Eremyas 18 - Fanawbuid tagsibaliwas Fakayabian

¹ Yawi nalong yangay angku te,

² “Loi sa takawat tikung at bale ay sanya ro nu glong au emu ku fagyalongun.”

³ Nu katanya, nalao au sa takawat tikung at bale ay nalag au kanya nu kawat.

⁴ Ay nu dyay masine at fakawatun fag tikung, kanya gfadog yay fia kawat yakmay ansine.

⁵ Sanya ginan, Yawi nalong sa angku te,

⁶ “Am fag ngay taw Israel, o nunda ro kwa mafafakamulun sa ayu kata sik takawat tikung at fangawat lifak? Nu setain kanya fag lifak nu si takawat tikung at daluap, am si yangay am ku daluap.

⁷ Nu nalong kro te, sik talun ay sik fagfagtainanan umfaurianan ay umkamin ay umrasras,

⁸ ay kanya ro nu nafaragang tua nu gfakamulun at mauri, kdi ro gfafasludan ku algan sa anya fagayu.

⁹ Ay nu nalong kway ro te, gdog kyay namalindug ay namaksvn sik talun ay sik fagfagtainanan,

¹⁰ ay kanya ro fag talun ay fagfagtainanan nu nafakamulun way at mauri ay way nafaning angku, kwa ro gfafasludan ya ku algan at masine sa anya fagayu.

¹¹ “Nu katanya, nanlong o sa sangay taw Uda ay sa sangay taw Erusalem te, ‘Dungugani! E algan au namaurianan ayu. Nu katanya, faragangi wan nu gugali am at mauri. Ay galay am at sadi ubuni wan ay fakamulun ay anggan ay ugali at mauri.’

¹² Dewa katanya, ngay taw gbalus te, ‘Duan! Gfataglayun wami em ngay fakaylatun; gfaning wami em amatanganan takamaogatun.’ ”

¹³ Nu katanya, katatuy Yawi at longan, “Intoi sa tibak talun te, ‘O e nadungug wam at kinfasludan takatanya?’ Ngay taw Israel wa oma e mamalong, dewa katanya, kanya nafakamulun nusnga setaw at mauri!

¹⁴ O dagat ro kalanggang? O sik liskung kasik fagtanuman? Duan!

¹⁵ Dewa katanya, ku ngay taw nalyam wan angku. Kanya fagayu girug famaebebanglu laman sa tibak ngay fagsegan. Ay kanya fagayu naubun wan at masine ay at matuyan fag dalan, ay nalao way sat yud matuyan, nu inda nu kalub.

¹⁶ Nu katanya, at talun ban umsik mabaluanan ay umsik tagafalingunan ban gugat. Ay fagayu ban tagdalan sanya maksvn nu kalimu ay gtadtaruyan.

¹⁷ Namarapyag kban anya fagayu sat ngay fawayan at daga salubangan kata sik tagmara at nafalayug lukbu siginans fakamenitan. Ay gaiyan kban anya fagayu ay kwa ban ggubuk ya gina gafaurianan.”

¹⁸ Sanya ginan, ngay taw glong sat ngay kaiban te, “Gewan, gbalyawvtan watam laman namaragang tam Eremyas! E ngay tagfon fanggalangun yangay si antam, tagfoyung sa antam ngay suguan, ay e mamatanganan yangay fag ngay taw si antam, ay e ngay taglong yangay tam tagfoyung Yawi at longan. Nu katanya, kawat tam sik ngay mamalong laman sas Eremyas ay lag tam gdungugan ya at ngay longan.”

¹⁹ Nu katanya, nadarangin au sas Yawi te, “Gubuki angku! Dungugi ku ngay fawayan at ngay algan sa angku.

²⁰ Masine oma ku nafakamulun sa anya fagayu, dewa katanya, at famasud sa angku, mauri way. Ay kanya fagayu nalusung laman ku fakatongan, dewa au ankakbang ay nadarangin sa emu te, ‘Lag o gfaurianan anya fagayu aroro sam dotama.’

²¹ Nu katanya, fabayani wan at ngay sisian nu kabul sis fanlunus ay sis awayan. Fasik ngay fagbubayuni wan at ngay mangena, ay fabayani wan at ngay sisian nu kabul. Ay fabayani yangay at ngay mangama nu kabul sas fakasaitun ay at ngay baguama nu kabul sas fagawayanan.

²² Fabayani wan kanya fagayu nu guro kalimu, gina at ngay fawayan nanrasras at ngay bale. Ay kanya fagayu nalusung laman ku fakatongan, ay nawat yangay sangdaw laman kasangdaw au.

²³ Dewa katanya, saful way o kanya fagayu at ngay algan laman namabul angku. Nu katanya, lag o gfalyam kanya fag ngay taw at ngay asalanan ay at ngay fagmauriun. Fabayani wan at ngay fawayan nu gbabo anya fagayu kaduge o gdama. Fadasugi wan am dotama sa anya fagayu.”