Eremyas 33 - Fanawbuid tagsibaliwas Fakayabian

At Fatuyanan fag ngay Famonun

¹ Ay Eremyas, gina yay sis fagubungan si sangay tagulit fun at bale at fagmafulan, Yawi naringang sa anya at fadua ginan.

² Kanya glong te, “Au at nawat fagdaul daga, ku ngayan Yawi.

³ “Darangini sa angku ay gbalus au emu, ay namoyung au sa emu nusnga setaw at madulo ay at masuksuk am fagyudun yay saful.

⁴ Aroro au, Yawi, Israel at Dius, glong au te, dewa ban narufa wan ngay bale sis furuan Erusalem ay talun Uda at fun at bale, laman at famaogat at alad laman at ngay fawayan wa masakbo,

⁵ ngay taw Babilunya ban masakbo way. Ngayu ban takabul ste fag furuan, ay aroro maksvn nu kadotama au ayu, nangiklas kwan ay furuan. Gtalyuyan kwa ban tuy fag furuan aroro sat fagmauriun.

⁶ “Dewa katanya, sik menit ban namadasug au fagmafianun stae fag furuan daul ay sat ngay tagbanwan. Ay kanya ban fag ngay taw nu gbanwan maramraman tua ay manabayan.

⁷ Namauli kwan ngay taw Israel ay ngay taw Uda siginan at fagatabananan, ay namawat kyay ban gayvd at furuan daul kata ebi.

⁸ Namasine kban anya fagayu ay namalyam at ngay asalanan at nafakamulun sa angku.

⁹ Ay nu nfasludan ban takatanya, furuan Erusalem ban gfauseganan angku. Ay fagayu ban talun sas fagdaul daga gtadtaruyan kalimu nu nadungug te, furuan Erusalem e fagmasineun wan, ay maramraman, ay e fagmanabayanun siginan angku.”

¹⁰ Yawi glong yangay fia te, “Glong am te, mabalu way lang talun Uda ay furuan Erusalem aroro we taw ay we fagbaugun ya tagbanwan sanya. Dewa katanya, sik menit ban gdog yay kadungug sanya fag ngay furuan nu gfanagsag ay nu guseganan.

¹¹ Ay gdog yay ban kadungug nu e guseganan sabaliwa at bagu kadadwa ay siginan tagbuba famauseganan fag fanggalangun sas Yawi at bale. Kanya ban fagayu glong te, ‘Guseganan tam sas Yawi at Mabalyanan aroro kanya matuyan. Ay nu kesug di e fakatabuan.’ Anud, ngay taw ban guseganan aroro namafoli kban fagmanabayanun stie fag daga kata ebi taguna. Au, Yawi, taglong tuy.”

¹² Yawi at Mabalyanan nalong yay fia te, “Katsi kanya fag talun dewa mabaluanan way aroro we taw ay we fagbaugun ya tagbanwan sanya, sik menit ban umke ngay fagnamafangonan sas fagayu furuan laman ngay tagalaga fagbaugun at fagnamafangonan at ngay fagbaugun.

¹³ Ay umkayu ban ngay fagbaugun tagsi sangay buksul fag ngay furuan, sis fakayabian fag ngay fun buksul, sis talun Negeb, sis taw Benamin at daga, si sangay furuan tagsis ligung Erusalem, ay sis Uda fag ngay furuan. Au, Yawi, taglong tuy.”

¹⁴ Yawi nalong yangay fia te, “Sik menit ban namafasludan au ku nafatuyanan fag fagmasineun sa sangay taw Israel.

¹⁵ Ay ginanya ban, namae funan kban at ke fagmatuyanun tagsiginans Dabid at kasugfunanan. Kanya ban namafagdaul fagmasineun ay fagmatuyanun stie fag daga.

¹⁶ Ay ginanya ban, ngay taw Uda umlangfe ay ngay taw Erusalem gbanwan manabayan. Ay gfangayan ban furuan Erusalem te, ‘Yawi wan Tam Fagmatuyanun.’ ”

¹⁷ Yawi nalong yangay fia te, “Dabid ban e kasugfunanan tua gugat at nanfunan ngay taw Israel.

¹⁸ Ay e ngay tagfon fanggalangun tua ban gugat tagsiginans Lebi at kasugfunanan at namakamulun laman sa angku, ay at namon ngay fagirugun fag ngay fanggalangun, ay gutluan fag fanggalangun, ay tiba yak fanggalangun.”

¹⁹ Yawi nalong sas Eremyas te,

²⁰ “Nu setain nu yud e mafabali ku nasadian sas menit ay sas yabi, laman menit ay yabi gduksun tua si ku nafalganan fag buknga,

²¹ katanya yangay, wa ban ginbalian ku nasadian sa ku fagsuguan Dabid. E fun tua ban gugat tagsiginan at kasugfunanan. Ay anggan ban Lebi at ngay kasugfunanan fag ngay tagfon fanggalangun namakamulun tua gugat sa angku.

²² Namayu kban Dabid ay Lebi at ngay kasugfunanan kata ngay galeme sis banwa ay ngay lagnas sis tigyangan dagat.”

²³ Yawi nalong yangay sas Eremyas te,

²⁴ “O wo nadungug kafag ngay taw nu glong te, ‘Yawi naiyan wan at nafili fag duak fagfagtainanan.’ Nu katanya, kanya fagayu gfalingun ku nafili fag ngay taw ay wa glong ya te, kanya fagayu sik talun at ngay taw.

²⁵ Dewa katanya, kwa ban gfabali ya ku nasadian sas menit ay sas yabi, ay ku faugali laman sas banwa ay fagdaul daga,

²⁶ ay katanya tua ban gugat ku nasadian sas Akub ay sa ku fagsuguan Dabid at ngay kasugfunanan. Nanfili kban siginans Dabid at kasugfunanan laman at nanfunan sas Abrayam, Isak, ay Akub at ngay kasugfunanan. Ay kafanyu kban anya fagayu ay gfafoli sat fagbanwanan siginan at fagatabananan.”