Eremyas 27 - Fanawbuid tagsibaliwas Fakayabian

Eremyas Nafasat Tungud Liug Fantungud Liug

^1-2 Gina Sedekya, Usyas at baguama Uda at fun, gfasigad gfunan, Yawi nalong sa angku te, “Eremyas, awati sik fantungud liug ay fuklui sit dua fungfung sik fansiuk ay folii sam tungud liug.

³ Sanya ginan, nangaringang o sa sangay talun Edum, Muab, Amun, Tiru, ay Sidun at ngay fun siginan at ngay nasugu tagsis furuan Erusalem laman nanlag Sedekya, talun Uda at fun.

⁴ Nanlong o sanya fag ngay fagsuguan, tuy fag foyungan laman sat ngay fun: ‘Katatuy Yawi at Mabalyanan, Israel at Dius, at longan sa ayu:

⁵ Siginan ku fagmabalyananun nawat au fagdaul daga, ngay taw ay ngay mangilafang, ay au way tagfili at nangalaga kanya fagayu.

⁶ Nu katanya, katsi namon kwan ay ngay talun sa ku fagsuguan Nabukudunusur, talun Babilunya at fun. Ay anggan tagsis talun fag ngay mangilafang namagbilug kwan sa anya.

⁷ Fagayu ban talun namakamulun laman sas fun Nabukudunusur, ay sat baguama, ay sat fufu, yakmay ban andasug talun Babilunya nu kafaurianan. Sanya ginan ban, talun Babilunya man at namakamulun laman sa tibak talun ay sat mabalyanan fag ngay fun.

⁸ “ ‘Dewa katanya, sik talun ban at ngay taw ay sik fagmafunanun way kaylat gfababaun ay gfaning fun Nabukudunusur, talun Babilunya at fun, namaurianan kban kanya fag talun at ngay taw sas awayan, fanlunus, ay fakasaitun yakmay kban nafagbilug kanya fagayu sas fun Nabukudunusur. Au, Yawi, taglong tuy.

⁹ Nu katanya, lag am gafanud sa ay ngay taglong ay sa ay ngay taginsaful, ay sa ay ngay tagfayamag taginfan, ay sa tagfangabalo, ay sat nanginto sat mabulan fag taw at falad taglong te, talun Babilunya ban at fun wa nangagbilug ayu.

¹⁰ Kanya fagayu kamuag. Ay nu nafanud way ban am anya fagayu, gatabanan ban am siginan ay fagbanwanan. Gaiyan kban ayu ay kabul ban am.

¹¹ Dewa katanya, ngay talun at ngay taw tagfaning Babilunya at fun, si tua ban gugat at ngay mesa talun. Sanya way ban nu gbanwan ay gtanum sit mesa daga. Au, Yawi, taglong tuy.’ ”

¹² Ay nalong kyangay sas Sedekya, Uda at fun te, “Faningi Babilunya at fun. Fakamuluni sa anya ay sat ngay taw laman ban gleleg tuam.

¹³ Nu dway ban am nafaning anya, umbul ban am sas awayan, fanlunus, ay fakasaitun, kata Yawi at longan takadasug sa sangay talun at yud ban gfaning Babilunya at fun.

¹⁴ Lag am gafanud ngay taglong at nalong te, Babilunya at fun wa nangagbilug ayu, aroro kanya fagayu kamuag way.

¹⁵ Katatuy Yawi at longan, ‘Kwa nasugu kanya fag ngay taglong. Kanya fagayu glong ku ngayan laman kamuag sa ayu. Nu katanya, nu nafanud way ban am, gaiyan kban ayu ay kabul ban am, gasfuan kanya fag ngay taglong.’ ”

¹⁶ Sanya ginan, nalong au sa sangay tagfon fanggalangun ay sa sangay taw, Yawi at longan te, “Lag am gafanud ngay taglong nu glong te, ‘Munakbang wan nu gfafoli ngay fagagbilugun sas Yawi at bale siginans talun Babilunya.’ Kanya fagayu kamuag way.

¹⁷ Lag am gafanud anya fagayu. Fakamuluni laman sas Babilunya at fun laman ban gleleg tuam. Ay wain? O kaylat am tuy fag furuan nu karasras?

¹⁸ Kanya fagayu nu at matuyan di fag ngay taglong ay at ngay longan nu siginan tuas Yawi, kanya fagayu masine nu gdarangin sas Yawi at Mabalyanan te, wa nangus gbuba ya sas Babilunya ngay fagagbilugun at kinsawad sis Yawi at bale, ay sis Uda at fun at bale, ay tagsis fagdaul Erusalem.

¹⁹ Aroro Yawi at Mabalyanan nalong te, e gbuba ban sas Babilunya ngay turuk at mawatan siginan tansu ay tagbia fag fagfegusan at nafangayan te, Dagat, ay ngay faguyudan at ke balingkitan, ay tiba yak fagagbilugun iste fag furuan.

²⁰ Fun Nabukudunusur wa nabuba kanya fag ngay fagagbilugun, gina gtaban fun Yuyakin, Yuyakim at baguama, Uda at fun, gadgaloan ngay tagfakamulun sis Uda ay sis Erusalem.

^21-22 Ay katsi, Yawi at Mabalyanan, Israel at Dius, glong te, ‘Gbuba ban sas talun Babilunya kanya fag ngay fagagbilugun ay sanya yay ban gugat yakmay andasug ku nafalganan fag menit nu namul au ay namafoli stie fag furuan Erusalem.’ ”