Eremyas 19 - Fanawbuid tagsibaliwas Fakayabian

At Kinrufa fag Tikung

¹ Yawi nalong sa angku te, “Namayad o sik tikung sa takawat tikung. Sanya ginan, tabani tibak tagfangguna ay tagfon fanggalangun at ngay tagfangguna tiba,

² ay loi sas datag Ben-Inum munakbang sis Fagukasan ngay Tikung at Marufan fag sakbawan. Ay nu ndasug ro am sanya, longi ro sa anya fagayu ku ngay nalong emu.

³ Longi ro te, ‘Uda at ngay fun ay ngay taw Erusalem, katatuy Yawi at Mabalyanan, Israel at Dius, at longan: Gfadasug kban ste fag talun at maksvn fag faurianan ay fagayu ban at nadungug takatanya umlimu maksvn.

⁴ Namakamulun kban takatanya aroro ku ngay taw natalyuyan angku ay nafili sanya fag datag laman at fagnamonan at ngay fagirugun fag ngay fanggalangun sa sangay fagsegan at yud gleleg. Kanya fagayu ay anggan at ngay mangaguyang ay Uda at ngay fun wa toglag kafag fagsegan. Ay sanya fag datag kanya fagayu nafabul yangay at bagu kasalug fag ngay sisian.

⁵ Kanya fagayu nawat at fagnansegan fag bale laman sas Baal, ay nairug sanya at ngay sisian laman at ngay fanggalangun sanya fag fagsegan. Kwa oma nasugu sa anya fagayu takatanya, ay kwa yangay e amatanganan takatanya.

⁶ Nu katanya, au, Yawi, glong au te, madiriani tua aroro umdasug ban sik menit tuy fag datag wa kangayan ya te, Tufet ay datag Ben-Inum, nu bunway kangayan way ban lang te, Fagfabulan fag Datag.

⁷ “ ‘Nansalag au Uda ay Erusalem at algan. Ay nangagbilug kban at ngay fawayan laman gfabul anya fagayu, ay namaon kban at ngay bilug sa sangay manuk tungud ay sa sangay mangilafang tagsisad araw.

⁸ Nangiklas kban at furuan daul ay umsik fagfalingunun ban. Ay fagayu ban tagdalan sanya fag furuan garinun ay gfalingun sat kinfasludan.

⁹ At ngay fawayan ban nanligung kanya fag furuan yakmay ban ngay taw tagbanwan sanya at fakonun ankamin. Nu katanya, sanya ban umke fanlunus ay kanya ban fagayu kon at ngay ibama ay anggan at ngay mesa sisian.’ ”

¹⁰ Sanya ginan, Yawi nalong sa angku te, “Rufai am buba fag tikung si sangay taw at nanangalo emu at daga salubangan.

¹¹ Longi sa anya fagayu te, ‘Yawi at Mabalyanan glong te: Nanrasras au talun Uda ay furuan Erusalem kata nu grufa au tuy fag tikung at yud ya e manamadog ya nangawat. Kanya ban fagayu namoli ngayuk bilug at mabulan sas Tufet yakmay ankapnu kanya fag talun.

¹² Namakamulun kban takatanya sas Erusalem ay sas fagayu tagbanwan sanya. Gtuyan au kanya fag furuan te, masuya kata Tufet.

¹³ Fagayu bale sis Erusalem anggan fun Uda at bale gtuyan au te, masuya kata Tufet. Aroro sit ngay tungud bale kanya fagayu nairug ngay famaebebanglu laman sat ngay fagsegan fag ngay galeme, ay sanya yangay nu gfon at fanggalangun fag fanginum laman sa tibak ngay fagsegan.’ ”

¹⁴ Eremyas nu nalong wan Yawi at longan, kanya nalao siginans Tufet ay nasas Yawi at bale ay namalindug sis fagunan ay nalong sa sangay taw te,

¹⁵ “Yawi at Mabalyanan, Israel at Dius, glong te, ‘Namadasug kban sanya fag furuan ay sa sangay furuan ayu sirut sit ligung ku nalong fag faurianan aroro kanya fag ngay taw kamatungudunun ay wa gdungugan ku ngay longan.’ ”