Eremyas 32 - Fanawbuid tagsibaliwas Fakayabian

Eremyas Nabayad sik Gamasun

¹ Yawi naringang sas Eremyas, gina sis fasafuluk banwa fun Sedekya nu gfunan sis Uda, ay gina sis falabi waluk banwa Nabukudunusur nu gfunan sis talun Babilunya.

² Ginanya, talun Babilunya at ngay tagfawayan nanamawayan furuan Erusalem, ay Eremyas fag taglong maubungan sis talun Uda at fun at bale daul, si sangay tagulit at fagmafulan.

³ Fun Sedekya naubung anya aroro sat nafoyung. Eremyas nalong te, “Katatuy Yawi at longan: Gfon kban ay gfagbilug tuy fag furuan sas talun Babilunya at fun.

⁴ Ay fun Sedekya ban wa malagyu ya siginan sangay taw Babilunya, abat ngate, nantaban ban anya sas talun Babilunya at fun at daga salubangan laman nanginsaful anya.

⁵ Namataban kban fun Sedekya sas talun Babilunya ay kanya ban gbanwan sanya yakmay ban antabu gfaurianan anya. Dewa ban am gfawayan ngay taw Babilunya, wa ban am gbabo. Au, Yawi, taglong tuy.”

⁶ Eremyas nalong yay fia te, “Yawi nalong sa angku te,

⁷ Nangakbang ban sa emu am lagbe Kanamel, am mai Salum at baguama, ay glong ban sa emu te, ‘Bayadi wan ku daga sis Anatut, aroro o wan at munakbang ku kalongan, nu katanya, o wan at masine gbayad ku daga.’ ”

⁸ Ay kata Yawi at longan sa angku, ku lagbe Kanamel ankakbang sa angku sa sangay tagulit fun at bale at fagmafulan. Kanamel nalong angku te, “Bayadi wan ku daga sis Anatut sis Benamin at kasugfunanan at talun. O wan at masine gagbilug ku daga, nu katanya, bayadi wan.” Ay nasaful au te, Yawi wan at ke fakaylatun takatanya.

⁹ Nu katanya, nabayad au Kanamel at daga, ku famayad labi fituk salapi.

¹⁰ Kanya nariruk at ngayan ay nafae famatoglag sis nasadian fag fafil laman gbayad kanya fag daga sis salubangan ngay tagfatuyan, ay kanya nafabudbungguan ku famayad fag salapi.

¹¹ Sanya ginan, nabul au at ke famatuyan fag nasadian ay at yud e famatuyan fag nasadian nu inda nu marirukan em nasadian te, nabayad kwan kafag daga.

¹² Ay nafon au kafag nasadian sas Baruk, Nerya at baguama ay Makseya at fufu, sis Kanamel at daga salubangan ay si sangay taw at kinriruk at ngay ngayan, ay sis salubangan ngayuk taw Udyu at malunggung si sangay tagulit at fagmafulan.

¹³ Ay si sangay taw at daga salubangan nalong au sas Baruk te,

¹⁴ “Yawi at Mabalyanan, Israel at Dius, glong te, ‘Buli at ke famatuyan fag nasadian anggan at yud e famatuyan fag nasadian ay suadi sa sik tikung laman ban ngaduge tua nu yud karasras.’

¹⁵ Aroro ste ban fag talun at ngay taw gdog yay gbayad at ngay ramraman. Kanya ban fagayu gfalao at ngay bale, ay at ngay gamasun anggan at ngay tanuman ubas.”

¹⁶ Ay nu nafon kwan em nasadian sas Baruk, Nerya at baguama, nadarangin au te,

¹⁷ “Yawi, em Fun, nawat o banwa ay daga siginan am fagmabalyananun. Mafakamulun o fagayu nusnge wain.

¹⁸ Nafalag o am fakafanyun sas ngayuk libuk taw, dewa katanya, gfaurianan o at ngay sisian aroro sat ngay fagtainan at ngay asalanan. Dius mabalyanan o, am ngayan Yawi at Mabalyanan.

¹⁹ At kasine am ngay algan, ay at kadulo am ngay nafakamulun. Glag way o fagayu taw at nafakamulun ay gfasud o ngay taw kata at ngay ugali ay at nafakamulun.

²⁰ Nafakamulun o nusnge wain at madulo sis talun Igiptu, ay gfataglayun o gfakamulun takatanya anggan iste stalun Israel ay sa tibak talun. Ay siginan takatanya, andungug o sas fagayu talun.

²¹ Ay siginan am ngay nafakamulun at madulo ay sam fagmabalyananun, ngay taw Igiptu anlimu, ay nafalfas o am nafili fag ngay taw Israel siginans talun Igiptu.

²² Ay nafon o sa anya fagayu sik talun at masine ay at maramraman, am nafatuyanan sat ngay mangaguyang.

²³ Ay kanya fagayu nagbilug kanya fag daga, dewa katanya wa nafaning emu ay am ngay suguan, ay wa nafakamulun am suguan sa anya fagayu te, fakamuluni. Nu katanya, nafadasug o faurianan sa anya fagayu.

²⁴ Ay katsi, ngay taw Babilunya gfabungsud lutuk si sangaba tigyangan dingding alad furuan Erusalem laman ro kanya fagayu masakbo ay magbilug kanya fag furuan. Aroro siginan sangay awayan, fanlunus, ay fakasaitun, ngayu at kinbul ay ngay taw Babilunya naago kafag furuan kata am longan.

²⁵ Ay dewa anfasludan takatanya, o wan at nasugu angku laman namayad au kafag daga sis salubangan ngayuk tagfatuyan, ngay taw Babilunya dewa ganangagbilugun wan tuy fag furuan.”

²⁶ Sanya ginan, Yawi nalong sas Eremyas te,

²⁷ “Au Yawi, fagayu taw at Dius. O nunda e fagyudun au mafafakamulun nusnge wain?

²⁸ Nu katanya, amatangani, namon kwan tuy fag furuan sa sangay taw Babilunya ay sat fun Nabukudunusur, ay kanya ban fagayu gagbilug wan tuy fag furuan.

²⁹ Ay kanya ban fagayu girug wan tuy fag furuan, anggan at ngay bale ke ugun at madatag nu inda ste fag ngay taw nafae fakadotamaun angku siginan nu girug at famaebebanglu fag ngay fanggalangun laman sas Baal fag fagsegan ay anggan nu gfon fanginum fag fanggalangun sa tiba yak fagsegan.

³⁰ “Au, Yawi, glong au te, siginan ebi, ngay taw Uda ay ngay taw Israel at nafakamulun mauri way. Kanya fagayu nafadotama angku siginan at nafakamulun mauri.

³¹ Siginan nu kawat tuy fag furuan ay dasug katsi tuy fag ngay taw nafadotama angku. Nu katanya, nangiklas kwan tuy fag furuan.

³² Ngay fun, ay ngay tagfangguna, ay ngay taglong, ay ngay tagfon fanggalangun tagsiginans Israel ay Uda nafadotama angku siginan nu gfakamulun at mauri.

³³ Kanya fagayu anyayu siginan angku dewa au gfoyung gugat sa anya fagayu. Ay kanya fagayu wa kaylat ay wa gdungugan at matuyan.

³⁴ Kanya fagayu nafasuya ku bale nu inda at fagnamauseganan angku. Ay nafasakbo sanya tibak fagsegan at maksvn nu mauri.

³⁵ Kanya fagayu nawat sik bale laman at fagnansegan Baal sis datag Ben-Inum ay sanya yangay nu namon at ngay sisian sas Mulek fag fagsegan. Kwa nasugu sa anya fagayu takatanya, ay kwa yangay e algan te, kanya fagayu gfakamulun takatanya fag fagmauriun at nafae asalanan ngay taw Uda.”

³⁶ Yawi nalong sas Eremyas te, “Matuyan am nalong te, gfon ban sas Babilunya at fun tuy fag furuan siginans awayan, fanlunus ay fakasaitun. Nu katanya, katsi, au, Yawi, Israel at Dius, glong au te,

³⁷ namaful kban ku ngay taw siginans fagayu talun nu inda ku fagfasaruayanan anya fagayu. Ay nantaban kban anya fagayu stae fag furuan ay kanya ban fagayu gbanwan manabayan.

³⁸ Ay gtuyan kban anya fagayu te, ku ngay taw, ay au ban at Dius.

³⁹ Ay namasadi kban at ngay amatanganan ay at ngay algan laman ban kanya fagayu gseg tua gugat angku, ay laman ban kanya fagayu ay anggan at ngay kasugfunanan e fagmanabayanun tua.

⁴⁰ Ay nangawat kban sik nasadian sa anya fagayu te, gfakamulun ktua ban gugat at masine sa anya fagayu. Ay namoyung kban anya fagayu nu setain nu gsuyu angku laman ban kanya fagayu wa kayayu ya siginan angku.

⁴¹ Kaylat au namakamulun sa anya fagayu at masine ay sas fagdaul ku amatanganan namabanwan au anya fagayu stie fag talun.”

⁴² Yawi nalong yangay fia te, “Nu setain nu gfadasug au faurianan sa kafag ngay taw, namadasug kyangay ku nafatuyanan fag fagmasineun sa anya fagayu.

⁴³ Ay ste ban fag talun gdog yay gfabayad at ngay gamasun, katsi dewa mabaluanan ay we gbanwan ya dewa taw ay fagbaugun aroro nafon wan kanya fag daga sa sangay taw Babilunya.

⁴⁴ “Ay sanya ban fag talun gdog tua e gfabayad at ngay gamasun ay kawat at ngay nasadian ay gfae famatuyan, ay e ngay tagfatuyan ban sit ngay nasadian. Katanya ban at fakamulun sas Benamin at daga, ay sa sangay daga at maligung sis Erusalem, ay sis Uda fag ngay furuan, ay sa sangay buksul ay sa tangayu fag buksul tagsis fakayabian ay anggan tagsis Negeb fag ngay daga. Umfasludan ban takatanya aroro namafoli kban ku ngay taw sat talun siginan at fagatabananan. Au, Yawi, taglong tuy.”