Eremyas 13 - Fanawbuid tagsibaliwas Fakayabian

Sik Faydayuanan sabaliwa sik Famutus Fagwan

¹ Yawi nalong te, “Loi wan ay namayad o sik famutus fagwan at mawatan siginan at masine fag ramit, ay futusi sam fagwan, dewa katanya, lag gbakbak ya.”

² Nu katanya, nanamayad au sik famutus fagwan fag ramit at masine, ay nafutus au sa ku fagwan kata Yawi at nalong sa angku.

³ Sanya ginan, Yawi nadog yay nalong angku te,

⁴ “Luasi wan siginan am fagwan am nabayad fag famutus fagwan, ay loi munakbang sis Liskung Eufrates, ay namasuksuk o sanya kafag famutus fagwan sa sik gang mabaltakan.”

⁵ Nu katanya, nalao au munakbang sis Liskung Eufrates kata Yawi at longan angku ay nanamasuksuk au sanya kanya fag famutus fagwan.

⁶ Ay nu nlangfe ngayuk menit, Yawi nadog yay nalong angku te, “Afolii yap sas Liskung Eufrates ay namul o am nafasuksuk fag famutus fagwan.”

⁷ Nu katanya, anfoli au sas Liskung Eufrates laman namul, ay kanya mangaro kagirat wan ay we tungkul ya.

^8-9 Sanya ginan, Yawi nalong sa angku te, “Katanya yangay ban takadasug sas Uda ay sas Israel at maksvn nu kamatungudun.

¹⁰ Kanya fag ngay taw at mauri, wa kaylat gfaning ku longan. Kanya fagayu nafaning way at sadili amatanganan ay naseg ngay fagsegan. Nu katanya, kanya ban fagayu umkata kafag famutus fagwan at yud e tungkul ya.

¹¹ Nu setain kanya fag famutus fagwan nu gfutus taw at fagwan, kaylat kyangay nangus ngay taw Uda ay taw Erusalem nu masadi sa angku. Nafili au anya fagayu laman namauseganan ay nanseg angku, dewa katanya, kanya fagayu wa naylat. Au, Yawi, taglong tuy.”

Faydayuanan sabaliwas Fagsuadan Fanlangu

¹² “Eremyas, nanlong o sa sangay taw Israel te, ‘Au Yawi, Israel at Dius, glong au te, fagayu ay fagsuadan fanlangu umkapnu fanlangu.’ Ay kanya fagayu nu glong way emu te, ‘Saful waymi te, em ngay fagsuadan ban umkapnu fanlangu,’

¹³ nanlong o sa anya fagayu te, ‘Yawi glong te, Namaurianan kban fagayu tagbanwan ste fag talun, kata nu nafalangu au anya fagayu. Namaurianan au ngay fun tagsiginans Dabid at ngay kasugfunanan, ngay tagfon fanggalangun, ngay taglong, ay fagayu taw Erusalem.

¹⁴ Namaadkatukan au ngay fagtainan ay at ngay sisian. Kwa ban kafanyu ya gfabul anya fagayu.’ Au, Yawi, taglong tuy.”

Famararang sabaliwa nu Kamatungudun

¹⁵ Dungugani fia ay lag am kamatungudun aroro Yawi garingang.

¹⁶ Fauseganani ay Dius Yawi kaduge yud nafadasug fagmadulumun, ay gina am yud anlub sat madulum fag ngay buksul. Kanya ban namasik maksvn fag fagmadulumun ay fagsegun fag mayamag.

¹⁷ Ay yayam gugat kaylat gdungugan, nanwayway au yud mafatoglagan aroro siginan ay fakamatungudunun. Nanwayway au maksvn ay ku liasun ganting, aroro e nantaban wan Yawi at nafili fag ngay taw.

¹⁸ Yawi nasugu angku te, “Nanlong o sas fun ay sat mina te, ‘Duksuni wan siginan at fagmalunggungan aroro munakbang wan nu gbul siginan at alfuyu at ngay sangbo.’ ”

¹⁹ Naningding wan sis Negeb fag ngay furuan at ngay sakbawan. Ay we masakbo ya ay we maduksun ya sanya ginan. Ay e nantaban wan fagayu tagbanwan sis Uda.

²⁰ Banawani ngay fawayan takadasug siginans fawalan fag alvngvdan. Furuan Erusalem, dada wan am ngay tagbanwan am fakamatungudunun fia, ebi ku nafatigwanan sa emu te, alagai?

²¹ Tain ro am namatangan at nagbilug emu nu am fagadgalangan way fag talun? O nunda ro nu gamatangan o wa kata sik mangena tagafasalugun wan?

²² Nu ginto o sam sadili te, “Wain ku faginfauriananun kata sik mangena at nagiratan at lanbung ay at natugtugan?” Andasug sa emu takatanya aroro siginan am asalanan at kayuan.

²³ O katubus yay sik taw at balat at malayung? O kuti daul tagridrirukun mafabali at sigyu? Duan! Am fag ngay taw Erusalem, katanya yangay am, wam mafakamulun ya at masine aroro maksvn wan ay ngay fakamulun nu mauri.

²⁴ Yawi nalong te, “Namarapyag au ayu kata tagmara tagsiginan at yud e taw fag talun, nu gfalayug ngay upa.

²⁵ Katanya ban takafasludan sa ayu. Katanya ku fagnamakamulunun sa ayu, aroro nalyam am angku, ay nafanud am sa ay ngay fagsegan.

²⁶ Namaksvn kban ay fakaplaun kata sik mangena at malulasan.

²⁷ Nalag au ay ngay nafakamulun at mauri nu gseg am ngay fagsegan, sa sangay buksul, ay sa sangay datag. Kata am sik mangena tagfaebayad, sik tagfanugtug ay sik takamatugtug at yud kagwanta ya nu namataladan. Ngay taw Erusalem, afanyuan am! Seduge ya ban nu katanya am?”