Eremyas 30 - Fanawbuid tagsibaliwas Fakayabian

Yawi at ngay Fatuyanan sat ngay Taw

^1-2 Yawi nalong sas Eremyas te, “Au Yawi at Mabalyanan, Israel at Dius, glong au sa emu te, riruki sa sik fafil fagayu ku nalong sa emu.

³ Aroro kadasug wan at buknga nu gfafoli au ku ngay taw Israel ay ngay taw Uda siginan at fagatabananan. Ay namafoli kban anya fagayu sa ku nafon sat ngay mangaguyang fag talun.”

^4-5 Katatuy yangay Yawi at longan sabaliwas Israel ay sas Uda: “Umdungug ban ngay taw nu gudguroan aroro sat maksvn fag fakalimuun, abat ngate, guseganan.

⁶ E fagintoun au sa ayu. O batang wam e nalag sik mangama tagfasalug? Ay wain ku fagelaganun at mabitsug fag ngay mangama takalaksi wan, ay tagted at ungdan kata sik mangena tagafasalugun?

⁷ Ay ginanya ban fag buknga maksvn nu malimu, ay wa ban e kaksvn nya kanya nu malimu. Ginanya ban Akub at ngay kasugfunanan gidapan, dewa katanya, sa ban taguyan kanya fagayu umlangfe yay sanya ginan fag fagidapun.

⁸ Au, Yawi at Mabalyanan, glong au te, ginanya ban, kanya fagayu wa gdog ya nangafagsuguanan tibak talun. Nanggatvng kwan fantungud liug tagsit ngay tungud liug ay nanluas kwan fansiuk anya fagayu fag salambitan.

⁹ Kanya ban fagayu nu gfakamulun sa tua angku, aroro au, ay Dius Yawi, nanfili au sik fun siginans Dabid at kasugfunanan laman at nanfunan anya fagayu.

¹⁰ Ku fagsuguan Akub at ngay kasugfunanan, lag am kalimu ay kamomuy. Au, Yawi, glong au te, namul kban ayu siginan tangayayu fag talun nu inda nu gatabanan am. Ay gina ban am anfoli, manabayan tuam, ay wa ban e kasalag ya ayu, ay wa ban am e fakalimuun ya.

¹¹ Gufud ktua ban ay gfalangfe ayu. Ay grasras kban fagayu talun nu inda nu gfasaruayan au ayu, dewa katanya kwa ban gfakamulun sa ayu takatanya. Ay bunwa at masuad te, kwa ban gfaurianan ya ayu, nu bunway gfalag au sa ayu at matuyan.”

^12-13 Yawi nalong yay fia sat ngay taw te, “Maksvn wan ay ngay bangbang ay wa ban kafia ya. Wa ban e mananggubuk ay manamafia ayu. Ay wa yangay e famafia ya laman sa ayu.

¹⁴ Ay fagudgubukan ban fag ngay talun wa gamatang ya ayu, ay wa ban kasalag ya ayu. Nafawayan au ayu kata ay fawayan nu gfawayan. Maksvn ku faurianan sa ayu aroro maksvn wan ay ngayu ay asalanan.

¹⁵ Lag am gfandeng te, ‘Wa ban kafia ya em ngay bangbang.’ Nafaurianan au ayu aroro maksvn wan ay ngayu ay asalanan.

¹⁶ Dewa katanya, namaurianan kyangay ban at nafauri ayu, ay fagayu ban ay fawayan gatabanan. E namawayan yangay ban fagayu at nafawayan ayu, ay at nabul ay ngay fagagbilugun, e gbul yangay ban siginan anya.

¹⁷ Ay gfafia kban ay ngay bangbang, tibak taw dewa nalong te, nafabayan wan ay naiyan ayu fag ngay taw Erusalem. Au, Yawi, taglong tuy.”

¹⁸ Yawi nalong yangay te, “Namafoli kyay ban sas Akub at kasugfunanan at ngay furuan at ramraman, ay kafanyu kban anya fagayu. Ay gdog kyangay ban kawat ngay furuan ay at ngay bale tangabat si ebi ataw at fakawatan.

¹⁹ Ay kanya ban fagayu galubad gfauseganan ay guro guseganan. Gfayu kban ay gfauseganan anya fagayu.

²⁰ At ngay sisian ban umsik maramraman kata ebi taguna. Gfaksvn kban anya fagayu si ku daga salubangan, ay gfaurianan kban nusnga sinu tagfalingun anya fagayu.

²¹ Siginan yay ban at gaban at tagfangguna. Gfakbang kban anya sa angku, ay kanya ban kakbang sa angku. Aroro nusnga sinu we manamaskud nangakbang sa angku, kway nalong te, ‘Akbangi.’ Au, Yawi, taglong tuy.

²² Kanya ban fagayu ku ngay taw ay au ban at Dius.”

²³ “Dungugani! Ku dotama kata sik fulug tagbaribungan nu gfalang sik taw mauri at alfuyu.

²⁴ Nu kadotama au wa kalyam yakmay au nafafasludan ku fakaylatun gfakamulun. Ay sa ban taguyan fag menit, sumaful yayam takatanya.”