Eremyas 36 - Fanawbuid tagsibaliwas Fakayabian

Baruk Natap Yawi at Foyungan

¹ Ebi sis faufatk banwa Yuyakim, Usyas at baguama nu gfunan sis Uda, Yawi nalong sas Eremyas te,

² “Buli sik fagrirukan ay riruki sanya fagayu ku nalong emu sabaliwas Israel, sas taw Uda, ay sas fagayu talun. Riruki fagayu ku nalong emu, siginan ebi taguna ku nalong gina fun Usyas gfunan, dasug katsi.

³ Ngay taw Uda ro manga gubun tua at ngay ugali at mauri nu nadungug te, gfadasug kban sik faurianan. Ay kanya ban fagayu nu naubun tua at ngay ugali at mauri, gfalyam kban at ngay asalanan.”

⁴ Nu katanya, Eremyas nauro Baruk, Nerya at baguama, ay nafoyung sa anya Yawi at ngay longan, ay Baruk nariruk fagayu sa sik fagrirukan.

⁵ Ay Eremyas nalong sas Baruk te, “Nasalag wan nu nansakbo au sas Yawi at bale.

⁶ Nu katanya, gina yud gfangon fag menit laman gdarangin, o yakman lang taglao sanya. Ay ngay taw Uda tagsiginan at ngay furuan nangaful sanya. Ay nantap o Yawi at ngay longan at marirukan ste fag fagrirukan ku nafoyung emu.

⁷ Tiba ginan ban manga, siginan takatanya, kanya fagayu kakbang tua sas Yawi ay gubun tua at ngay ugali at mauri. Aroro Yawi nafararang wan sa anya fagayu te, namaurianan ban anya fagayu aroro maksvn nu kadotama.”

⁸ Ay Baruk nafakamulun Eremyas at suguan sa anya. Kanya natap Yawi at longan sis Yawi at bale.

⁹ Anfasludan takatanya gina yud gfangon fag menit laman gdarangin sis Yawi at daga salubangan, gina sis fasiamk magdanun sis falimak banwa Yuyakim, Usyas at baguama nu gfunan sis talun Uda. Ngay taw Erusalem ay ngay taw tagsiginan sangay furuan tagsis Uda anful sas Yawi at bale.

¹⁰ Baruk natap Eremyas at nafoyung sa anya fag ngay longan at marirukan sit malugde fag fagrirukan sis Yawi at bale munakbang sis Gemarya at suluk. Gemarya sik tagriruk, ay at mama Safan. Ay at suluk sis Yawi at bale sit tungud fag afud bale, munakbang sis dalan tagsat bagu fag sakbawan.

¹¹ Ay Mikaya, Gemarya at baguama, Safan at fufu, nu nadungug Yawi at longan kaduge Baruk gtap,

¹² kanya nalao sas fun at bale daul, sa tagriruk at suluk, ay fagayu tagfangguna maful sanya. Ay sanya yangay Elisama fag tagriruk, ay Delaya, Semaya at baguama, ay Elnatan, Akbur at baguama, ay Gemarya, Safan at baguama, ay Sedekya, Kananya at baguama, ay anggan tiba yak fun.

¹³ Ay Mikaya nafoyung sa sangay taw fagayu at nadungug siginans Baruk at natap.

¹⁴ Nu katanya, at ngay tagfangguna masakit nasugu Yeudi, Netanya at baguama, Selemya at fufu, ay Kusi at fufu tud, laman glao sas Baruk ay glong te, “Bubai sa anya fagayu rirukan at natap sa sangay taw.” Ay Baruk gbuba kafag fagrirukan ay nalao sa sangay tagfangguna.

¹⁵ Ay Baruk nu ndasug wan, ngay tagfangguna nalong sa anya te, “Malunggung o ay tapi sa emi am ba rirukan.” Ay Baruk natap sa anya fagayu at ba rirukan.

¹⁶ Ay kafag ngay tagfangguna nu nadungug fagayu at marirukan, kanya fagayu anlimu ay nadaddaman ay nalong sas Baruk te, “Nanlong tam sas fun tam ngay nadungug.”

¹⁷ Ay kanya fagayu nainto sas Baruk te, “Setain nu griruk o tuy fagayu? O Eremyas nafoyung sa emu?”

¹⁸ Baruk nabalus te, “Sabv, Eremyas nafoyung angku fagayu at marirukan ste fag fagrirukan ay ku fanriruk sik malayung fag fanriruk.”

¹⁹ Ay kanya fag ngay tagfangguna nalong sas Baruk te, “O ay Eremyas nanuksuan am, ay lag am glong sas nusnga sinu te, sanya am.”

²⁰ Kafag ngay tagfangguna nafasas Elisama fag tagriruk at bale kafag rirukan, ay kanya fagayu nasakbo sas fun at bale, ay nafoyung sat fun fagayu at kinfasludan.

²¹ Ay fun nasugu sas Yeudi te, “Namul o kafag rirukan.” Nu katanya, Yeudi nanamul kanya fag rirukan sas Elisama at suluk ay natap sas fun at daga salubangan ay sat ngay tagfangguna at malindug sit day tigyangan.

²² Ginanya at marios fag buknga, ay fun siway at suluk ay malunggung sis day afuy.

²³ Ay Yeudi nu gtap nu siwas fatulu ay sis faufatk talad, fun nabul at fiso sirut ay nagatvng wan sanya ginan fag afud rirukan, ay gukas sasad afuy yakmay kafag rirukan ankamin.

²⁴ Fun ay at ngay tagfangguna wa nlimu at nadungug at marirukan sis fagrirukan. Ay wa nagirat at ngay lanbung laman gfatoglag te, kabalu.

²⁵ Elnatan, Delaya ay Gemarya dewa nafainfanyuan sas fun te, “Nu masine lag girug kafag rirukan,” fun wa nadungugan.

²⁶ Abat ngate, fun nasugu way sat baguama Erakmel, ay sas Seraya, Asriel at baguama, ay sas Selemya, Abdyel at baguama te, “Gamati Baruk fag tagriruk ay Eremyas fag taglong.” Dewa katanya, Yawi nafasuksuan wan duama.

²⁷ Ay fun nu nairug wan Eremyas at nafariruk sas Baruk fag rirukan, Yawi nalong sas Eremyas te,

²⁸ “Nandog yap o namul sik fagrirukan ay nandog yap o nanriruk fagayu at marirukan si taguna fag fagrirukan, Yuyakim, Uda at fun at nairug.

²⁹ Sanya ginan, nanlong o sas fun te, ‘Katatuy ku longan: Nairug o kafag rirukan, aroro marirukan sanya te, talun Babilunya ban at fun nanrasras wan tuy fag talun, ay gfabul ban iste fag ngay taw ay fag ngay fagbaugun.

³⁰ Nu katanya, katatuy ku longan sabaliwa emu, Yuyakim, Uda at fun: Wa ban o e sugfun ya at nanfunan sas Dabid at fagfagtainanan. E gfabul ban emu ay gukas am bilug ay katimrang sat masugba fag baksak ay gadamugun nu nyabi.

³¹ Gfaurianan kban ayu talamean, anggan ay ngay tagfangguna aroro sa ay fagmauriun. Gfadasug kban sa ayu ay sa sangay taw Erusalem ay sa sangay taw Uda fagayu faurianan ku nalong laman sa ayu aroro wam nadungugan angku.’ ”

³² Nu katanya, Eremyas nadog yay nabul sadi yak fagrirukan ay nafon sas Baruk, ay Baruk nariruk Eremyas at nalong fagayu, kata at nariruk si taguna fag fagrirukan fun Yuyakim at nairug. Ay Eremyas e nafamut yay at rirukan, arvs kata yay taguna fag rirukan.