Eremyas 2 - Fanawbuid tagsibaliwas Fakayabian

Ngay Taw Israel Natalyuyan Yawi

¹ Yawi nalong sa angku te,

² “Loi sas furuan Erusalem ay nanlong o sa sangay taw te, ‘Namatang au ebi ay fagmatuyanun ay nu kesug am angku kata sik baguina at bagu kadadwa. Nafaning tuam angku dewa am sis talun at yud e taw sat yud batang e gtanum fag daga.

³ Ngay taw Israel, nafasamanan au ayu laman sa angku, kata taguna fag rawvg at nafon sa angku. Nafaurianan au at nafaidapan ayu, ay kanya fagayu anbul wan.’ Au, Yawi, taglong tuy.”

⁴ Ngay taw Israel, Akub at kasugfunanan, dungugani Yawi at longan.

⁵ Katatuy at longan: “Nataw fag asalanan ay ngay mangaguyang at nalag si angku, at fagnatalyuyanun angku? Kanya fagayu naseg at yud e masuad fag ngay fagsegan, nu katanya, kanya fagayu ansik yud yangay e masuad.

⁶ Kanya fagayu wa grvbvy ya angku dewa au at nafalangfe siginans talun Igiptu, ay at nafangguna sas talun at yud e taw, ay sa tagagangun, ay sat magong fag daga, ay sa sangay buksul, ay sat malimu, ay sat yud e gbanwan, ay sat yud e gdalan ya.

⁷ Ay nataban au ayu sat masine fag daga laman umke gutluan am, dewa katanya, fagnabanwan di am sanya, nafauri am ku nafili fag daga ay ansik mauri am.

⁸ Ay anggan ngay tagfon fanggalangun wa grvbvy ya angku. Ay ngay tagfoyung ku suguan wa yangay gtoglag ya angku. Ngay tagfangguna gfauri angku. Ay ngay taglong at foyungan sa way baliwas Baal at ngayan ay gseg at yud matuyan fag ngay fagsegan.

⁹ Nu katanya, gdog kyay namamatang ayu ay fagmauriun, anggan ban say ngay kasugfunanan. Au, Yawi, taglong tuy.”

¹⁰ Yawi gfataglayun nu glong te, “Difei sas Sipre fag furu tagsis wabilug dagat sabaliwas fakayabian, ay sugui yangay sas Kedar sabaliwas fakamenitan, ay nanginsaful am te, o anfasludan takatanya.

¹¹ O nunda tibak talun at taw natubus at ngay fagsegan deyud matuyan? Au wan at mabalyanan fag Dius, dewa katanya, ku ngay taw naseg wan tibak fagsegan abat ngate gseg angku.

¹² Ay fagdaul banwa anlipsik aroro sa kafag ngay taw at nafakamulun, ay at kaksvnan nu kalimu gtadtaruyan. Au, Yawi, taglong tuy.

¹³ Ku ngay taw nafakamulun duak asalanan: kanya fagayu natalyuyan angku, au oma tagfon leleg fag bulbug, ay naseg tibak fagsegan kata nu naali sik bubun takalanggang way.

¹⁴ Siginan ngay taw Israel nu kasalug bundi sik ngay fagsuguan. Ay wain at ngay fawayan at fagnatabanun yay anya?

¹⁵ At ngay fawayan kata sik ngay liun gsubang anya fagayu, ay nafauri at ngay daga, ay nairug at ngay furuan, ay we gbanwan ya sanya.

¹⁶ Ngay taw Memfis ay taw Takpanes nafaidapan ngay taw Israel.

¹⁷ Ngay taw Israel, am yay at nafaurianan ayu, aroro natalyuyan am angku, au ay Dius Yawi at naufud ayu gina am glao.

¹⁸ Nataw ay nabul gina am nanangakbang sas talun Igiptu ay sas Asirya? Wain ay fagnasauns Liskung Nilu ay Eufrates?

¹⁹ Nu katanya, namaurianan au ayu aroro sa ay fagmauriun ay sa ay natalyuyanan angku. Amatangani nu se aksvn nu mauri am ay nu se maidap ay natalyuyanan ay ay nafamaboan angku. Au ay Fun, Yawi at Mabalyanan taglong tuy.

²⁰ Ebi gina am gafagsuguanan, kata am sik ngay baka at ke fantungud liug ay sik ngay taw at maubungan masiukan salambitan. Ay nafalfas koma ayu, dewa katanya, wam nafaning angku. Abat ngate, naseg wayam tibak fagsegan si tangabat fag ngay buksul ay si sangay fun kayu at marabung at lanbung, ay ankata am sik takamatugtug fag mangena.

²¹ Kata oma am sik masine fag wat ubas ku natanum, dewa katanya, wain ay faginkataun sik rawvg at madanan?

²² Dewa am gigus gugat ay grarus sa ay ngay bilug balugu, e lagan kyay gugat ay ngay asalanan. Au Yawi, ay Fun, taglong tuy.

²³ Setain nu malong am te, ‘Wami masuya ay wami gseg Baal?’ Amatangani nu se aksvn nu mauri ay ngay nafakamulun sis datag Inum ay tiba yak asalanan ay nafakamulun. Kata am sik kamelyu tina tagrvbvy at tama.

²⁴ Ay kata am tagsis talun fag asnu tina tagfangayuan yud e mafafaragang, ay asnu tama wa gidapan grvbvy. Ay masakit nu kalag gina gafaululun fag buknga.

²⁵ Ngay taw Israel, ay ngay lapak anyangfis wan ay ay ngay mirmir an-gong wan nu gseg am sa tibak fagsegan. Dewa kaksvn nya, glong yayam gugat te, ‘Wami kaylat gubun tibak fagsegan. Kesug waymi ay gfaning anya.’

²⁶ Ngay taw Israel, umkapla ban am kata at nagamatan fag tagfangkamul. Gafaplan ban am, anggan ay ngay fun, ay ay ngay tagfangguna, ay ay ngay tagfon fanggalangun ay ay ngay taglong.

²⁷ Ay glong am te, ‘Em mama sik kayu ay em mina sik gang.’ Natalyuyan am angku, dewa katanya, sayay ngap gugat angku nu nangakbang am.

²⁸ Ay wain? Dada wan katsi ay nawat fag ngay fagsegan? Kanyai wan ay faguroun. O makatu ro gfalangfe ayu sa ay fagidapun? Ay ngay fagsegan kayu oma ay ngay furuan sis talun Uda.

²⁹ Nu katanya, wain ay fagnangetun yay sa angku? O nunda wam nafabadbaboan angku?

³⁰ Nafauri koma ay ngay sisian, dewa katanya, wa naubun at fagmauriun, ay wa nafayfoyung. Ay nafabul wam ay ngay taglong, kata sik liun takalunus nu gfabul.

³¹ Katsi am fag kasugfunanan, dungugani ku longan. O nu glong am kata kway sik tagagangun fag daga, ay sik talun at madulum? Wain ay fagnalongun te, ‘Gfaning wami em fakaylatun ay wami kaylat ya nangakbang sas Yawi.’

³² O sik baguina kalyam at ngay dalag taganyang ay at fangadadwa fag lanbung? Ku ngay taw oma am, dewa katanya ngaduge wan nu yud am gamatang ya angku.

³³ At kasakit nu galabian am ay fakaylatun kesug. Am yay tagfoyung sa takamatugtug fag ngay mangena.

³⁴ Ay ngay lanbung gatagukun ngay taw at yud e asalanan ay at yud e kwa at taguk. Nafabul am anya fagayu deyud am batang glag nu gsakbo sa ay ngay bale. Ay dewa kaksvn nya ay nafakamulun,

³⁵ glong wayam te, ‘Wami e asalanan. Yawi wa kauri emi!’ Matuyan, namaurianan kban ayu aroro nalong am te, ‘Wami e asalanan.’

³⁶ Masakit ay malayun nu gtubus am ay fagadgalangan fag ngay talun. Dewa katanya, ay fagadgalangan ngap ban fag talun Igiptu gfapla yangay ayu kata talun Asirya at nafakamulun sa ayu.

³⁷ Gina ban am gduksun siginans talun Igiptu, gfasa ban am ay ngay tungud alfuyu ay ngay daluap at kaksvnan nu kapla am ay kabalu, aroro naiyan kwan ay fagadgalangan fag ngay talun, laman wa magubuk ya ayu.