Eremyas 4 - Fanawbuid tagsibaliwas Fakayabian

¹ Yawi nalong te, “Israel, nu kaylat tuo fia kafoli sa angku, afolii wan. Nu gubun tuo fia am ngay fagsegan ay nu ddi ban o kasaruayan ya siginan angku,

² ay nu gfatuyan tuo fia sa angku, ay gugali at matuyan, ggubuk ban o sa sangay talun at taw 2 laman kanya fagayu gfauseganan yangay angku.”

³ Yawi nalong sa sangay taw Uda ay sa sangay taw Erusalem te, “Fabalii wan ay ngay ugali kata nu kali am ay mesa lutuk, at yud batang malian. Ay buli siginan ayu fagmauriun, kata sik tagtanum nu ggulad at madugi fag makmak.

⁴ Ngay taw Uda ay taw Erusalem, fasinei wan ay ngay amatanganan si ku daga salubangan, aroro nu dway ban am gfakamulun takatanya, umdasug sa ayu ku dotama takata igang at yud e mafarabung ya, aroro sa ay nafakamulun at mauri. Umfasludan ban takatanya aroro sa ay nafakamulun at mauri.”

Takadasug fag Faurianan sas Uda

⁵ “Nanlong o sa sangay taw Uda ay sa sangay taw Erusalem te, ‘Uyupi ay budyung sas fagdaul ay talun.’ Fabiai nu guro am ay longi te, ‘Lagyui wan ay suksuani sa sangay furuan at ke ngay alad.’

⁶ Fadasugi sik famararang sa sangay taw Erusalem laman kanya fagayu masakit glagyu, aroro namadasug au tagrasras siginans fawalan fag alvngvdan.”

⁷ Tagrasras ngay talun kadasug wan kata sik liun at nalfas siginan at luib, laman namaurianan ay talun, kata ngay liun nu masakit gduksun siginan at fagsuksuanan. Ay fagayu ay furuan umrasras, ay wa ban e gbanwan ya.

⁸ Nu katanya, suluni ay ngay lanbung famatoglag te, kabalu am ay waywayi te, “Yawi kadotama yay gugat antam.”

⁹ Yawi nalong te, “Ginanya ban fag menit, at fun ay at ngay tagfangguna ummomuy at amatanganan, ay ngay tagfon fanggalangun umlimu maksvn, ay ngay taglong gtadtaruyan kalimu.”

¹⁰ Sanya ginan, nalong au te, “Yawi, ku Fun, nafamuag o sam ngay taw, aroro ebi nafatuyanan o sa anya fagayu te, manabayan tua ban gugat Erusalem. Ay dewa katanya, katsi fiso tagsumbalian at uyup mafalganan wan laman namabul emi.”

¹¹ Kadasug ban sik menit, Yawi glong sa sangay taw Uda ay sa sangay taw Erusalem te, “Siginan ban baliwas talun at yud e taw fag ngay tagbudbuksulanun, gtagmara masugba kadasug sa ku ngay taw, ay kafag tagmara bundi famalayug ngay upa.

¹² Kanya at maksvn fag tagmara siginan tua angku. Katsi nanlong au sa anya fagayu ku faurianan.”

¹³ Damai! Tam ngay fawayan kadasug kata sik ngay linyabu. At ngay faguyudan fangawayan kata sik tagbaribungan fag tagmara, ay at ngay kabayu asakit yap bio. Afanyuan tam aroro katsi wan tam fakatabuan!

¹⁴ “Ngay taw Erusalem, talyuyani wan ay asalanan laman umlangfe tuam. Seduge ya ban nu gamatangan am sat mauri?

¹⁵ Ngay tagfosuk longan tagsiginans talun Dan ay tagsiginans Efraim fag ngay buksul nalong oma sa ayu takadasug ban fag ngay faurianan.

¹⁶ Kanya nasugu kafag ngay tagfosuk longan laman namadasug famararang sa sangay talun ay sas furuan Erusalem te, e ngay fawayan siginan tangayayu fag talun takaylat namawayan Uda at ngay furuan.

¹⁷ Kanya fagayu naligung furuan Erusalem kata ngay taw tagalaga tanuman, aroro kafag furuan nafamabo angku. Au, Yawi, taglong tuy.

¹⁸ Ay ngay ugali ay ay fakamulun maksvn nu mauri, kanya wan at fagindasugun sa ayu faurianan. Maksvn nu maidap at kindasug sa ayu fag faurianan! At kaksvnan kata nu natalfus sa ay ngay amatanganan.”

Eremyas Nawayway laman sat ngay Kaiban

¹⁹ “Kwa magwanta ya gamatangan ku ngay fagidapun at kaksvnan nu maidap. Ku dubdub gsubsubuan ay kwa kagwanta ya. Aroro nadungug au sik budyung at awang ay sik uro siginans fagawayanan.

²⁰ Gdoddogan faurianan nu kadasug, ay fagdaul talun anrasras wan. Anggan ku ngay bale ramit anrasras yangay.

²¹ Seduge ya ban manga nu glag au famasaful fag ramit sabaliwa nu gawayan, ay nu gdungug au budyung at awang?”

²² Yawi nalong te, “Ku ngay taw we fagsafulun; kanya fagayu wa toglag angku, kata way sik ngay baguama yud e fagsafulun ay at yud gtogdungug, ay annanad gfakamulun at mauri ay wa saful gfakamulun at masine.”

Eremyas at Taginfan sabaliwa Takadasug fag Faurianan

²³ Sanya ginan, nabanawan au sas fagdaul talun ay nalag au te, we kawalungan ya ay we gleleg ya. Ay natangda au sas banwa ay we yamag ya.

²⁴ Ay nalag au buksul nu guigan.

²⁵ Ay we taw ya, ay ngay manuk tungud glayug wan kayayu.

²⁶ Nalag au sik gamasun tangayu gugat nu grawvg at kinkata sik talun at yud e taw. Siginans Yawi at dotama ngay furuan anrasras.

²⁷ Katatuy Yawi at longan te, “Fagdaul talun umrasras, dewa katanya, kya ban fia grasras.

²⁸ Fagdaul daga kabalu ay banwa kadulum, aroro nalong kwan ku faurianan ay kwa gfabadbalian ya. Nafalganan kwan ku namatangan ay namafasludan kwan.”

²⁹ Ngay tagbanwan si sangay furuan nalagyu aroro kalimu nu nadungug ngay tagakabayuan ay at ke ngay godun nu garingang. Tiba nalagyu sasad araw, ay tiba naulul sa sangay fungsu. Ay kanya fagayu naubun at ngay furuan ay we gbanwan ya.

³⁰ Erusalem, munakbang wan nu kamin o. Nataw katsi am fakamulun? Wain am fagalanbunganun yay at masine ay am fage famasineun yay sim bilug? We tungkul ya nu kamasineun o. Am fagadgalangan fag ngay talun wa kaylat ya emu, abat ngate, namabul wan emu.

³¹ Nadungug au sik maksvn fag wayway ay fag fandeng kata sik mangena nu gfandeng gina gfasalug at ngenge taguna. Katanya ngay taw Erusalem nu gfandeng. Kanya fagayu gfalugde at ngay take ay gfainfanyuan get gubuk ay glong te, “Karanug au. Ku ngay fawayan namabul wan angku.”