Eremyas 38 - Fanawbuid tagsibaliwas Fakayabian

Nafatong Eremyas sas Bubun

¹ Sefatya, Matan at baguama, ay Gedalya, Pasur at baguama, ay Yeukal, Selemya at baguama, ay Pasur, Malkya at baguama, nadungug Eremyas at longan sa sangay taw te, “Yawi glong te,

² ‘Nusnga sinu tagbanwan yay gugat sis furuan, umbul ban sas awayan ay fanlunus ay fakasaitun, dewa katanya, nusnga sinu ban at nafamababaun sa sangay taw Babilunya wa ban kabul, nu bunway kalangfe tua ban ay gleleg.’

³ Yawi nalong yangay te, ‘Matuyan, ngay taw Babilunya nangago wan ay nangagbilug tuy fag furuan.’ ”

⁴ Nu katanya, kafag ngay tagfangguna nalong sat fun te, “Fabuli wan Eremyas aroro at ngay longan gfamomuy way at kinsawad fag ngay tagfawayan ay tam ngay taw at ngay amatanganan. Kanya we algan ya at masine sa sangay taw, nu bunway fagmauriun way.”

⁵ Ay fun Sedekya gbalus anya fagayu te, “Kanya nafatigwanan kwan sa ayu. Fakamuluni wan sa anya nu setain ay fakaylatun.”

⁶ Nu katanya, kanya fagayu nafaduksun Eremyas siginan sad ubung ay nafasa sik bubun si sangay tagulit at fagmafulan. Kanya fag bubun fun at baguama Malkya at fagagbilugun. We mamam kafag bubun, ay dewa katanya, e lifak, Eremyas arvs anfalyu sasad lifak.

^7-8 Ay Ebed-Melek, sik taw Etiupya, ay sik tagfangguna yangay sis fun at bale daul nu nadungug sabaliwas Eremyas, kanya nalao sas fun at bale. Ay ginanya at fun malunggung sis Benamin at sakbawan. Ay kanya nalong sas fun te,

⁹ “Mesug fag fun, ngay taw nafakamulun at mauri sas Eremyas. Kanya fagayu nafatong anya sa sik bubun, ay matuyan kanya ban umbul wan sas lunus, aroro gakaminun wan tinapay sas fagdaul furuan.”

¹⁰ Nu katanya, fun Sedekya nasugu sas Ebed-Melek te, “Nantaban o tuluk safuluk mangama siginan ku ngay taw, ay namaduksun am Eremyas siginans bubun gina yay yud anbul.”

¹¹ Ay Ebed-Melek nafili ay nataban sik ngay taw ay kanya fagayu nalao sas fun at bale at fagfungsuan nusnge wain ay nabul sik ngay ramit dan ay sik fansiuk ay nafatagbung sas Eremyas sasad basad bubun.

¹² Ay Ebed-Melek guro Eremyas te, “Salanigi am sulung kanya fag ngay ramit laman ro fansiuk wa glibit emu.” Ay Eremyas nafaning.

¹³ Ay kanya fagayu nu nafaduksun wan Eremyas, nafafoli anya sa sangay tagulit at fagmafulan.

Fun Sedekya Nadog yay Nafauro Eremyas

¹⁴ Fun Sedekya nadog yay nafauro Eremyas ay nafasas Yawi at bale at fatuluk sakbawan, ay sanya fun Sedekya glong sas Eremyas te, “E fagintoun au sa emu; balusi sa angku at matuyan.”

¹⁵ Ay Eremyas gbalus fun Sedekya te, “Dewa kngap ro nabalus emu, gfabul way ro wo angku, ay dewa kngap ro nafangatulun emu, wo gafanud.”

¹⁶ Ay fun Sedekya ginasan gfatuyanan sas Eremyas te, “Gfatuyanan au sas Yawi, tagleleg fag Dius tagfon antam leleg te, kwa ro gfabul ay kwa yangay ro gfon emu sa takaylat gyafabulun emu.”

¹⁷ Eremyas nalong sas fun Sedekya te, “Katatuy Yawi at Mabalyanan, Israel at Dius, at longan: nu gfababaun tua ban o sas Babilunya at fun, umlangfe yay ban o, ay ngay taw Babilunya ban wa girug tuy fag furuan ay anggan ban am talnayan gleleg tua.

¹⁸ Dewa katanya, way ban o gfababaun, Dius ban namagbilug wan tuy fag furuan sas talun Babilunya ay kanya ban fagayu nangirug.”

¹⁹ Ay fun Sedekya glong sas Eremyas te, “Kalimu au ngay taw Udyu at nafadiuganan sa sangay taw Babilunya, aroro ngay taw Babilunya mafon angku sa anya fagayu ay kanya fagayu mafauri angku.”

²⁰ Ay Eremyas glong anya te, “Nu gfaning tua ban o Yawi at longan, ngay taw Babilunya ro wa gfon emu sa kafag ngay taw Udyu. Wa ro wo kabul ay wa ro e kadasug sa emu nusnge wain at mauri.

²¹ Dewa katanya, nu dway ban o gfababaun, katatuy Yawi at Mabalyanan at longan sa angku takadasug sa emu.

²² Fagayu mangena at kinfamato sim bale, ngay tagfangguna ban gtaban sas talun Babilunya. Ay kanya ban fag ngay mangena glong emu te, ‘Am ngay fagadgalangan gfalingun emu, ay am darafa malubguban way sisad lifak, ay kanya fagayu natalyuyan wan emu.’

²³ “Kanya ban fagayu gtaban wan fagayu am mangena ay anggan am ngay sisian sas talun Babilunya ay wa ban o malagyu ya. Ay kanya ban fagayu girug wan tuy fag furuan.”

²⁴ Sanya ginan, fun Sedekya nalong sas Eremyas te, “Lag o gfoyung sas nusnga sinu fag taw ta kamatoanan laman ro wo kabul.

²⁵ Ay tibaginan ngay tagfangguna nasaful way te, nakamatoan ta ay mainto sa emu te, ‘Nataw ay nakamatoan? Nu dway o glong sa emi, gfabul ro mi emu.’

²⁶ Nu nainto takatanya, longi way sa anya fagayu te, ‘Nalong kway sas fun te, Lag gfafoli ya angku sas Yunatan at bale. Manbul au sanya.’ ”

²⁷ Ay ngay tagfangguna nalao sas Eremyas ay nainto anya. Ay Eremyas gbalus kata fun at nalong anya, ay kanya fagayu wa nainto ya aroro we nadungug Eremyas ay fun nu gkamatoan.

²⁸ Ay Eremyas maubungan yay si sangay tagulit at fagmafulan yakmay at ngay fawayan nagbilug Erusalem.