Eremyas 15 - Fanawbuid tagsibaliwas Fakayabian

Faurianan sa sangay taw Uda

¹ Yawi nalong sa angku te, “Dewa yay ro Muisis ay Samwel at namainfanyuan sa angku laman sanya fag ngay taw, kwa kafanyu ya anya fagayu. Nu katanya, namayayu o anya fagayu siginan angku. Nangaiyan wo anya fagayu!

² Ay kanya fagayu nu nainto te, ‘Dada ro nu glao ami?’ nanlong ro wo te, ‘Yawi glong te, Fagayu ku natuyan kabul sas fakasaitun, umbul sas fakasaitun. Ay ku natuyan te, kabul sas awayan umbul sas awayan, ay ku natuyan te, kabul sas fanlunus umbul sas fanlunus, ay ku natuyan te, gatabanan, e tumaban ban.’

³ “Au, Yawi, glong au te, namadasug kban sa anya fagayu ufatk faurianan: kanya ban fagayu kabul sas awayan, ay ngay idu nangguyudan at ngay bilug, ay ngay manuk tungud naninduk anya fagayu, ay tagfangagat fag ngay mela namamin at ngay nagsawadan.

⁴ Fagayu ban talun at ngay taw sas fagdaul daga kasuya anya fagayu, aroro sas Manase, Esekyas at baguama, at nafakamulun sas furuan Erusalem ebi gina kanya gfunan sis Uda.

⁵ Ngay taw Erusalem, sinu yaro takafanyu ayu? Sinu yaro at nanwayway laman sa ayu? Ay sinu yaro at nanginto sabaliwa ay kayaunanan?

⁶ Natalyuyan am ay anyayu siginan angku. Nu katanya, au, Yawi, glong au te, namalugde au ku ngay take laman namamin ayu ay kwa kafanyu ya ayu.

⁷ Namaurianan kban ayu kata upa nu kalayug sas sakbawan furuan daul. Namamin kban ayu anggan ay ngay sisian, aroro wam nafaragang nu gugali am at mauri.

⁸ Namayu kban ay ngay fagbubayun kayu lagnas sis tigyangan dagat. Sis buknga menit ban namadasug au at namaurianan ay ngay baguama at ngay mina. Ay gfadasug kban masakit sa ayu fakabaluun ay at malimu.

⁹ E sik mina at ke baguama fitu. Kanya karanug ay gidapan gengasan. Aroro at ngay baguama kata sik menit at kinfalyu gina mamenit yay. Ay kanya umkapla aroro we baguama ya. Ay namabul kban sas awayan fagayu at sawad. Au, Yawi, taglong tuy.”

Eremyas Gdarangin

¹⁰ Afanyuan au! Ku mina nangus wa nafasalug ya angku! Ngay taw Uda gfawayan gugat angku. Kwa oma e bedan ay kwa yangay e fagfabedanan sas nusnga sinu, dewa katanya, kanya fagayu kadotama angku.

¹¹ Yawi nalong sa angku te, “At matuyan, fagayu ban taw kaylat emu. Ay gina ban am ngay fawayan e fagidapun ay e fakabaluun namainfanyuan sa emu te, darangini anya fagayu.

¹² Nu setain nu yud e malifung sik tansu, wa yangay e mababo ngay tagfawayan tagsiginans fawalan fag alvngvdan.

¹³ Namagbilug kban say ngay fawayan ay ngay ramraman ay ay ngay fagagbilugun, aroro sa ay asalanan siginan ay nafakamulun at mauri sas fagdaul ay talun.

¹⁴ Namasik ngay fagsuguan kban ayu sa ay ngay fawayan, sa ay fagyudun toglag fag talun, ay namadasug kban sa ayu ku dotama kata sik afuy tagigang.”

¹⁵ Eremyas nalong te, “Yawi, saful wayo fagayu, amatangi tua ay gubuki angku. Fasudi sas fagayu at nafauri angku. Saful au te, di o masakit gfangauri. Nu katanya, lag o gfabayan ku ngay fawayan nu gfabul angku. Amatangi ku ngay naidapan laman sa emu.

¹⁶ Yawi, ebi gina o garingang sa angku, nadungugan au emu, ay guseganan au am ngay longan, ay kabavn si ktua gugat emu.

¹⁷ Kdi nanangalo kanya fag ngay taw nu nanguseganan ay nu nanfamanagsag. Gsadilian kway aroro nafae fakadotamaun o angku.

¹⁸ Wain ku fagidapanun yay gugat? Wain ku ngay bangbang way kafia ya? O ay namae fakabaluun way lang o angku kata sik liskung at kinlanggang gina mangune?”

¹⁹ Nu katanya, Yawi nalong sa angku te, “Nu gubun tuo am asalanan, namafoli au emu sa ku day tigyangan laman namataglayun o namakamulun sa angku. Nu matuyan tua ban fia fagayu am longan, ay nu gsaruy tua ban o fagayu at mauri, namadog kban nanfili emu laman ku taglong. At matuyan, kanya way ban fagayu at nangakbang sa emu.

²⁰ Namakata kban emu sik mogat fag alad at fangawat tansu laman sa sangay taw. Kanya ban fagayu namawayan emu, dewa katanya, wa ban gbabo aroro gufud ktua ban gugat emu. Gdiri kban ay gfalangfe emu. Au, Yawi, taglong tuy.

²¹ Ay gfalangfe kban emu sa sangay taw at mauri ay at madot.”