Eremyas 25 - Fanawbuid tagsibaliwas Fakayabian

Nu Gatabanan Kaduge Fituk Safuluk Banwa

¹ Katatuy at foyungan sa sangay taw Uda. Yawi nafon sas Eremyas tuy fag foyungan gina sis faufatk banwa Yuyakim, fun Usyas at baguama, nu gfunan. Ay ginanya taguna fag banwa fun Nabukudunusur nu gfunan sis talun Babilunya.

² Ay Eremyas fag taglong nalong sa sangay taw Uda ay sas fagayu tagbanwan sis furuan Erusalem te,

³ “Kaduge duak safulu e tuluk banwa, siginans falabi tuluk banwa Usyas, Amun at baguama, nu gfunan sis Uda, dasug katsi, Yawi gfoyung wa gugat sa angku at longan. Ay gfoyung koma gugat ayu, dewa katanya, wam kaylat gdungugan.

⁴ Ay dewa Yawi gsugu gugat sa ayu at ngay fagsuguan fag ngay taglong, wam kasalag ay wam gdungugan.

⁵ Yawi naringang siginan at ngay taglong te, ‘Talyuyani wan ay ngay ugali at mauri ay ay ngay fakamulun at mauri laman ban gbanwan tuam gugat ste fag fagbanwanan ku nafon sa ayu ay sa ay ngay mangaguyang.

⁶ Lag am gseg ay gfaning tibak fagsegan, ay lag am gfadotama angku siginan ay nawat fag ngay fagsegan, laman ban kwa gfaurianan ayu.’

⁷ “Dewa katanya, wam nadungugan Yawi. Abat ngate, nafaksvn wayam nu gfadotama am anya siginan ay nawat fag ngay fagsegan. Nu katanya, am wan at nafadasug sa ayu tuy fag faurianan.

⁸ Nu katanya, katatuy Yawi at Mabalyanan at longan, ‘Aroro wam gdungugan ku ngay longan,

⁹ namadasug au sa ayu sik ngay tagfawayan siginans fawalan fag alvngvdan ay ku fagsuguan Nabukudunusur, Babilunya at fun, tagfangguna. Kanya namawayan sa ay talun, ay sa sangay tagbanwan sanya, ay anggan sa sangay furuan tagsi ay ligung. Namamin kwan ayu, ay tiba bank taw umdulo at kindasug sa ayu, ay gfalingun ban gugat ayu aroro ay talun ban marasrasan way gugat.

¹⁰ Ay wa ban am e fagusegananun ya ay e fagfanagsagun. Ay wa ban e kadungug ya at ngay bagu kadadwa nu guseganan. Ay wa ban e glubuk ya trigu ay nu nyabi ban we gfasalung ya salung.

¹¹ Ay tuy ban fag talun umsik mabaluan. Ay tagbanwan sanya fag talun namakamulun sas Babilunya at fun kaduge fituk safuluk banwa.

¹² “ ‘Ay nu nlangfe ban fituk safuluk banwa, gfaurianan kyangay ban Babilunya at fun anggan at ngay taw aroro sat ngay asalanan. Gfasik mabaluanan kyangay ban at ngay furuan kabavn.

¹³ Namadasug kban sat talun fagayu ku nalong takadasug ban sa anya fagayu kata Eremyas at longan at marirukan ste fag fafil.

¹⁴ Ngayu bank talun ay ngayuk fun at mabalyanan at namagsuguan anya fagayu. Ay gfaurianan kban anya fagayu kata at nafakamulun mauri.’ ”

Sik Taya Mapnu Yawi at Fandotaman

¹⁵ Yawi, Israel at Dius, nalong sa angku te, “Buli si ku daluap fag taya at mapnu ku fandotaman ay namainum o sas fagayu talun nusnga nday nu gsugu au emu.

¹⁶ Ay kanya ban fagayu nu nainum wan sanya ginan fag taya, granranugan kata sik taw at nalyam at amatanganan, aroro sa ku fagnamadasugun ban sa anya fagayu fag awayan.”

¹⁷ Nu katanya, nabul au kafag taya siginans Yawi at daluap ay nafainum au sas fagayu talun nu dada nu gsugu angku.

¹⁸ Nafainum kwan sas Erusalem ay sa sangay furuan tagsis Uda anggan sat ngay fun ay sat ngay tagfangguna laman umfaurianan wan. Ay tiba bank taw umdulo at kindasug sa anya fagayu, ay gfalingun ay gfauri, kata takafasludan katsi.

¹⁹ Ay nafainum kyangay sas Faraun, Igiptu at fun ay sat ngay tagfangguna ay sat ngay tagfunan ay sas fagayu tagbanwan sit talun,

²⁰ ay anggan sa sangay yud Igiptu fag ngay taw tagbanwan sanya. Ay nafainum kyangay tagsis talun Us at ngay fun ay at ngay tagbanwan, ay sas fagayu furuan tagsis talun Filistia, (ngay tagfunan sis Askelun, Gasa, Ekrun, ay Asdud);

²¹ Edum, Muab, Amun,

²² ay sis talun Tiru, Sidun, ngay furu sas dife dagat,

²³ sis Dedan, Tema, Bus, ay si tangayayu fag ngay talun,

²⁴ sis Arabya, ngay gaban tagsis talun at yud e taw,

²⁵ Simri, Elam, Medya,

²⁶ ngay furuan sis fawalan fag alvngvdan, at munakbang ay tangayayu, ay fagayu fun sas fagdaul daga. Ay taguyan ban at nanginum sanya fag taya, talun Babilunya at fun.

²⁷ Sanya ginan, Yawi nalong sa angku te, “Nanlong o sa sangay furuan te, ‘Au, Yawi at Mabalyanan, Israel at Dius, glong au te: Agvd, inumi sis taya ku fandotaman yakmay am nalangu, ay nafangkok ay antangda, ay wam makatu ya kalunggung aroro namae awayan au sa ayu.’

²⁸ “Dewa katanya, kanya fagayu nu dway kaylat ginum, longi sa anya fagayu te, ‘Au, Yawi at Mabalyanan, glong au te, masine nu ginum tuam!

²⁹ Gfasigad kwan gfadasug faurianan sas furuan Erusalem, ku nafili fag furuan nu inda at fagnamauseganan angku. O nu glong am kwa mafaurianan ayu? Gfaurianan kwan ayu! Aroro gsugu kban laman fagayu talun sas fagdaul daga gawayan. Au, Yawi at Mabalyanan, taglong tuy.’

³⁰ “Eremyas, foyungi sanya fag ngay taw fagayu ku longan, ay longi yap te, ‘Yawi guro siginans banwa, ay at uro kata nu gtungtung siginan at yud e malong fag bale. Ay guro maksvn sat nafili fag ngay taw. Ay guro yangay sas fagayu tagbanwan sas fagdaul daga kata sik taw taguro kaduge gturis wat ubas at rawvg.

³¹ Umdungug at uro sas fagdaul daga, aroro kanya namaurianan ngay talun aroro sat ngay fagmauriun ay namaurianan anya fagayu yakmay kanya fagayu anbul.’ Au, Yawi, taglong tuy.”

³² Yawi at Mabalyanan glong yay fia te, “Madiriani tua! Faurianan kadasug sa sangay talun kata sik maksvn fag fulug siginan tangayayu fag fatuan daga.”

³³ Ginanya ban fag menit, Yawi gfabul ngayuk taw ay at ngay bilug ban grapyagan sas nusnga nday sas fagdaul daga. Wa ban e kabalu ya ay we kaful ya ay we namoli ya anya fagayu. Gfabayan way lang ban anya fagayu kata sik fagbaugun at ngay kek sis tungud daga.

³⁴ Am fag ngay tagfangguna, waywayi maksvn, dagingani sis daga aroro sa ay fakabaluun. Aroro andasug wan at menit nu gfabul ayu kata nu gfabul sik tupa, ay umrufa am kata at kinrufa fag tikung.

³⁵ Wam e fagmalagyuan ya, ay wam malagyu ya.

³⁶ Umdungug nu gwayway am ay nu gfandeng am, aroro Yawi nafamin wan ay ngay iba.

³⁷ Aroro Yawi maksvn nu kadotama, ngay fagfafangonan ngay fagbaugun umkata sik talun at yud e taw.

³⁸ Yawi kata sik liun at nalfas siginan at luib laman nanrvbvy at fagnangonun. Mabalu way lang ban si ay talun, aroro ay ngay fawayan at nafakamulun ay aroro maksvn Yawi nu kadotama.