirut sas fagdaul at talun laman gfangguna fagayu at maksvn nu gidapan fag ngay mangama, ngay mangena ay ngay sisian at yud natabanan sas talun Babilunya.

⁸ Nu katanya, kafag ngay fun tagfawayan nalao sas Gedalya sas Mispa. At ngay ngayan: Ismael, Netanya at baguama, Ukanan ay Yunatan, Kareak at ngay baguama, Seraya, Tankumet at baguama, Efay at ngay baguama fag taw Netufa, ay Aasanya fag taw Maaka, gadgaloan at ngay tagfawayan.

⁹ Ay Gedalya gfatuyanan sa kafag ngay fun tagfawayan ay sat ngay tagfawayan at daga salubangan te, “Lag am kalimu gfakamulun sa sangay taw Babilunya. Nu bunway banwani yap ste ay fakamuluni sas Babilunya at fun ay wa ban e kadasug at mauri sa ayu.

¹⁰ Gbanwan kyay ban sirut stes Mispa laman ban au ay tagwabilug sa sangay taw Babilunya nu ndasug ste. Banwani ban nusnga nday nu kaylat am gbanwan, ay gutlui ban at ngay tanum ubas ay ulibu at ngay rawvg, ay tiba yak kayu at ngay rawvg, ay fafuli ban sa sangay fagsuadan.”

¹¹ Ay fagayu taw Udyu at nalagyu sas Muab, Amun, Edum ay sa tiba yak talun nadungug te, fun Nabukudunusur e nafamato yay tibak tagbanwan sis talun Uda, ay nafili Gedalya, Akikam at baguama, Safan at fufu, laman sik fun sirut sanya.

¹² Nu katanya, ngay taw Udyu anfoli yay sas Uda siginan at fagsaruayanan fag ngay talun ay nasas Gedalya sas Mispa. Ay nu sanya wan, kanya fagayu nabul ngay rawvg ubas ay tiba yak rawvg.

¹³ Ay Ukanan, Kareak at baguama, ay tiba yak tagfawayan at yud nafababaun sa sangay taw Babilunya, nasas Gedalya sas Mispa,

¹⁴ ay nalong sas Gedalya te, “O wo nasaful te, fun Baalis ngay taw Amun at fun nasugu Ismael, Netanya at baguama, laman gfabul emu?” Dewa katanya, Gedalya wa gafanud kanya fagayu at longan.

¹⁵ Nu katanya, Ukanan nalao sas Gedalya we saful ay glong te, “Gfabul kwa ban Ismael, at yud e nasaful. Lag ta gfabayan Ismael nu gfabul emu. Aroro nu nafabul way ro emu, kanya wan tagfatuyan te, umsaruayan waban ay umkalyam ngay taw Udyu at kinfamato sis Uda.”

¹⁶ Ay Gedalya, Akikam at baguama, nabalus Ukanan te, “Lag o gfakamulun takatanya. Wa mafanud am nalong sabaliwas Ismael.”