Eremyas 28 - Fanawbuid tagsibaliwas Fakayabian

Eremyas ay Kananya fag Taglong

¹ Ginanya yangay fag banwa, sis falimak magdanun, ay sis faufatk banwa Sedekya nu gfunan sis Uda, Kananya fag taglong, Asur at baguama, tagsiginans Gibyun, naringang sa angku sis Yawi at bale ay si sangay tagfon fanggalangun ay ngay taw tagsanya at daga salubangan. Kanya glong te,

² “Yawi at Mabalyanan, Israel at Dius, glong te, ‘Gfatabu kwan Babilunya at fun at fagmabalyananun.

³ Si bans faduak banwa, gfafoli kwan sa ku bale ngay fagagbilugun fun Nabukudunusur, talun Babilunya at fun, at nabul ay at nabuba sat talun.

⁴ Ay ginanya ban gfafoli kyangay fun Yuyakin, Yuyakim at baguama, ay anggan at fagfunanun fag ngay taw Uda at natabanan sas talun Babilunya, aroro ginanya ban gfatabu kwan Babilunya at fun at fagmabalyananun. Au, Yawi, taglong tuy.’ ”

⁵ Ay Eremyas fag taglong nabalus Kananya fag taglong si sangay tagfon fanggalangun ay si sangay taw at daga salubangan sis Yawi at bale

⁶ te, “Katanya wa fia! Yawi nangus gfakamulun wan! Yawi nangus gfakamulun wan am nalong te, kanya namuba ay namafoli sas Yawi at bale ngay fagagbilugun ay fagayu at natabanan sas talun Babilunya.

⁷ Dewa katanya, o ay fagayu am tagste dungugani ku longan.

⁸ Ngay taglong at naguna anta nalong te, kadasug ban awayan, fanlunus, ay fakasaitun sa sangay talun ay sa sangay takadungug fag fagfagtainanan.

⁹ Sik taglong at nafoyung sabaliwas fagmanabayanun, ay at foyungan nu nfasludan tua, ginanya ya nu katuyan te, kanya Yawi at taglong.”

¹⁰ Sanya ginan, Kananya fag taglong nabul siginans Eremyas at tungud liug at fantungud liug ay nagatvng.

¹¹ Ay kanya nalong sa sangay taw tagsanya te, “Katatuy Yawi at longan: fun Nabukudunusur kata nu nafoli sat nagbilug fag ngay talun ngay fantungud liug. Dewa katanya, nanggatvng kban kanya fag fantungud liug kaduge duak banwa.” Sanya ginan, Eremyas nalo wan.

¹² Ay wa glugo ya siginan taglong Kananya nu ggatvng fantungud liug tagsiginans Eremyas at tungud liug, Yawi nalong sas Eremyas te,

¹³ “Loi sas Kananya ay nanlong o sa anya ku longan te, ‘Nagatvng wo fantungud liug fag kayu, ay nantubus au sik sanbung fag fantungud liug.

¹⁴ Au Yawi at Mabalyanan, Israel at Dius, glong au te, gfafunguan kban fantungud liug fag sanbung sas fagayu talun laman kanya fagayu gfakamulun sas Nabukudunusur, Babilunya at fun. Ay namagbilug kyangay ban sa anya anggan tagsis talun fag ngay mangilafang.’ ”

¹⁵ Sanya ginan, Eremyas nalong sas Kananya fag taglong te, “Dungugani! Yawi wa nasugu emu, dewa katanya, tuy fag talun nafanud sam fakamuaganun.

¹⁶ Nu katanya, Yawi nalong te, ‘Umkalyam ban o ste ginans fagdaul daga. Ay umbul ban o katsi fag banwa, aroro nafoyung o ngay taw laman kamabo angku.’ ”

¹⁷ Nu katanya, sis fafituk magdanun ginanya fag banwa, Kananya fag taglong anbul wan.