Eremyas 22 - Fanawbuid tagsibaliwas Fakayabian

Yawi at Faurianan sas Uda at ngay Fun

¹ Yawi nalong sa angku te, “Loi sas Uda at fun at bale ay nanlong o sa anya te,

² Uda at fun, tagsiginans Dabid at kasugfunanan, ay am fag ngay tagfangguna ay am fag ngay taw tagdalan ste fag sakbawan, dungugani. Yawi glong te,

³ Fakamuluni tua at ke fagmanabayanun ay at ke fagmasineun. Gubuki at nafangkamulan, ay falangfei anya fagayu siginan tagfaidapan. Lag am gfauri ay ngay betaw, ay at yud e fagtainan ya, ay anggan ngay fagbubayun. Ay lag am gfabul ngay taw at yud e asalanan.

⁴ Nu gfaning tua ban am ku ngay suguan, Dabid tua ban gugat at kasugfunanan tagfunan sis Erusalem. Ay ay fun ban, ay at ngay tagfangguna ay at ngay taw, nangadgaloan tua ban gugat gsakay sit ngay faguyudan fangawayan ay gsakbo sas fun at bale at sakbawan.

⁵ Dewa katanya, nu dway ban am gfaning ku ngay suguan, gfatuyanan au te, nangiklas kban fun at bale.”

⁶ Katatuy Yawi at longan sabaliwa Uda at fun at bale: “Masine o, kata Gilyad ay kata tungud buksul Lebanun. Dewa katanya, namakata au emu sik talun at yud e taw, kata sik furuan at yud e gbanwan ya.

⁷ Namadasug au at nangiklas emu ay kanya ban fagayu mesa gbuba at fanrasras ay gfuan am ngay turuk sidru ay gukas sasad afuy.

⁸ “Ngay taw ban tagsiginan tibak talun tagdalan sanya gidgintoan te, ‘Wain Yawi at fagnafakamulunun takatatuy stie fag furuan?’

⁹ Ay katatuy ban at famalus sa kafag ngay taw, ‘Aroro kanya fagayu natalyuyan at nasadian sas Yawi, ay naseg ay nafaning tibak fagsegan.’ ”

Foyungan sabaliwas Yuakas

^10-11 Ngay taw Uda, lag am gwayway aroro sas fun Usyas at nabulanan. Abat ngate, sidsiduani way laman sat baguama Yuakas at natubus anya laman sik fun ban sis talun Uda. Aroro kanya natabanan wan ay wa ban makatu ya kafoli. Nu katanya, kanya ban wa glag ya ste fag fagbanwanan sit fakasalugan. Aroro Yawi nalong te, kanya ban wa makatu ya kafoli.

¹² Kanya ban kabul wan sat fagatabananan fag talun. Ay wa ban gdog ya glag ste fag talun.

Foyungan sabaliwas Yuyakim

¹³ Afanyuan o Yuyakim, nafawat o am bale siginan at mauri fag balyawvtan. Nafafakamulun o am ibama ay wo e nafon famayad.

¹⁴ Nalong o te, “Namawat au ku bale at ke ngay suluk ayu daul sit tungud. Ay namae fagbanawanan au ayu daul, at faningding ngay balse sidru. Sanya ginan, nanrarus au at maraska.”

¹⁵ O nu glong ro wo sik mabalyanan wo fag fun nu nafawat wo am bale at mawatan siginans sidru? Wain am fagyudun gfaning am mama? Kanya at ngay nafakamulun matuyan tua ay masine, nu katanya, am mama nu nabanwan manabayan tua ay di e fagayudanun.

¹⁶ Am mama nagubuk tua at yud e kwa ay tagayudan, nu katanya, ngay taw maksvn nu kesug anya. Kata anya tagtoglag angku.

¹⁷ Dewa katanya, kabavn emu am fakaylatun gfandaya way o, ay namabul at yud e asalanan, ay nanfamalingun, ay namakamulun at mauri.

¹⁸ Nu katanya, katatuy Yawi at longan sabaliwas Yuyakim, Uda at fun, Usyas at baguama te, “Yuyakim ro nu nbul, we kabalu ya anya. Ay dewa at talananan, ay at ngay tagfangguna, ay tibak taw wa yangay kabalu anya.

¹⁹ Nu namoli ban anya kata way nu gfoli sik asnu at kinbul; nangguyudan ban at bilug ay namaduksun sas Erusalem at sakbawan laman nangukas.

²⁰ Ngay taw Uda, nangundaud am sas tungud buksul Lebanun ay nanwayway am, aroro namin wan ay fagadgalangan fag ngay talun. Ay nanguro am anya fagayu sas Basan ay sas Abarim.

²¹ Nafararang kwan sa ayu ebi gina yayam manabayan, dewa katanya, wam nafandungug. Katanya wan ay ugali siginan nu mabaguama am, wam gfaning angku.

²² Nu katanya, namarapyagan au ay ngay tagfangguna kata tagmara at nafalayug fag ngay upa, ay ay ngay fagudgubukan fag ngay talun gatabanan. Umke fakaplaun am aroro sa ay fagmauriun.

²³ Am fag ngay tagbanwan sis furuan Erusalem fag bale daul tangabat at mawatan kayu sidru tagsiginans Lebanun, mafanyuan ban am gina ban andasug sa ayu fagidapun, kata ban am sik mangena tagidapan nu gfasalug.

Foyungan sabaliwas Yuyakin

²⁴ “Au Yawi, gfatuyanan au te, kafanud nu gleleg au, nangaiyan au emu Yuyakin, Uda at fun, Yuyakim at baguama. Dewa o kata sik fanumyu si ku siun fag daluap fakatoglagan ku fagmabalyananun, gbul au emu siginan ku sumyu.

²⁵ Ay namon au emu sam ngay fawayan takaylat namabul emu. Namon au emu sas Nabukudunusur, Babilunya at fun ay sat ngay tagfawayan.

²⁶ Nangukas au ayu talanak sa tibak talun ay sanya waban nu kabul am.

²⁷ Ay wa ban am manangafoli ya sa ay fakaylatun fag talun.”

²⁸ Yuyakin, kata o sik tikung at marufan at yud e masuad ya. Nu katanya, nangukas kwan emu ay anggan am ngay sisian say fagyudun toglag fag talun.

²⁹ Am fag ngay tagbanwan sis talun Uda, dungugani Yawi at longan.

³⁰ Kanya glong te, “Rarusi wan siginans fun at fafil Yuyakin at ngay baguama at ngay ngayan. Fun Yuyakin nababawan wan, ay nusdi ban at sisian at sadi we nanmalunggung sas fun Dabid at faglunggungan laman gfunan sas talun Uda. Au, Yawi, taglong tuy.”