Eremyas 34 - Fanawbuid tagsibaliwas Fakayabian

Famararang sas Sedekya

^1-2 Nabukudunusur, talun Babilunya at fun, nanamawayan furuan Erusalem ay anggan tagsit ligung fag ngay furuan. Kanya gadgaloan fagayu at ngay tagfawayan ay anggan ngay tagfawayan tagsiginan at fagagbilugun fag ngay fagfagtainanan. Ay ginanya, Yawi, Israel at Dius, nalong sas Eremyas te, “Loi sas Sedekya, Uda at fun, ay nanlong o sa anya te, ‘Yawi glong te, Namon kwan sas talun Babilunya at fun tuy fag furuan daul ay kanya nangirug.

³ “ ‘Wa ban o malagyu ya sanya ginan. Nanggamat ban emu ay namon sas Babilunya at fun. Ay gtaban ban emu sit daga salubangan laman namauri, ay nantaban emu sas talun Babilunya.

⁴ Dewa katanya, fun Sedekya, dungugani ku fatuyanan sa emu: wa ban o kabul sis awayan,

⁵ nu bunway manabayan tua ban nu kabul o. Am fagfunanun ban fag ngay taw nangirug ngay famaebebanglu laman famauseganan emu, kata at nafakamulun nu gfoli am ngay mangaguyang fag ngay fun. Kanya ban fagayu nanmaful laman nangamatang emu ay glong te, “Em fun anbul wan!” Au, Yawi, taglong tuy.’ ”

⁶ Sanya ginan, Eremyas nasas Erusalem ay nananlong sas fun Sedekya takatanya fagayu.

⁷ Ginanya Babilunya at fun ay at ngay tagfawayan nafawayan wan furuan Erusalem, ay Lakis ay Aseka. Nafawayan kanya fag ngay furuan aroro kanya way lang at sawad fag ngay furuan at ke ngay dingding alad.

Nu Gfalfas ngay Fagsuguan

⁸ Yawi e nalong yay fia sas Eremyas gina fun Sedekya nawat sik nasadian sa sangay taw Erusalem sabaliwa nu gfalfas ngay fagsuguan.

⁹ Fun Sedekya nasugu te, “Fagayu at ke fagsuguan Ebreu mangena man ay mangama, masine nu gfalfas wan anya fagayu. Wa masine sik taw Udyu nu gfagsuguan gugat at kaiban fag taw Udyu.”

¹⁰ Ay fagayu taw ay anggan ngay tagfangguna naylat takatanya fag nasadian, ay kanya fagayu nafalfas at ngay fagsuguan, fag ngay mangena ay fag ngay mangama.

¹¹ Dewa katanya, kanya fagayu nafabali at ngay amatanganan ay gdog yay nafagsuguan at nafalfas fag ngay fagsuguan.

^12-13 Nu katanya, Yawi, Israel at Dius, nalong sas Eremyas te, “Ebi gina au gfalfas ay ngay mangaguyang siginans talun Igiptu, sit fagafagsuguanan fag talun, nawat au sik nasadian sa anya fagayu. Ay nalong au sa anya fagayu te,

¹⁴ ‘Galay ban sis fafituk banwa, masine nu gfalfas am ay kaiban fag ngay taw Udyu at nafabayad sa ayu laman ay fagsuguan. Masine nu gfalfas am anya nu ntabu gfakamulun sa ayu kaduge unumk banwa.’ Dewa katanya, ay ngay mangaguyang wa nafaning ku longan.

¹⁵ Naubun am ay ngay asalanan ay nafakamulun am at matuyan sa ku daga salubangan. Fagayu am naylat am gfalfas ay ngay fagsuguan fag ngay taw Udyu. Ay nawat am ay nasadian sa angku sabaliwa takatatuy si ku bale nu inda at fagnamauseganan angku.

¹⁶ Dewa katanya, nafabali wayam ay ngay amatanganan ay nafae fakaplaun am angku. Nadog yayam nafagsuguan ay ngay fagsuguan ay kaiban fag ngay taw Udyu takaylat kalfas, ay nafabulun am anya fagayu nu gdog nangasik ngay fagsuguan.

¹⁷ “Nu katanya, au, Yawi, glong au te, aroro wam nafaning angku ay wam nafalfas ay ngay fagsuguan ay ngay kaiban fag ngay taw Udyu, namalfas au ayu laman kabul am sas awayan, sas fanlunus ay sas fakasaitun. Ay namasik masuya au ayu sas fagayu fagfagtainanan at daga salubangan sas fagdaul daga.

^18-19 Fagayu tagfangguna sis talun Uda ay sis furuan Erusalem, ay fagayu tagfangguna sis fun at bale, anggan ngay tagfon fanggalangun ay fagayu taw ansadi sa angku, ay kanya fagayu nawat sik nasadian sa angku siginan nu gbaltak fagbaugun riangan, ay galay at sadi nalao sasad wabilug. Dewa katanya, kanya fagayu wa nafaning at marirukan sit nawat fag nasadian, nu katanya, namakamulun au sa anya fagayu kata nu gbaltak fagbaugun riangan.

²⁰ Ay gfon kban anya fagayu sa sangay taw takaylat gfabul anya fagayu. Ay at ngay bilug ban umsik fakonun sa sangay manuk tungud ay sa sangay mangilafang tagsis talun.

²¹ “Ay namon kban Sedekya, Uda at fun, ay at ngay tagfangguna sat fawayan, talun Babilunya at fun at ngay tagfawayan. Ay kanya ban fagayu dewa nafaragang wan nu gfawayan ayu,

²² gsugu kyay ban anya fagayu laman namadog namawayan, nangagbilug, ay nangirug ayu. Fagayu ban furuan sis Uda namasik mabaluanan au ay wa ban e gbanwan ya.”