Eremyas 16 - Fanawbuid tagsibaliwas Fakayabian

Yawi Nasalag Eremyas nu Kamubay

¹ Yawi nalong yangay sa angku te,

² “Lag o kamubay ay kae sisian ste fag talun.

³ Nanlong au sa emu takadasug ban sa sangay sisian at kinsalug ste ay sat ngay fagtainan.

⁴ Kanya ban fagayu umbul siginan at maksvn fag fakasaitun. Wa ban e gamatang ya ay we namoli ya anya fagayu. At ngay bilug ban grapyagan sanya fag talun kata sik fagbaugun at ngay kek. Ay e kabul yangay ban sas awayan ay sas fanlunus. Sanya ginan ban ngay manuk tungud ay at madot fag ngay mela nangon kanya fag ngay taw at ngay bilug.”

⁵ Yawi nalong yay fia te, “Lag o gsakbo sa sik bale at ke mabulan. Lag o kabalu gasfuan ngay takabalu, ay lag o gfalag am fakafanyun sas nusnga sinu. Aroro kwa kesug ya ay kafanyu kanya fag ngay taw.

⁶ Kanya ban fagayu nangabul ste fag daga, dewa at maramraman ay at yud e kwa, ay wa ban e namoli ya anya fagayu. Ay wa ban e gfilas ya at sadili ay gfaufo at alfuyu laman gfalag te, kabalu.

⁷ Wa ban e namon fakonun ay fanginum laman namasun ngay takabalu, dewa at mama ay at mina at kinbul.

⁸ Lag yangay gsakbo sa sik bale at ke ngay falganan laman nanfangon ay nanginum.

⁹ Aroro au, Yawi at Mabalyanan, Israel at Dius, glong au te, ‘Lumag yay ban o nu gfaragang au ste fag talun at ngay taw nu guseganan, dewa at ngay bagu kadadwa nu guseganan.’

¹⁰ “Nu nalong ban o takatanya sanya fag ngay taw, ay kanya ban fagayu nu nainto te, ‘Wain Yawi at fagnafararangun te, kadasug ban sa emi takaksvn nya fag faurianan? Nataw em nafakamulun at mauri? Ay nataw em asalanan tagfauri Yawi em Dius?’

¹¹ Longi ban sa anya fagayu te, katatuy ku famalus: ‘Nafakamulun au takatatuy aroro ay ngay mangaguyang natalyuyan angku. Kanya fagayu nafaning ay naseg tibak fagsegan. Ay naubun angku ay wa nafaning ku suguan.

¹² Ay fagmauriun aksvn yap tua ay ngay mangaguyang at fagmauriun. Fagayu am nafaning am ay fagmauriun ay ay ngay amatanganan takamaogatun, abat ngate am nafaning angku.

¹³ Nu katanya, nangaiyan kwan ayu ste ginan fag talun, ay namabanwan au ayu sa ay fagyudun toglag fag talun, ay anggan ay ngay mangaguyang at fagyudun toglag. Ay gina ban am sanya fag talun, gseg ban am sa tibak fagsegan kayu menit ay yabi, ay kwa ban kafanyu ya ayu.’

¹⁴ “Abandi ban, ngay taw wa glong ya te, ‘Gfatuyanan au sas Yawi, tagleleg fag Dius at nafaduksun ngay taw Israel siginans talun Igiptu.’

¹⁵ Nu bunway, kata way ban tuy nu gfatuyanan: ‘Gfatuyanan au sas Yawi, tagleleg fag Dius at nafaduksun ngay taw Israel siginans fawalan fag alvngvdan fag talun, ay sa sangay talun nu inda nu gfasaruayan anya fagayu.’ Aroro namafoli kban anya fagayu sa ku nafon sat ngay mangaguyang fag talun.

¹⁶ “Dewa katanya katsi, namadasug kwan sa anya fagayu ngayuk fawayan kata sik ngay tagfangalbon at nanggamat anya fagayu. Ay namadasug kyangay ngay taglafat laman nanrvbvy anya fagayu sa sangay buksul, sasad araw ay sa sangay luib.

¹⁷ Nalag au kanya fagayu at ugali ay we masuksuk sa angku. Ay nalag kyangay kanya fagayu at ngay asalanan.

¹⁸ Nu katanya, namasud au anya fagayu duak kaksvn at fagmauriun ay at asalanan, siginan nu gfasuya ku talun ay siginan at ngay fagsegan at mauri ay at yud gleleg.”

¹⁹ Nalong au te, “Yawi, o wan ku fagmabitsugun ay ku tagfasun gina au kabalu. Fagayu talun at ngay taw tagsis fagdaul daga nangakbang sa emu ay nanlong te, ‘Em ngay mangaguyang at ngay fagsegan we masuad. Kanya fagayu we nafakamulun nusnge wain at masine.

²⁰ O nunda sik taw mawat way at Dius? Nu at nawat way ro, bunwa at matuyan fag Dius!’ ”

²¹ Yawi nalong te, “Nu katanya, katsi, namalag au sa anya fagayu ku fagmabalyananun ay ku fagsafulun laman kanya fagayu sumaful te, au wan Yawi.”