Eremyas 17 - Fanawbuid tagsibaliwas Fakayabian

Faurianan sa sangay taw Uda aroro sat Asalanan

¹ Yawi nalong te, “Ngay taw Uda, ay ngay asalanan marirukan si ay ngay amatanganan takamaogatun kata sik ngay longan at marirukan sis gang ay sis sunge tagsis fagirugan at ngay fugungan.

² Ay anggan ay ngay sisian nanseg yangay say ngay fagirugan ay sa sangay turuk fagtoglagan Asera fag fagsegan tagsi sangay fun kayu at marabung, ay tagsi sangay tungud buksul.

³ Nu katanya, nasugu au ay ngay fawayan laman namul ay ngay ramraman ay fagayu ay fagagbilugun, ay anggan ay fagnansegan fag ngay bale tagsis tungud buksul, aroro sa ay nafakamulun fag ngay asalanan sas fagdaul ay talun.

⁴ Bunwa ban am ya tagagbilug ku nafon ayu fag talun. Namasik ngay fagsuguan kban ayu sa ay ngay fawayan, sa ay fagyudun toglag fag talun, aroro nafadotama am angku, ay ku dotama kata sik ngay afuy tagigang at yud karabung ya.”

⁵ Yawi nalong yay fia te, “Namaurianan kban ngay taw at kinyayu siginan angku ay tagsaways taw nu gafanud.

⁶ Kanya fagayu umkata sik ngay fun kayu sirut tagsis talun at yud e taw, yud e fagmasineun ya sat fagunan fag ngay buknga. Kanya namanwan sat magong ay at mayat fag daga sit yud e gbanwan.

⁷ Dewa katanya, mauseganan tua sik taw tagafanud sa angku.

⁸ Kanya umkata sik fun kayu tagtugbung sis tigyangan liskung ay at ngay lalid tagdasug tua sasad mamam. Kafag fun kayu wa gafanawa dewa andasug tangaduge fag mangune. Ay at ngay don melo tua gugat ay di karagang nu grawvg.”

⁹ “Taw at amatanganan kamuag way gugat ay maksvn nu mauri. Sinu tagsaful te, kaksvn kanya nu mauri?

¹⁰ Dewa katanya, au Yawi, saful kway taw at basad ay at amatanganan. Namakamulun kban sas galay sik taw kata at ugali ay at nafakamulun.

¹¹ Sik taw at kinramraman siginan at yud masine fag balyawvtan kata way sik fanginan taglub sit yud sadili iklug. Ay gina ban swabilug at leleg, at ramraman ban umkalyam wan, ay umtuyan te, sik yud way e fagsafulun.”

¹² Yawi, siginan ebi am bale wan at masine fag fagbanwanan.

¹³ Yawi o wan Israel at fagsegun. Fagayu ban at kinyayu emu umkapla. E namoli ban anya fagayu sas daga, aroro kanya fagayu nafamabo emu, fag bukbuan leleg.

¹⁴ Yawi, o way lang at mafafia ay at mafalangfe angku. Ay o way lang ku fagfausegananun.

¹⁵ Ngay taw nainto sa angku te, “Dada wan Yawi at nalong? Wain dasug katsi at fagyudun kafasludan?”

¹⁶ Yawi, nafakamulun au am nafatigwanan sa angku fag fakamulun laman sik tagalaga am ngay taw. Kwa kaylat nu gfauri o anya fagayu. Saful way o ku ngay nalong.

¹⁷ Lag o gfalimu angku, aroro o wan ku fagsarigan gina e fagmauriun.

¹⁸ Falimui ay faplai fagayu tagfauri angku. Ay fadasugi sa anya fagayu fagmauriun laman umkamin wan. Dewa katanya, lag gfakamulun sa angku takatanya.

Famiangalay fag Menit

¹⁹ Yawi nalong sa angku te, “Loi sas furuan Erusalem at ngay sakbawan. Nanmalindug o sas sakbawan nu inda ngay taw Uda at ngay fun at fagloan fag dalan ay sanya ginan, dalanani sa tiba yak sakbawan.

²⁰ Ay nanlong o sas Uda at fun ay anggan sat fagfunanun fag ngay taw, anggan sa sangay taw tagbanwan sis Erusalem te, ‘Dungugani Yawi at longan.’

²¹ Katatuy Yawi at longan: Nu kesug yayam ay ngay sadili, lag am gfakamulun ay namuba ya nusnge wain fag famaloun sas Erusalem at ngay sakbawan gina Famiangalay fag Menit.

²² Anud, lag am gfakamulun ay lag namuba ay ngay famaloun siginan ay ngay bale ginanya fag menit. Tuyani fia te, kanya at mafasamanan fag menit. Kata kanya ku nafoyung sa ay ngay mangaguyang,

²³ dewa katanya, kanya fagayu wa nadungugan angku. Kanya fagayu kamaogatun at ngay amatanganan! Ay wa kaylat ku ngay foyungan.

²⁴ Dewa katanya, nu gfaning tua ban am ku longan ay nu ddi ban am namakamulun ay namuba ay ngay famaloun sas Erusalem at ngay sakbawan sis Famiangalay fag Menit, ay nu gtuyan tua ban am fia te, kanya at mafasamanan fag menit,

²⁵ gfon kban sa ayu at masine. Ay e gfunan tua ban gugat ayu sis Erusalem siginans fun Dabid at kasugfunanan. Kanya ban fag ngay fun ay at ngay tagfangguna nangadgaloan gsakay sis faguyudan fangawayan ay si sangay kabayu, gadgaloan ngay taw Uda ay ngay taw Erusalem. Ay e gbanwan tua ban gugat sis Erusalem.

²⁶ Ay ngay taw at nanseg Yawi at bale kadasug siginans Erusalem at ligung fag ngay talun, siginans Uda ay Benamin at ngay furuan, ay siginans sangay buksul tagsibaliwas fakayabian, ay tagsiginan tiba yak buksul, ay siginans Negeb. Kanya fagayu gbuba ngay fagirugun fag ngay fanggalangun, ay tiba yak fanggalangun, kata gutluan fag fanggalangun, at nafalganan fia fag fanggalangun, ay ngay famaebebanglu.

²⁷ Dewa katanya, nu dway ban am gfaning angku, ay nu dway ban am gfae masuad Famiangalay fag Menit, ay nu namuba way ban am ay ngay famaloun sas Erusalem at ngay sakbawan ginanya fag menit, nangirug kwan Erusalem at ngay sakbawan anggan ngay furuan at ngay fagtungkudan, ay wa ban e mafarabung ya!”