Eremyas 3 - Fanawbuid tagsibaliwas Fakayabian

¹ Sik mangama nu naiyan wan at bubay ay at bubay nu nanangadadwa wan sa tibak mangama, kafag mangama wa masine ya gbul at bubay, aroro takatanya fag mangena gfasuya fagdaul talun. Nu katanya, am fag ngay taw Israel kata yangay am takamatugtug fag mangena. Kesug am ngayuk fagsegan. Ay takaksvn nya ay nafakamulun at mauri, tain nu manangafoli am sa angku? Au, Yawi, taglong tuy.

² Damai fia sis talun at yud e taw fag ngay tagbudbuksulanun. O nunda e ngay buknga yay sanya ay yud nafasuya? Nafasuya am ay talun. Kata am takamatugtug fag mangena tagmalunggung gugat sis day dalan laman gfanya mangama, ay kata am at mauri fag taw tagfanya at fagfauriun fag taw sis talun at yud e taw. Nafasuya wam ay daga aroro sa ay fagmauriun, ay sa nu gseg am tibak fagsegan.

³ Kanya wan at fagyudun ya karak dewa abagat. Dewa katanya, kamaogatun yayam ay amatanganan kata sik mangena takamatugtug at yud kapla ya.

⁴ Ay katsi glong am sa angku te, ‘Em Mama, o wan em fagadgalangan siginan nu masisian ami.

⁵ O nunda kadotama yay o gugat emi? Seduge tua ban nu kadotama o emi?’ Dewa am glong takatanya, at matuyan mauri way ay fakamulun.”

Uda Nafaning Israel

⁶ Gina Usyas gfunan, Yawi nalong sa angku te, “O nalag o at yud matuyan fag ngay taw Israel at nafakamulun? Kanya fagayu naseg tibak fagsegan si tangabat fag ngay buksul, ay si sangay fun kayu at marabung at lanbung. Kanya fagayu kata sik takamatugtug fag mangena.

⁷ Nu glong kro, kanya fagayu nu ddi gfakamulun ya takatanya, kafoli wan sa angku, ay aroro mangaro, duan. Ay takamabo fag ngay taw Uda nalag at faduksay fag ngay taw Israel takamabo at nafakamulun.

⁸ Nafasaruayan kwan ay naiyan siginan angku ngay taw Israel, aroro kanya fagayu gfanugtug siginan nu gseg tibak fagsegan. Dewa katanya, nalag au te, takamabo fag ngay taw Uda wa nlimu ku nafakamulun, abat ngate, kanya fagayu gfanugtug yangay.

⁹ Ngay taw Israel nafasuya at furuan siginan nu gseg tibak fagsegan at mawatan siginan gang ay kayu. Kanya wa nasalagan nu gseg tibak fagsegan.

¹⁰ Dewa katanya, kanya fagayu nu kafoli sa angku bunwa sas fagdaul at amatanganan, gfalagan way. Au, Yawi, taglong tuy.”

¹¹ Sanya ginan, Yawi nalong sa angku te, “Dewa ngay taw Israel yud matuyan sa angku, kanya amatuyan yap tua takamabo fag ngay taw Uda.

¹² Katsi loi wan ay foyungi sas Israel takatatuy fag foyungan: ‘Yawi nalong te, Am fag ngay taw Israel takamabo, afolii wan sa angku, aroro mafangafanyu ktua, ay kabavn ban kdi kadotama ya ayu.

¹³ Longi way lang te, “Nafamabo ami emu, Yawi em Dius, ay nafaning ami tibak fagsegan siginan nu naseg ami si sangay fun kayu at marabung at lanbung.” Ay longi yangay te, “Wami nafaning emu.” Au, Yawi, taglong tuy.’ ”

¹⁴ Yawi glong yay fia te, “Ku ngay sisian takamabo, afolii wan sa angku, aroro am wan ku ngay taw. Gfili kban at sadi ay mannga dua siginan ay mesa gaban ay nantaban kban sas Erusalem.

¹⁵ Ay nanfili kban sik tagfangguna at ke fagsafulun ay at mamatanganan laman at namangguna ayu.

¹⁶ Au, Yawi, glong au te, gina ban am ankayu sanya fag talun, wa ban am gkamatoan ya ay gamatang sabaliwas Fagsuadan Nasadian. Ay wa ban am namadog ya nangawat.

¹⁷ Ay ginanya ban e gfangayan Erusalem te, ‘Yawi at fagbanwanan.’ Ay fagayu ban talun at taw nangaful sanya laman namauseganan angku. Ay kanya ban fagayu wa kamaogatun ya ay wa mauri ya at ngay amatanganan.

¹⁸ Ginanya ban, ngay taw Uda ay ngay taw Israel gadgaloan siginans fawalan fag alvngvdan siginan at fagatabananan ay kafoli sa ku nafon sat ngay mangaguyang fag talun laman at fagagbilugun.

¹⁹ Ay guseganan kban glong te, ‘Am wan ku ngay sisian ay gfon kban sa ayu sik talun at masine, sik masine fia fag famonun sas fagdaul daga.’ Nu glong au, gngayan ban am angku te, ‘Mama’ ay wa ban am kasaruayan ya siginan angku.

²⁰ Dewa katanya, ngay taw Israel natalyuyan angku, kata sik mangena at naubun at indugan. Au, Yawi, taglong tuy.”

²¹ Sis talun at yud e taw fag ngay tagbudbuksulanun, ngay taw Israel gwayway gfainfanyuan aroro kanya fagayu anyayu ay nalyam angku.

²² “Ku ngay sisian takamaogatun, afolii wan sa angku, ay gfalyam au ay natalyuyanan angku.” Ay kanya fagayu gbalus te, “Agvd, namaning wami emu aroro o wan em Dius Yawi.

²³ Anud nasalan ami siginan nu nanseg ami ngay fagsegan sa sangay tungud buksul. Yawi em Dius, o way lang ngay taw Israel at tagfalangfe.

²⁴ Siginan nu sisian ami nasaful wami te, fagayu em mangaguyang at nainlufuyan sa way lang em fagsegan at mapla, anggan em ngay fagbaugun ay em ngay sisian.

²⁵ Yawi em Dius, nanuksuan ami emu, aroro maksvn nu kapla ami emu, aroro ami ay anggan em ngay mangaguyang nafamabo ami emu.”