Eremyas 11 - Fanawbuid tagsibaliwas Fakayabian

Uda wa Nafafasludan at Nasadian

¹ Yawi nalong sas Eremyas te,

² “Famatangi sa sangay taw Uda ay sa sangay taw Erusalem at ngay fagnamaningun si em nasadian.

³ Nanlong o sa anya fagayu te, au Yawi, Israel at Dius, glong au te, gfaurianan kban at yud gfaning kafag nasadian.

⁴ Katatuy em nasadian: gina au gfaduksun ay ngay mangaguyang siginans talun Igiptu takata sik faygangan daul at mafatinas sanbung, nalong au sa anya fagayu te, ‘Faningi ku ngay suguan, aroro nu gfaning tua ban am angku ay ku ngay suguan, am waban ku ngay taw, ay au ay Dius.

⁵ Nu katanya, gfafasludan au ku fatuyanan sa ay ngay mangaguyang te, gfon kban sa anya fagayu sik talun at masine ay at maramraman.’ Katsi, kanya wan ay fagbanwanan.” Au, Eremyas, nalong au te, “Yawi, katanya wa nangus fia.”

⁶ Sanya ginan, Yawi gdog yay nalong sa angku te, “Loi sa sangay furuan tagsis Uda ay sas furuan Erusalem fag ngay fagaweanan ay nanlong o sanya fag ngay taw te, ‘Amatangi ay nasadian ay faningi at marirukan sanya.

⁷ Siginan nu gfaduksun au ay ngay mangaguyang siginans talun Igiptu dasug katsi, gfamatang koma gugat sa anya fagayu te, faningi tua angku.

⁸ Dewa katanya, kanya fagayu wa nadungugan ay wa nsalag ku nalong. Abat ngate, nafaning way at fakamaogatunun ay at fagmauriun. Ay nalong au sa anya fagayu te, faningi tua tam nasadian. Dewa katanya, kanya fagayu wa nafaning. Nu katanya, nafadasug au sa anya fagayu faurianan kata at marirukan sis nasadian.’ ”

⁹ Yawi nalong yangay fia sa angku te, “Ngay taw Uda ay ngay taw Erusalem anke algan mauri sa angku.

¹⁰ Kanya fagayu nafakamulun at mauri kata at ngay mangaguyang at nafakamulun, ay ankuri ku longan ay naseg tibak fagsegan. Ngay taw Erusalem ay taw Uda wa nafaning em nasadian.

¹¹ Nu katanya, au, Yawi, glong au te, ‘Namadasug au sa anya fagayu sik faurianan at yud e malangfe. Ay kanya ban fagayu dewa get gubuk sa angku kwa ggubuk ya.

¹² Nu katanya, at fagnangetan gubuk sa way lang at ngay fagsegan at fagnamonan gugat ngay fanggalangun. Dewa katanya, faurianan nu ndasug, kanya fag ngay fagsegan wa mafalangfe nusnga sinu fag taw.

¹³ Ngay taw Uda, ay ngay fagsegan at kayuan kayu yangay ay furuan. Ay nu seyu sis furuan Erusalem at ngay fagaweanan, kayu yangay nya ay nawat fagirugan laman ay fagfonan ngay fanggalangun laman sas Baal fag fagsegan at maksvn nu mauri.’

¹⁴ “Nu katanya, Eremyas, lag o gdarangin ay lag o gfainfanyuan sa angku laman sa anya fagayu, aroro kwa ro gbalus ya anya fagayu nu naet gubuk gina e fagidapun.

¹⁵ Ku fakesugun fag ngay taw nafakamulun ngayuk fakamulun at maksvn nu mauri. Kanya fag ngay taw wa masine ya gsakbo sa ku bale. At ngay fanggalangun wa mafafaragang takadasug fag faurianan laman sa anya fagayu. Ay kanya fagayu guseganan way at fakamulun fagayu dewa mauri.”

¹⁶ Ebi Yawi nu gdama kanya fagayu kata oma sik fun kayu ulibu at marabung ay tangayu at rawvg, dewa katanya, gina ban at maksvn fag afuy nadalan, kanya fagayu umkamin kata at nairug fag ngay sanga at yud e fanambagun ya.

¹⁷ Yawi at Mabalyanan wan at nafili Uda ay Israel, dewa katanya, katsi gsugu wa te, “Famini wan anya fagayu aroro mauri at ngay fakamulun, ay nafauri angku siginan nu gfon at ngay fagirugun fag ngay fanggalangun sas Baal.”

At Mauri fag Algan sas Eremyas

¹⁸ Sanya ginan, Yawi nafasaful sa angku ku ngay fawayan at algan.

¹⁹ Kanya fagayu nu gamatangan angku kata kway sik fagfabulun fag tupa ay kwa saful te, mauri at algan. Kanya fagayu glong te, “Gfabul watam anya, kata nu gfuan sik fun kayu tangayu at rawvg, ay laman ban umkalyam wan ay we gamatang ya anya sas fagdaul daga.”

²⁰ Dewa katanya, nadarangin au te, “Yawi at Mabalyanan, matuyan tua nu ginsaful o, ay saful o taw at amatanganan. O wan tagfasud kanya fag ngay taw, nu katanya, gfatigwanan kwan sa emu ku ngay fakamulun.”

^21-22 Ngay taw Anatut e algan gfabul angku, kway gfaragang nu kamoyung au Yawi at longan. Nu katanya, Yawi at Mabalyanan nalong te, “Namaurianan au kanya fag ngay taw: at ngay baguama umbul sas awayan, ay at ngay sisian umbul sas lunus.

²³ Gina kban nafadasug faurianan, ngay taw sis furuan Anatut umkamin.”