Eremyas 26 - Fanawbuid tagsibaliwas Fakayabian

Eremyas Anlangfe siginans Fakabulun

^1-2 Gina Yuyakim, Usyas at baguama, Uda at fun, gfasigad gfunan, Yawi nalong sa angku te, “Nanmalindug o sa ku bale ay nangaringang o sa sangay taw Uda tagsanya laman gseg. Longi sa anya fagayu ku nalong emu ay lag gbuin.

³ Bangaran ro kanya fagayu gdungugan yay emu ay gtalyuyan at ngay ugali at mauri. Ay kanya ban fagayu nu nafakamulun tua takatanya, kwa gfataglayun ya ku algan sa anya fagayu aroro sat ngay fakamulun at mauri.

⁴ Nanlong o sa anya fagayu ku longan te, ‘Nu dway ban am gafanud sa angku, ay wayam kaylat gfaning ku nafon ayu fag ngay suguan,

⁵ ay nu dway ban am gafanud ku fagsuguan fag ngay taglong ku fagsuguun gugat sa ayu, at ngay foyungan,

⁶ grasras kban tuy fag bale kata ku nafakamulun sis Silu. Ay fagayu ban talun sas fagdaul daga gfauri kanya fag furuan!’ ”

⁷ Ngay tagfon fanggalangun, ay ngay taglong, ay fagayu taw tagsis Yawi at bale nadungug Eremyas at longan.

⁸ Ay Eremyas nu ntabu garingang, ngay tagfon fanggalangun, ay ngay taglong, ay ngay taw naligung anya, ay nalong te, “Masine nu kabul wo!

⁹ Wain am fagnalongun te, Yawi nalong sa emu te, grasras wan tuy fag bale kata Silu, ay tuy ban fag furuan mabaluanan way lang ay wa ban e gbanwan ya?” Nu katanya, kanya fagayu nagamat Eremyas.

¹⁰ Ay Uda at ngay tagfangguna nu nadungug takatanya, kanya fagayu nalao sas Yawi at bale ay nananmalunggung sisad dalan tagsat bagu fag sakbawan sis Yawi at bale laman nanginsaful.

¹¹ Ngay tagfon fanggalangun ay ngay taglong glong sa sangay tagfangguna ay sa sangay taw tagsanya te, “Faurianani wan fakabulun tuy fag taw aroro nalong at mauri stie fag furuan.”

¹² Ay Eremyas nalong sa sangay tagfangguna ay sa sangay taw tagsanya te, “Yawi nasugu angku laman nangaringang sabaliwa at bale ay ste fag furuan daul kata ay nadungug.

¹³ Nu katanya, fabalii wan ay ngay ugali ay anggan nu mabanwan am, ay faningi tua ay Dius Yawi. Aroro nu nafakamulun tua ban am takatanya, Yawi ban wa gfataglayun nu gfaurianan ayu.

¹⁴ Ay nu sabaliwa angku, kwe fagmakatuun ya. Fakamuluni wan nu setain ay algan at masine ay at matuyan.

¹⁵ Dewa katanya, amatangani te, nu nafabul ro am angku, am ay anggan ay ngay taw umke mamalong ro, aroro nafabul am at yud e asalanan fag taw. At matuyan, Yawi nasugu angku laman gfoyung au sa ayu kata ay nadungug.”

¹⁶ Nu katanya, ngay tagfangguna ay ngay taw nalong sa sangay tagfon fanggalangun ay sa sangay taglong te, “Watam masine gfabul tuy fag taw aroro kanya naringang sa antam, sa tam Dius Yawi, at ngayan.”

¹⁷ Sanya ginan, tibak fagtainan namalindug sis fagunan ay nalong sa sangay taw at maful sanya te,

¹⁸ “Ebi gina Esekyas gfunan sis talun Uda, Mikas, tagsiginans Mureset, nalong Yawi at longan laman sa sangay taw Uda. Kanya nalong te, ‘Yawi at Mabalyanan nanrasras wan Siun, Erusalem fag furuan daul. Ay kafag furuan ban umkata sik fagtanuman at malian, ay sik fagfungsuan at kinkiklas fag ngay bale, ay at fagfalindugan Yawi at bale fag buksul umkata sik araw.’

¹⁹ “O Esekyas ay ngay taw Uda nafabul Mikas? Duan! Esekyas anlimu tua Yawi ay ankakbang sa anya. Nu katanya, Yawi wa nafataglayun at algan fag faurianan sa anya fagayu. Ay nu nafabul ro tam Eremyas, itam yay tagfaurianan antam.”

²⁰ Ay ginanya, sik taw naringang yangay sa sangay taw sas Yawi at ngayan. At ngayan Urya, Semaya at baguama, siginans Kiryat-Earim. Kanya nalong yangay takadasug sa kafag furuan ay sa kafag talun kata Eremyas at nalong.

²¹ Ay fun Yuyakim ay ngay tagfangguna ay anggan at tagalaga nu nadungug Urya at longan, kanya fagayu maksvn nu gafabulun anya. Dewa katanya, Urya nasaful, ay kanya nalagyu sas talun Igiptu aroro kalimu.

²² Ay fun Yuyakim nasugu Elnatan, Akbur at baguama, ay tiba yak taw laman glo sas talun Igiptu.

²³ Nu katanya, kanya fagayu nalao sas talun Igiptu ay nataban anya sas fun Yuyakim, ay kanya fagayu nafabul Urya siginans fiso tagsumbalian at uyup, ay naukas at bilug sas fagfolian at yud kadungug fag ngay taw.

²⁴ Dewa katanya, Akikam, Safan at baguama, nagubuk tua Eremyas, ay kafag ngay taw wa nafabul.