Eremyas 29 - Fanawbuid tagsibaliwas Fakayabian

Eremyas at Rirukan sa sangay Taw at Natabanan

¹ Sis furuan Erusalem, Eremyas nariruk laman sa sangay fagtainan, sa sangay tagfon fanggalangun, sa sangay taglong ay sa tiba yak taw fun Nabukudunusur at nataban sas talun Babilunya.

² Eremyas nu griruk gina fun Yuyakin talanak natabanan gasfuan ngay taw tagalaga at bale, ay ngay tagfangguna sis Uda ay sis Erusalem, ay ngay tagsaful kawat ay ngay tagfakamulun.

³ Ay Eremyas nafon at rirukan sas Elasa, Safan at baguama, ay sas Gemarya, Kilkya at baguama. Duama wan fun Sedekya at nasugu sas fun Nabukudunusur sas talun Babilunya. Katatuy at rirukan:

⁴ Katatuy Yawi at Mabalyanan, Israel at Dius, at longan sas fagayu taw Erusalem at natabanan sas talun Babilunya.

⁵ “Awati sik ngay bale ay banwani sanya. Tanumi ay oni ay gutluan.

⁶ Ay adadwai ay e sisiani ay fabayani wan ay aylati yangay ay ngay sisian nu kadadwa ay kanya fagayu gsisian yangay ban laman umkayu am.

⁷ Fae fagmanabayanuni ay fae ramramani at fagtabanan ayu fag furuan. Ay darangini kafag furuan aroro kanya ban fag furuan nu nke fagmanabayanun, anggan ban am umke fagmanabayanun yangay am.”

⁸ Yawi at Mabalyanan, Israel at Dius, glong yangay fia te, “Lag am gafaylatan ay ngay taglong ay ay kaiban fag ngay taginsaful nu kamuag sa ayu. Ay lag am gafanud sat ngay taginfan.

⁹ Aroro kanya fagayu glong ku ngayan laman kamuagan kamoyung, dewa au yud nasugu anya fagayu.”

¹⁰ Yawi glong te, “Nu nlangfe ban fituk safuluk banwa talun Babilunya nu gagbilug ayu, kafoli kban sa ayu ay namafasludan kban ku nafatuyanan te, namafoli au ayu sa ay fagbanwanan.

¹¹ Nasaful kwan nu gfafasludan au ku ngay algan sa ayu, sa ay fagmasineun ay bunwa sas fagmauriun, ku algan laman gfae fagsegun au ayu ay gfae fagmanabayanun.

¹² Nu katanya, guro tua ban am ay gdarangin sa angku, ay gdungugan ktua ban ayu.

¹³ Nu kakbang tua ban am sa angku sas fagdaul ay amatanganan, ggubuk ktua ban ayu.

¹⁴ Anud, ggubuk kban ayu, ay gfafoli siginan ay fagatabananan. Ay gfaful kban ayu siginan sangay talun ku fagfasaruayanan ayu, ay gfafoli kban ayu sa ay talun.

¹⁵ Glong way ban am manga te, nasugu au sa ayu kanya fag ngay taglong sanya stalun Babilunya,

¹⁶ dewa katanya, katatuy ku longan sabaliwas fun tagsiginans Dabid at kasugfunanan ay sa ay kaiban at kinsawad sis Erusalem, at yud natabanan gasfuan ayu:

¹⁷ Namadasug kban sa anya fagayu, fanlunus ay fakasaitun. Ay kanya ban fagayu umkata igus at rawvg at madanan yud kaon ya.

¹⁸ Anud, awayan ban ay fanlunus ay fakasaitun gfafalo anya fagayu, ay tiba bank fagfagtainanan gfalingun anya fagayu. Ay gaiyan kban anya fagayu sas nusnga nday fag talun, ay ngay taw ban gfauri, gfalingun, ay kadotama maksvn anya fagayu.

¹⁹ Aroro kabavn kanya fagayu wa gdungugan ku ngay longan siginan ku ngay fagsuguan fag ngay taglong. Ay anggan am at natabanan wam nafandungug.”

²⁰ Nu katanya, fagayu am at natabanan siginans Erusalem sas talun Babilunya, dungugani Yawi at ngay longan.

²¹ Katatuy Yawi at Mabalyanan, Israel at Dius, at longan sabaliwas Akab, Kulaya at baguama ay Sedekya, Maaseya at baguama: “Kanya fag duama nalong ku ngayan laman kamuagan garingang sa ayu. Nu katanya, namon au duama sas fun Nabukudunusur ay kanya namabul kafag duama si ay daga salubangan.

²² Aroro sat kinfasludan, ngay taw Uda at natabanan sas talun Babilunya gfatuyanan sat ngay iba te, ‘Yawi nangus gfabul wan emu kata talun Babilunya at fun nu girug Sedekya ay Akab.’

²³ Umfasludan takatanya sa anya fagayu aroro nafakamulun at maksvn nu mauri sis Israel. Kanya fagayu natugtug at ngay kaiban at ngay bubay ay nalong ku ngayan laman kamuag, deyud au nasugu sa anya fagayu te, fakamuluni. Saful kway at ngay nafakamulun ay nafatuyan au sabaliwa anya fagayu. Au, Yawi, taglong tuy.”

Longan laman sas Semaya

^24-25 Yawi at Mabalyanan, Israel at Dius, nafoyung sa angku sik longan laman sas Semaya tagbanwan sis Nekelam. Katatuy at longan: “Siginan emu nafadasug o sik rirukan sas Sefanyas, Maaseya fag tagfon fanggalangun at baguama, ay nafadasug yangay o sik rirukan sa tibak tagfon fanggalangun ay sas fagayu taw Erusalem. Katatuy am rirukan sas Sefanyas:

²⁶ ‘Yawi nafili emu fangungbus Euyada fag tagfakamulun sis Yawi at bale. Am fakamulun, taggamat ay tagsiuk salambitan sit liug nusnga sinu fag taw at yud mamatanganan taglong te, kanya sik taglong.

²⁷ Wain am fagyudun nafaragang Eremyas tagsiginans Anatut gina glong te, kanya sik taglong tagsi ayu?

²⁸ Kanya nariruk sa emi stie stalun Babilunya te, glugo yay ban nu ste ami. Ay nalong yangay te, nangawat yaymi sik ngay bale ay nantanum yaymi ay kon em gutluan.’ ”

²⁹ Sefanyas nu nabul Semaya at rirukan, natap sas Eremyas fag taglong.

³⁰ Nu katanya, Yawi nalong sas Eremyas te,

³¹ “Fabubai kanya fag rirukan sas fagayu at natabanan. Ay nanlong o sa anya fagayu te, katatuy ku longan sabaliwa Semaya tagsiginans Nekelam: Kwa nasugu Semaya laman nangaringang sa ayu. Kanya gfaylatan way ayu sat fakamuaganun.

³² Nu katanya, au, Yawi, glong au te, namaurianan kban anya gasfuan at ngay kasugfunanan. Nusdi ban sadi at kasugfunanan we nalag fagmasineun ku fagnamakamulunun sa ayu, aroro kanya nafoyung ayu laman kamabo am angku. Au, Yawi, taglong tuy.”