Eremyas 24 - Fanawbuid tagsibaliwas Fakayabian

Duak Sabi Mapnu Igus at Rawvg

¹ Yawi nafae taginfan angku, gina Nabukudunusur, Babilunya at fun, nataban Yuyakin, Yuyakim at baguama, Uda at fun. Nataban fun Yuyakin sas talun Babilunya anggan at ngay tagfangguna, ay at ngay tagsaful kawat, ay Uda at ngay tagfakamulun. Si ku taginfan nalag au duak sabi igus at rawvg sis salubangan Yawi at bale.

² Sit sadi fag sabi, melo, masine, malesanan, ay bagu yay grabas. Ay sit faduak sabi, madanan way ay wa kaon ya.

³ Sanya ginan, Yawi nainto sa angku te, “Eremyas, nataw am lagan?” Ay nabalus au te, “Sik ngay rawvg igus. At tiba masine ay melo. Ay at tiba madanan way ay wa kaon ya.”

⁴ Nu katanya, Yawi nalong sa angku te,

⁵ “Au Yawi, Israel at Dius, glong au te, Kafag ngay taw Uda ku nafataban sa sangay taw Babilunya at talun, gtuyan au te masine, kata kanya fag ngay rawvg igus nu masine.

⁶ Gdiri kban anya fagayu laman umke fagmanabayanun ay gfafoli kban anya fagayu sat fagbanwanan. Namadog kban namaksvn anya fagayu ay kwa ban gfaurianan ya. Nantanum kban anya ay kwa ban gdog ya ggulad.

⁷ Namon kban sa anya fagayu sik amatanganan laman gtoglag tua angku te, au Yawi. Ay gtuyan kban anya fagayu te, ku ngay taw, ay kanya ban fagayu gtuyan te, au wan at Dius, aroro kanya ban fagayu kafoli wan sa angku sas fagdaul at amatanganan.

⁸ “Dewa katanya, gtuyan au te, Sedekya, Uda at fun anggan at ngay tagfangguna ay fagayu taw Israel at kinsawad sis Erusalem ay sis talun Igiptu te, kata way at madanan fag rawvg igus at yud kaon ya.

⁹ Nama sik masuya au anya fagayu sa sangay fagfunanun sas fagdaul daga. Ay tiba bank talun gfalingun ay gfauri anya fagayu nusnga nday nu gbanwan.

¹⁰ Gfadasug kban sa anya fagayu awayan, fanlunus, ay fakasaitun yakmay ban anbul si ku nafon sa anya fagayu ay sat ngay mangaguyang fag fagbanwanan.”