Eremyas 10 - Fanawbuid tagsibaliwas Fakayabian

Faurianan sa nu Gseg Tibak Fagsegan

¹ Ngay taw Israel, dungugani Yawi at longan.

² Yawi nalong te, “Lag am gfaning tibak talun at ngay taw at ugali, tagrvbvy ngay fagtoglagan tagsis banwa. Lag am kalimu takatanya fag ngay fagtoglagan, tibak talun at ngay taw dewa kalimu.

³ Kanya fag ngay taw wa masuad at fakamulun. Kanya fagayu namul kayu sasad araw ay namawat at ngay fagsegan sa tagsaful kawat.

⁴ Sanya ginan, namadafut salapi ay gintu laman at famasine, ay namaksvn nu gsalod laman di kafuan.

⁵ At ngay fagsegan kata sik taw famalimu manuk tungud sis gamasun. Ngay taw namuba way aroro wa gleleg. Lag am kalimu kafag ngay fagsegan aroro wa mafakamulun at mauri ay wa yangay mafakamulun at masine.”

⁶ Yawi, we mafasud emu; mabalyanan tuo ay am ngayan kadungug.

⁷ O wan ngay talun at fun, sinu at yud kalimu emu? Masine ngay taw nu kalimu tua emu. Ay dewa at mamatanganan fag ngay taw ay fagayu fun siginan tibak talun, we mafasud emu.

⁸ Ngay taw tagsiginan tibak talun kamaogatun at ngay amatanganan, ay we fagsafulun ay tagfoyung anya, at yud way e tungkul fag ngay fagsegan at mawatan siginans kayu.

⁹ Kanya fagayu nafawat at ngay fagsegan sa tagsaful kawat, ay nadafut salapi tagsiginans Tarsis, ay gintu tagsiginans Ufas. Ay kanya fagayu nafasulun sik lanbung melo ay maubian ngay tagsaful kawat lanbung at nawat.

¹⁰ Yawi way lang at matuyan ay tagleleg fag Dius, ay at yud e fakatabuan fag Fun. Ay kanya nu ndotama, fagdaul daga guigan ay we taw magwanta.

¹¹ Nu katanya, nanlong am sa anya fagayu te, “Kafag ngay fagsegan at yud nawat banwa ay fagdaul daga, umkalyam wan siginans banwa ay fagdaul daga.”

¹² Siginan Yawi at fagmabalyananun ay at fagsafulun, kanya nawat banwa ay fagdaul daga.

¹³ Siginan at aringang banwa gfangalung, ay gfae linyabu siginan sangay fungfung daga. Ay gfae limbad gina karak, ay gfadasug tagmara siginan at fagfungsuan.

¹⁴ Ngay taw tagseg ngay fagsegan sik yud way mamatanganan ay yud e fagsafulun. Ngay takawat gintu umkapla sat nawat fag ngay fagsegan, aroro at awatan bunwa at matuyan fag fagsegan. Kanya fag ngay fagsegan wa gleleg,

¹⁵ ay we tungkul ay maksvn nu mauri. Gina ban gfaurianan fag menit, umkamin yangay ban at ngay awatan.

¹⁶ Dewa katanya, Akub at Dius di kata kafag ngay fagsegan. Kanya tua at nawat fagayu nusnge wain, ay kanya yangay at nafili ngay taw Israel. At ngayan Yawi at Mabalyanan.

Takadasug fag Faurianan

¹⁷ Am fag ngay taw Erusalem, falganani wan ay ngay famubaun ay loi wan, aroro ay ngay fawayan nanligung ayu laman namawayan.

¹⁸ Yawi nalong te, “Gaiyan kban ayu ste ginan fag talun, ay namaidapan kban ayu, yakmay ban am namatang te, maksvn nu kadotama au ayu.”

¹⁹ Ngay taw Erusalem glong te, “Maksvn wan nu gafaurianan tam! Tam ngay bangbang wa kafia ya. Dewa katanya, ginkidapan watam.

²⁰ Dius at bale ankiklas wan, ay e nataban wan tam ngay kaiban, ay wa ban e nangawat ya tam ngay bale.”

²¹ Anfasludan sa antam takatatuy fagayu, aroro tam ngay tagfangguna kata way sik ngay taw at yud e fagsafulun, ay wa nanangakbang sas Yawi laman nanget gubuk. Nu katanya, kanya fagayu nababawan, ay at fagfunanun fag ngay taw nalagyu wan.

²² Dungugani ngay tagfawayan takadasug siginans fawalan fag alvngvdan nu gtadtalasan! Kanya fagayu nanrasras Uda at ngay furuan ay at namanwan ban sanya ngay idu talun way lang.

Eremyas at Darangin

²³ Yawi, nasaful au te, bunwa taw tagagbilug at leleg ay wa saful takadasug sa anya.

²⁴ Yawi, foyungi emi tagalvngvdan si em nafakamulun, ay lag o gfaurianan emi siginan am dotama, aroro mankamin ami.

²⁵ Fadasugi am dotama sa sangay talun at taw at yud natoglag emu ay sa sangay taw at yud nangakbang sa emu, aroro kanya fagayu nafamin Akub at kasugfunanan ay naiklas at ngay bale.