Eremyas 12 - Fanawbuid tagsibaliwas Fakayabian

Eremyas Nafamayud

¹ Yawi, kabavn matuyan tuo dewa au nafamayud sa emu. Ay katsi e fagintoun au sa emu: wain ro at mauri fag ngay taw at fakaramramanun? Ay wain ngay taw takamabo emu fagmanabayanun?

² Nafamanyun o sa anya fagayu kata sik fun kayu tangayu at rawvg. Ay kanya fagayu nu gfauseganan emu si way lang at longan ay wa siginan at amatanganan.

³ Yawi, dewa katanya, gtoglag tuo angku, ay saful way o ku amatanganan. Guyudani tuy fag ngay taw kata sik ngay tupa ay fasamani anya fagayu laman am fagfabulun.

⁴ Seduge ya ban lutuk nu magong ay ngay makmak nu mayangoan? Aroro siginan ngay taw at fagmauriun, ngay mangilafang ay ngay manuk tungud kabul wan. Ay kanya fagayu glong yay fia te, “Yawi wa glag em ngay fakamulun.”

Yawi at Famalus

⁵ Yawi glong sas Eremyas te, “Nu kalufuy wo gfagudgunan ngay taw, kaugat wa ro sas kabayu. Ay nu nlub way o sit madatag, kaugat wa ro sis day Liskung Urdan fag funfun.

⁶ Dewa am ngay faduksay ay am kalongan at nafamabo emu. Ay kanya fagayu anke algan mauri sa emu. Nu katanya, lag o gafanud kanya fagayu dewa mafalukmeanan fia nu garingang.”

⁷ Yawi glong te, “Natalyuyan kwan ku ngay taw, ku nafili fag talun, ay nafon kwa sat ngay fawayan.

⁸ Kanya fagayu nafawayan angku kata sik liun tagsubang sisad araw. Nu katanya, andotama au.

⁹ Ku nafili fag ngay taw anke fagmauriun maksvn sa angku, ay ankata sik tagfaninduk fag ngay manuk tungud. Ay tibak manuk tungud tagfaninduk naligung anya fagayu. Ay namasanya au at madot fag ngay mela laman nangon anya fagayu.

¹⁰ Ngayuk tagfangguna nanrasras Uda, ku nafangayan fia te, ku tanuman wat ubas. Ay kanya umkata sik talun at yud e taw.

¹¹ Ay kanya ban fag talun we tungkul ya. Ay kafag furuan umkata sik talun at yud e taw, aroro wa ban e ggubuk ya anya.

¹² At nanrasras kadasug siginans talun at yud e taw fag ngay tagbudbuksulanun. Ay gagbilug kban anya fagayu kata sik fiso tagsumbalian at uyup laman namauri galay sik taw, ay wa ban e malagyu ya.

¹³ Ku ngay taw natanum trigu, dewa katanya, at faggutluun ban dugi way. Ay kanya fagayu maksvn nu gfakamulun dewa katanya, wa ban e nagbulan. Kanya ban fagayu gumutlu fakaplaun aroro sa ku dotama at maksvn.”

¹⁴ Yawi nalong yangay te, “Katanya yangay ban ku fakamulun sat mauri fag ngay talun at munakbang sis Israel at narasras ku nafon fag fagbanwanan sa ku ngay taw. Gaiyan kban anya fagayu siginan at fagbanwanan kata nu gaiyan au ngay taw Uda siginan at talun.

¹⁵ Dewa katanya, gdog kyay ban kafanyu kanya fag ngay talun at ngay taw ay gfafoli sa anya at ngay daga.

¹⁶ Ay kanya ban fag ngay talun at taw nu gafanud tua fia sa angku kata ku ngay taw ay nu gfatuyan tua ban fia sa ku ngayan, kata at nafoyung sa ku ngay taw nu gfatuyanan sas Baal, kanya ban fagayu ku ngay taw yangay.

¹⁷ Dewa katanya, nusnga sinu ban fag talun at taw at yud gfaning angku, nangaiyan au siginan at talun ay namamin au anya fagayu. Au, Yawi, taglong tuy.”