Eremyas 20 - Fanawbuid tagsibaliwas Fakayabian

Eremyas ay Pasur

¹ Pasur, Imer at baguama, tagfangguna sis Yawi at bale. Kanya nu nadungug Eremyas at ngay foyungan,

² kanya nasugu te, falangi Eremyas ay ubungi sis Yawi at bale, si sik sakbawan at nafangayan te, Benamin at sakbawan.

³ Ay balabag di, Pasur nafalfas wan Eremyas siginans fagubungan, ay Eremyas nalong sa anya te, “Pasur, Yawi natubus wan am ngayan. Katsi, am ngayan Magur-Misabib.

⁴ Katatuy Yawi at longan: Umlimu ban o takadasug sa emu ay sa am ngay fagadgalangan. Lumag ban o ngay fawayan nu gfabul kanya fag ngay taw sis fagawayanan. Namagbilug kban talun Uda sas Babilunya at fun. Ay kanya ban fag fun gfabul tibak taw Uda, ay tiba bank taw gatabanan.

⁵ Namon kban sat ngay fawayan Erusalem at ngay ramraman: at ngay fagagbilugun at mabyat nu kabayad, ay fagayu at nainlufuyan, ay anggan Uda at fun at ramraman. Ay kanya ban fagayu namuba kafag ngay ramraman sas talun Babilunya.

⁶ Pasur, e nantaban ban emu gasfuan am ngay kalongan sas talun Babilunya. Ay sanya yangay ban nu kabul o ay nu gfoli am bilug, gasfuan am ngay fagadgalangan am fakamuagan.”

Eremyas Nafamayud sas Yawi

⁷ Yawi, nafaylatan o ay nagbilug angku. Ngay taw kase gfalingun angku.

⁸ Yawi, galay au namoyung am longan, ku fagfoyungun gugat sa way lang baliwa nu karasras ay fakabulun! Nu katanya, ngay taw kase ay gfalingun angku.

⁹ Tiba ginan, gamatangan au te, deyud ya ku nafoyung sabaliwa emu ay ku nafamoyung am ngay suguan sa angku. Dewa katanya, kwa nafaragang, aroro am ngay longan kata sik afuy tagigang si ku amatanganan ay si ku ngay bini.

¹⁰ Nadungug au kafag ngay taw nu ginasan gfalingun angku. Ay kanya fagayu glong kata ku longan te, “Malimu takadasug sa antam!” Ay glong yangay fia te, “Gewan, katsi wan at buknga nu namasud tam Eremyas.” Anggan ku ngay fagadgalangan gfanya nu kafaurianan au. Kanya fagayu glong te, “Bangaran ro manandaya tua tam anya. Nu nfasludan tua ban takatanya, nababo tam ay mafasud anya.”

¹¹ Yawi, kafag ngay taw at algan sa angku dewa kata kanya, gufud tuo angku. Kata o sik tagfawayan at maseganama ay at mabalyanan. Nu katanya, kanya ban fagayu wa gbabo angku ay umfaurianan ban ay umke fakaplaun takamatang gugat.

¹² Yawi at Mabalyanan, saful way o nu sinu at matuyan aroro saful o at ngay amatanganan. Falagi sa angku nu gfasud o sa kafag ngay taw, aroro nafatigwanan kwan sa emu takatanya fagayu.

¹³ Yawi, gfauseganan au ay galubad sa emu, aroro nafalangfe tuo ngay taw at yud e kwa siginan at mauri fag ngay taw.

¹⁴ Dewa katanya, kauri kway ku fangasalug fag menit! Kwa guseganan nu ginain fag menit ku mina nu gfasalug angku.

¹⁵ Kauri kyangay at nabarita sa ku mama te, “Munama am sisian!” ay at nafae fagusegananun ku mama.

¹⁶ Kanya nangus fag taw umfaurianan kata Yawi at fagyudun anfanyu giklas fag ngay furuan. Buktung menit nangus kanya fag taw at dungganan taguro way lang gfandeng sis fagawayanan.

¹⁷ Aroro kanya wa nafabul angku gina au si ku mina at ungdan, ay ku fagfolian nangus ku mina wan at ungdan ay mannga ku mina nangus gfafion way gugat angku.

¹⁸ Wain ro ku faginsalugun yay? O laman nandalan au at maksvn fag fagidapun, o ay nangabul au sas fakaplaun?