Eremyas 39 - Fanawbuid tagsibaliwas Fakayabian

Furuan Erusalem nu Karasras

¹ Katatuy furuan Erusalem nu karasras: sis fasafuluk magdanun sis fasiamk banwa, fun Sedekya nu gfunan talun Uda, fun Nabukudunusur, talun Babilunya at fun, ay fagayu at ngay tagfawayan anful sis day Erusalem ay nafabungsud lutuk sis fun alad laman at fagsakboan.

² Ay gina sis fasiamk menit sis faufatk magdanun ay sis falabi sadik banwa fun Sedekya nu gfunan, ngay taw Babilunya naiklas wan furuan at ngay alad.

³ Ay talun Babilunya at ngay tagfawayan nu nasakbo wan sas Erusalem, at ngay tagfangguna namalunggung sis wabilug furuan at sakbawan. Tagsanya, Nergal-Sareser tagsiginans Samgar, Nebu-Sarsekim fag tagfangguna ay sik tagfangguna at ngayan yangay te, Nergal-Sareser, ay tiba yak tagfangguna.

⁴ Fun Sedekya ay at ngay tagfawayan nu nalag kanya fag ngay taw, gina gakayabiun kanya fagayu nalagyu wan. Kanya fagayu nadalan sas fun at tanuman, sas sakbawan tagsis wabilug duak alad, ay nalagyu sas Liskung Urdan.

⁵ Ay talun Babilunya at ngay tagfawayan nafafalo ay nasud sis datag tagsis furuan Eriku. Ay kanya fagayu nagamat fun Sedekya ay nataban sas fun Nabukudunusur sas furuan Ribla, tagsis talun Amat. Ay sanya wan fun Nabukudunusur nu gtuyan te, fabuli wan Sedekya.

⁶ Ay sanya yangay, sis Sedekya at daga salubangan, Babilunya at fun nafabul Sedekya at ngay baguama ay fagayu tagfangguna sis talun Uda.

⁷ Ay nasugu yangay te, “Guladi Sedekya at ngay mata, ay siuki anya salambitan.” Ay sanya ginan nataban anya sas talun Babilunya.

⁸ Ay talun Babilunya at ngay tagfawayan nairug wan tagsis Erusalem fag ngay bale ay anggan fun at bale daul, ay narufa yangay ngay alad.

⁹ Nebusaradan fag tagfangguna ngay tagulit, nafangguna laman gtaban ngay taw at kinsawad sis Erusalem, ay anggan at nafadiuganan anya fag ngay taw, natabanan wan sas talun Babilunya.

¹⁰ Ay Nebusaradan nafamato way sis Uda tibak taw at yud e ramraman, ay kanya nafon sa kafag ngay taw at mesa gamasun ay tanuman wat ubas.

¹¹ Sanya ginan, fun Nabukudunusur nasugu sas Nebusaradan sabaliwas Eremyas te,

¹² “Nantaban o Eremyas ay alagai fia anya. Ay foni fagayu at fagetun.”

¹³ Ay Nebusaradan fag tagfangguna ngay tagulit, ay Nebusasban, Nergal-Sareser, ay tiba ya talun Babilunya at ngay tagfangguna nafaning at suguan.

¹⁴ Kanya fagayu nafataban Eremyas siginan sangay tagulit at fagmafulan ay nafalaga sas Gedalya, Akikam at baguama, Safan at fufu. Ay Gedalya nataban Eremyas sat bale. Ay Eremyas anfamato way sis talun Uda magamut sit ngay kaiban.

¹⁵ Gina Eremyas maubungan si sangay tagulit at fagmafulan, Yawi nalong anya te,

¹⁶ “Loi sas Ebed-Melek fag taw Etiupya ay nanlong o anya te, ‘Au, Yawi at Mabalyanan, Israel at Dius, glong au te, gfafasludan kwan ku ngay nalong laman ste fag furuan. Kwa namae ramraman ya tuy fag furuan nu bunway nangiklas kwan. Ay lumag ban o nu kafasludan.

¹⁷ Dewa katanya, ginanya ban, gfalangfe au emu. Kwa ban gfon emu sa am fakalimuun fag ngay taw.

¹⁸ Ay gfalangfe kban emu, ay di ban o kabul sas awayan. Umlangfe tua ban o aroro gafanud tuo sa angku. Au, Yawi, taglong tuy.’ ”