Eremyas 21 - Fanawbuid tagsibaliwas Fakayabian

Nafoyung Furuan Erusalem nu Karasras

¹ Yawi naringang sa angku gina fun Sedekya nafadasug sa angku Pasur, Malkya at baguama, gadgaloan Sefanyas, Maaseya at baguama fag tagfon fanggalangun. Kanya fag dua nalong angku te,

² “Namainfanyuan o sas Yawi te, gubuki emi, aroro Nabukudunusur, Babilunya at fun, namawayan emi. Tiba ginan ro Yawi nafasure sik madulo kata ebi at nafakamulun, laman karagang fun Nabukudunusur nu namawayan emi.”

³ Ay nabalus au kafag duama te, “Nanlong am sas fun Sedekya te,

⁴ ‘Katatuy Yawi, Israel at Dius, at longan: Wa ban e fanambagun ay ngay famawayan laman namawayan am fun Nabukudunusur ay sat ngay tagfawayan at maligung si ayu. Nu katanya, namaful au anya fagayu ste swabilug furuan.

⁵ Au wan at namawayan ayu siginan ku fagmabalyananun aroro maksvn nu kadotama au ayu.

⁶ Namabul au fagayu tagbanwan ste fag furuan; ngay taw ay ngay fagbaugun. Ay kanya fagayu umbul sat maksvn fag faurianan.

⁷ Ay o Sedekya, Uda at fun, ay am ngay tagfangguna, ay anggan ban fagayu at kinsawad at yud anbul sas faurianan, sas awayan, ay sas lunus, namon au ayu sa ay fawayan Nabukudunusur, Babilunya at fun. Ay kanya ban we afanyu ya gfabul ayu. Au, Yawi, taglong tuy.’

⁸ “Ay nanlong yangay am sa sangay taw, Yawi at longan te, ‘Katsi, filii leleg ay mannga fakabulun.

⁹ Nusnga sinu ban tagbanwan yay gugat ste fag furuan, kabul ban sas fagawayanan, sas fanlunus, ay sas fakasaitun. Dewa katanya, nusnga sinu ban at nafamababaun sa sangay taw Babilunya at maligung si ay furuan, kanya ban gleleg tua.

¹⁰ Nafalganan kwan namadasug sik faurianan ste fag furuan, abat ngate, fagmasineun. Ay namagbilug kban anya sas Babilunya at fun, ay kanya nangirug. Au, Yawi, taglong tuy.’

^11-12 “Ay longi yangay sas Uda at fun fag talanan, Dabid at ngay kasugfunanan te, ‘Dungugani Yawi at ngay longan: Fasii tua gugat ayu fagmatuyanun. Gubuki at nafangkamulan. Ay falangfei anya fagayu siginan tagfaidapan. Nu dway ban am gfakamulun takatanya, umdasug sa ayu ku dotama takata igang at yud e mafarabung ya, aroro sa ay nafakamulun at mauri.

¹³ Ku ngay fawayan fag ngay taw Erusalem tagbanwan sis tungud buksul fag datag, kamatungudun am glong te, “We manamawayan antam ste tam fagbanwanan at mogat!”

¹⁴ Dewa katanya, namaurianan au ayu kata ay ngay nafakamulun. Nangirug au ay fagagbilugun fag ngay araw yakmay ankirug fagayu si ay ligung. Au, Yawi, taglong tuy.’ ”