Eremyas 35 - Fanawbuid tagsibaliwas Fakayabian

Ngay Taw Rekab

¹ Ebi, gina Yuyakim, Usyas at baguama gfunan sis Uda, Yawi nalong sas Eremyas te,

² Loi sas Rekab at ngay talananan ay nanlong o sa anya fagayu te, Loi ay sakboi sa sik suluk si ku bale ay namainum o sa anya fagayu fanlangu.

³ Nu katanya, nalao au sas Aasanya, (Kanya sik taw at ngayan yangay Eremyas at baguama, ay Eremyas, Kabasinya at baguama) ay sat ngay faduksay ay sat ngay sisian. Kanya fagayu ngay taw Rekab at ngay talananan.

⁴ Sanya ginan, nataban au anya fagayu sas Yawi at bale, sas Anan at ngay baguama at ngay suluk. Kanan, Igdalya at baguama, Dius at fagsuguan. Kanya fag suluk sis aturunan ngay tagfangguna at ngay suluk ay sis tungud Maaseya, Salum at baguama, at suluk fag tagulit Yawi at bale at sakbawan.

⁵ Ay sanya ginan, natalin au fanlangu sa sangay fagsuadan ay sa sangay taya ay nafatungkud au sa sangay taw Rekab at daga salubangan, ay nalong au sa anya fagayu te, inumi wan.

⁶ Dewa katanya, kanya fagayu nabalus angku te, “Wami ginum fanlangu. Em mangaguyang Yeunadab, em funan Rekab at baguama nasugu emi te, ami ay em gaban wa mi ginum fanlangu.

⁷ Ay nasugu yangay emi te, ‘Lag am kawat ay ngay bale ay lag gtanum nusnge wain fag ngay fananum ay anggan at ke wat. Ay fagbanwanan bale ramit yakman. Nu gfaning tua ban am takatanya, ngaduge tua ban nu gleleg am dewa nday fag talun nu gbanwan am.’

⁸ Nafaning ami em mangaguyang Yeunadab at ngay suguan sa emi. Ami ay em ngay mangena ay em ngay sisian wami ginum fanlangu,

⁹ ay wami nawat em ngay bale, ay wami batang gtanum wat ubas.

¹⁰ Nabanwan ami sa sangay bale ramit ay nafaning ami em mangaguyang Yeunadab at suguan fagayu sa emi.

¹¹ Dewa katanya, gina fun Nabukudunusur, Babilunya at fun nanamawayan ste sfuruan, anlimu ami maksvn ngay taw Babilunya ay taw Aram at ngay tagfawayan, nu katanya, ansadi ami te, glagyu wami sas furuan Erusalem. Kanya wan katsi em fagbanwanun iste fag furuan Erusalem.”

^12-13 Yawi at Mabalyanan, Israel at Dius, nalong yay fia sas Eremyas te, “Loi sa sangay taw Uda ay sa sangay taw Erusalem, ay nanlong o sa anya fagayu te, ‘Wain ay fagyudun gdungugan ku ngay suguan ay ay fagyudun gfaning ku ngay longan sa ayu?

¹⁴ Yeunadab, Rekab at baguama, nafararang sat ngay gaban te, lag ginum fanlangu, ay at ngay gaban nafaning tua. Ay dasug katsi, kanya fagayu wa ginum fanlangu aroro gfaning tua at mangaguyang Yeunadab at suguan. Dewa katanya, am, wam nafaning angku, dewa ngayu ginan nu glong au sa ayu

¹⁵ siginan ku ngay taglong. Ay ku ngay fagsuguan fag ngay taglong dewa glong gugat ayu te, “Ubuni wan ay ngay ugali at mauri, ay tubusi wan ay famanwanun, ay lag gseg ya sa tibak fagsegan, laman ban gbanwan tuam gugat si ku nafon sa ayu fag daga,” wam gafanud ay gfaning angku.

¹⁶ Yeunadab at ngay kasugfunanan, Rekab at ngay baguama, nafaning tua at ngay suguan. Dewa katanya, am wam nafaning angku.’

¹⁷ “Nu katanya, au, Yawi at Mabalyanan, Israel at Dius, glong au te, dungugani! Am tagbanwan sis Uda ay sis furuan Erusalem, namadasug kban sa ayu ku nalong fag faurianan. Nafakamatoan koma fia ayu ay wam gdungugan, ay nauro koma ayu, ay wam nabalus.”

¹⁸ Ay Eremyas nalong sa sangay taw Rekab te, “Yawi at Mabalyanan, Israel at Dius, glong te, ‘Nafaning tuam ay mangaguyang Yeunadab at suguan fagayu,

¹⁹ nu katanya, nafatuyanan au te, Yeunadab, Rekab at baguama e gaban tua ban gugat at namakamulun laman sa angku. Au, Yawi at Mabalyanan, Israel at Dius taglong tuy.’ ”