Eremyas 37 - Fanawbuid tagsibaliwas Fakayabian

Sedekya Nafauro Eremyas

¹ Talun Babilunya at fun nafili Sedekya, Usyas at baguama, laman at fun sis Uda. Kanya at fangungbus Yuyakin, Yuyakim at baguama.

² Dewa katanya, Sedekya ay at ngay tagfangguna anggan at ngay fagfunanun fag ngay taw wa yangay nadungugan Eremyas at foyungan Yawi at longan.

³ Nu katanya, fun Sedekya nasugu Yeukal, Selemya at baguama, ay Sefanyas fag tagfon fanggalangun, Maaseya at baguama te, “Loi sas Eremyas ay nanget am sa anya te, darangini emi sa tam Dius Yawi.”

⁴ Ginanya, Eremyas ya nkubung, ay ye gsalag anya nusnga nday nu glao.

⁵ Ay ginanya fag menit, ngay taw Babilunya nafawayan furuan Erusalem. Dewa katanya, kanya fagayu nu nasaful te, Igiptu at fun at ngay tagfawayan kadasug, kanya fagayu anragang nu gfawayan Erusalem.

^6-7 Sanya ginan, Yawi, Israel at Dius, nalong sas Eremyas te, “Nanlong o sas Sedekya, Uda at fun, at nasugu ngay taw laman nanginto sa emu te, nataw ban ku nalong takadasug, longi sa anya te, ‘Igiptu at fun at ngay tagfawayan andasug laman nanggubuk emu. Dewa katanya, kanya fagayu kafoli way vtv sat talun Igiptu.

⁸ Ay sanya ginan ngay taw Babilunya ban at ngay tagfawayan gdog yay kafoli ste fag furuan. Ay kanya ban fagayu nangagbilug tuy fag furuan ay nangirug.

⁹ Katatuy Yawi at longan, Lag am gdaya ay sadili te, ngay taw Babilunya at ngay tagfawayan wa kafoli ya ste. Matuyan, kanya ban fagayu kafoli yay.

¹⁰ Dewa ban am nababo talun Babilunya at ngay tagfawayan fagayu at nafawayan ayu, at sawad ban sit ngay bale dewa at nabasingan way lang, kanya ban fagayu namawayan yay fia ayu, ay nangirug ay furuan.’ ”

Eremyas Ankubung

¹¹ Gina talun Babilunya at ngay tagfawayan glagyu siginans Erusalem, siginan Igiptu at fun at ngay tagfawayan,

¹² Eremyas nalao wan siginans Erusalem ay nasas Benamin at daga laman nangagbilug at afud fag daga siginan at ngay kalongan.

¹³ Ay Eremyas nu ndasug sa sangay taw Benamin at furuan at sakbawan, Irya, ngay tagulit sakbawan at fun, Selemya at baguama, Kananya at fufu, nagamat anya. Ay kanya nalong anya te, “Ggubuk o ngay taw Babilunya.”

¹⁴ Ay Eremyas gbalus te, “Duan! Au kwa ggubuk ngay taw Babilunya.” Dewa katanya, Irya wa gafanud. Nu katanya, kanya nagamat Eremyas ay nataban sa sangay tagfangguna.

¹⁵ Ay kanya fagayu andotama Eremyas ay nafalang ay naubung sas Yunatan fag tagriruk at bale. Kafag bale kanya fagayu nawat wan laman at fagubungan.

¹⁶ Kanya fagayu nafasakbo Eremyas sa tangabasad fag suluk ay kanya glugo wan nu sanya.

¹⁷ Ay nu glugo wan, fun Sedekya nafauro Eremyas ay nataban sat bale ay ginas ginto anya te, “O e foyungan o siginans Yawi?” Ay Eremyas gbalus anya te, “Sabv, gfagbilug ban emu sas talun Babilunya at fun.”

¹⁸ Sanya ginan, Eremyas nainto sas fun te, “Wain am fagnafaubungun angku? Nataw ku asalanan sa emu, ay sam ngay tagfangguna ay sa sangay taw tagste fag furuan?

¹⁹ Dada wan ay ngay taglong taginsaful te, fun Babilunya ban wa namawayan tuy fag furuan?

²⁰ Nu masine dungugani angku, gfainfanyuan au sa emu te, lag gfafoli ya angku sas Yunatan fag tagriruk at bale aroro kabul kro sanya.”

²¹ Nu katanya, fun Sedekya nasugu te, “Tabani Eremyas sas tagulit at bale at fagmafulan,” ay nasugu yangay te, “Kaduge e tinapay sis furuan, bubai ay foni sas Eremyas.” Nu katanya, Eremyas gbanwan yay gugat si sangay tagulit at fagmafulan fag bale.