Eremyas 23 - Fanawbuid tagsibaliwas Fakayabian

Takadasug fag Fagsegun

^1-2 Yawi, Israel at Dius, glong te, “Am fag ngay tagfangguna ku ngay taw afanyuan am! Am wan ku fagfatigwanan tagalaga ku ngay taw kata sik tagalaga ngay tupa, dewa katanya, nafabayan am kanya fagayu nu kabul ay nu gfanaruayan. Takatanya ay nafakamulun, nafasaruayan wayam ku ngay taw. Nu katanya, namaurianan au ayu. Anud wan, namaurianan au ayu aroro sa ay ngay nafakamulun at mauri.

³ Namaful kban ku ngay taw at sawad siginan sangay talun nu inda nu gfasaruayan au anya fagayu, ay namafoli kban sat sadili fagbanwanan ay kanya ban fagayu gdog yay nangayu.

⁴ Ay nanfili kban sik ngay tagfangguna at nangalaga tua anya fagayu. Ay kanya ban fagayu di e fakalimuun ya ay we fagafanawaun, ay wa ban e kalyam ya. Au, Yawi, taglong tuy.”

⁵ Yawi glong yangay te, “Sik menit ban nanfili au sik fun at matuyan tagsiginans Dabid at kasugfunanan. Kanya ban e fagsafulun sabaliwa nu gfunan, ay namae fagmatuyanun ste fag talun.

⁶ Ay gfangayan ban kanya fag fun te, ‘Yawi wan Tam Fagmatuyanun.’ Ay ginanya ban Uda umlangfe, ay umke fagmanabayanun sas fagdaul talun Israel.

⁷ “Ginanya ban fag buknga, ngay taw wa glong ya te, ‘Gfatuyanan au sas Yawi, tagleleg fag Dius at nafalfas ngay taw Israel siginans talun Igiptu!’

⁸ Abat ngate, kanya ban fagayu glong way te, ‘Gfatuyanan au sas Yawi, tagleleg fag Dius at nafalfas ngay taw Israel siginan ngay talun sas fawalan fag alvngvdan ay sas fagayu talun nu inda nu gfasaruayan anya fagayu.’ Ay kanya ban fagayu gbanwan wan sit talun.”

Faurianan laman sa Takamuagan fag ngay Taglong

⁹ Kabalu au aroro sa takamuagan fag ngay taglong at foyungan. Anggan ku ngay bini anmomuy wan ay kata wa nu galangu au aroro sas Yawi at longan at yud e malong sabaliwa anya fagayu.

¹⁰ Mapnu wan ste fag talun tagseg tibak fagsegan, aroro sat ngay taglong at ngay fakamulun at mauri ay nu gfasawe nu gfakamulun. Nu katanya, Yawi nafauri kafag ngay taw at talun, ay at ngay fananumun an-gong wan ay anlangke.

¹¹ “Ngay tagfon fanggalangun kata yangay sik ngay taglong; kanya fagayu nafakamulun at mauri dewa si ku bale.

¹² Nu katanya, kanya fagayu at dalan umdulum ay umdangsal. Ay kanya fagayu umtaid ay umlub, aroro namadasug au sa anya fagayu fagidapun gina kban gfaurianan. Au, Yawi, taglong tuy.

¹³ Nalag au Samarya at ngay taglong at nafakamulun at maksvn nu mauri. Kanya fagayu ginsaful siginan nu guro Baal at ngayan, ay nafalyam ku ngay taw Israel at fagmatuyanun.

¹⁴ Ay nalag kyangay te, sis Erusalem fag ngay taglong at nafakamulun nu mauri aksvn yap tua Samarya at ngay taglong at nafakamulun, aroro kanya fagayu wa matuyan sa angku ay kamuag. Kanya fagayu nafaksvn ngay taw mauri at ngay amatanganan laman gfataglayun gfakamulun at mauri, nu katanya, kanya fag ngay taw wa naubun at ngay fakamulun at mauri. Ngay taw Erusalem nu mauri gsud yay Suduma ay Gumura.”

¹⁵ Nu katanya, Yawi at Mabalyanan glong sabaliwa kafag ngay taglong te, “Namaon au sa anya fagayu ngay fakonun at mayat ay namainum au at ke ganga fag ngay fanginum aroro kanya fagayu nafafagdaul fagmauriun sas fagdaul talun.”

¹⁶ Yawi at Mabalyanan glong sa sangay taw Erusalem te, “Lag am gafanud takamuag fag ngay taglong at longan. Kanya fagayu nafaseg way ayu sat fakamuagun. Wa siginan angku at ngay taginfan, siginan way at ngay sadili amatanganan.

¹⁷ Katatuy kanya fag ngay taglong at longan gugat sa sangay taw at yud gdungugan ku ngay longan, ay takaylat way gfaning at ngay amatanganan: ‘Manabayan tua ban nu mabanwan am. Wa ban e kadasug sa ayu at mauri.’

¹⁸ Dewa katanya, sinu fag taglong at nasaful ku amatanganan? Ay kanya fagayu wa gdungugan ku ngay longan ay wa kaylat gfae masuad ku ngay foyungan.

¹⁹ Dungugani! Ku dotama kaksvn sik fulug ay sik tagmara tagbaribungan at namalang sat mauri fag ngay taw at ngay alfuyu.

²⁰ Wa ban kalyam ku dotama yakmay kban nafafasludan ku fakaylatun gfakamulun. Ay sa ban taguyan fag ngay menit, sumaful yayam at masuad.

²¹ Kwa nasugu kanya fag ngay taglong, dewa katanya, kanya fagayu nalao wan. Kwe nalong sa anya fagayu, dewa katanya, kanya fagayu nanfamoyung wan.

²² Laman ro kanya fagayu nu saful ku amatanganan, nalong wa nangus ku ngay longan sa ku ngay taw laman kanya fagayu gubun at ngay ugali ay at fakamulun at mauri.

²³ Au Dius tagsis nusnga nday, ay kdi si sik afud talun.

²⁴ We taw masuksuan angku dewa snga nday fag furuan at masuksuk. O nunda wam saful te, si au sbanwa, ay sis daga ay nusnga nday? Au, Yawi, taglong tuy.

²⁵ “Nadungug au ngay taglong nu gfoyung kamuagan sa ku ngayan. Kanya fagayu kamuagan glong te, nafon au sa anya fagayu ku ngay longan siginans taginfan.

²⁶ Ginain yaban kanya fagayu nu gfaragang nu gfoyung at yud matuyan tagsiginan way at ngay amatanganan?

²⁷ Ay siginan kafag ngay taglong at ngay taginfan nafoyung sa ku ngay taw laman gtalyuyan angku, kata at ngay mangaguyang nu kalyam angku siginan nu gseg Baal.

²⁸ Fabayani wan ngay taglong tagfoyung sabaliwa at sadili taginfan, dewa katanya, fagayu taglong at nadungug ku ngay longan gfoyung tua nangus at matuyan. Aroro takamuag fag ngay taglong at ngay taginfan saman way ku ngay longan, kata trigu ay nagruyusan nu saman.

²⁹ O nunda ku ngay longan wa mabalyanan? Ku ngay longan kata sik afuy nu girug ay sik famulpug nu marufa gang.

³⁰ “Nu katanya, au Yawi, gfasud au ngay taglong takamaningan way tibak taglong at longan taglong te, at ngay longan siginan angku.

³¹ Gfasud kyangay sa sangay taglong tagfakamulun at sadili longan ay takamuagan glong te, au at nalong at ngay longan.

³² Kanya fagayu gfoyung at ngay taginfan at yud matuyan, nu katanya, siginan at fakamuaganun nafalyam ku ngay taw at amatanganan. Kwa nasugu anya fagayu ay kwa yangay nasugu te, aringangi, nu katanya, we fanggubukun sa sangay taw. Au, Yawi, taglong tuy.

³³ “Eremyas, nu e nananginto sa emu sabaliwa ku ngay longan, kanya dewa sik yud e fanambagun fag taw, ay sik taglong, ay sik tagfon fanggalangun, longi sa anya te, gaiyan kwan anya fagayu.

³⁴ Sik taglong, ay sik tagfon fanggalangun, ay nusnga sinu taglong te, at longan siginan angku, gfaurianan au anya gasfuan fagayu at talanan.

³⁵ Amasine yap taginto yay sat ngay fagadgalangan ay sat ngay kalongan nu nataw ku longan,

³⁶ abat ngate, taglong te, ‘E longan au siginans Yawi.’ Aroro tibak taw glong takatanya laman at ngay iba gafanud anya, nu katanya, kanya fagayu gfayud way e masuad tagleleg fag Dius, Yawi at Mabalyanan, at longan.

³⁷ “Eremyas, nu nainto o sa sik taglong te, o e longan o tagsiginans Yawi,

³⁸ ay kanya nu nalong te, ‘Sabv, e longan au siginans Yawi.’ Longi sa anya te, katatuy Yawi at longan: Aroro nalong o te, e longan o siginan angku, dewa au gsalag nu glong o takatanya,

³⁹ gaiyan kwan ay gfalyam emu siginan ku daga salubangan. Ay gfabayan kban ste fag furuan ku nafon sam ngay mangaguyang.

⁴⁰ Ay namae fakaplaun kban ayu yud e fakatabuan ay at yud ban kalyam ya kabavn.”