Ebreu 9 - Fanawbuid tagsibaliwas Fakayabian

Nu Gseg sis Bale Ramit Tagste Swa Daga

¹ Taguna fag nasadian e ngay faugali sabaliwa nu gseg, ay ste swa daga e bale ramit fagnansegan Dius.

² Ay kafag bale ramit e duak suluk. Taguna fag suluk nafangayan te, at Mafasamanan fag Suluk. Ay mafasakboan sanya, salung ay sik fagfatungkudan ay sanya yangay sik ngay tinapay laman at fanggalangun sas Dius.

³ At faduak suluk tagsi baliwa fantaba fag ramit daul, nafangayan te, at Mafasamanan Fia fag Suluk.

⁴ At mafasakboan sanya sik fagirugan famaebebanglu at mawatan siginans gintu, ay fagsuadan Nasadian at madafutan gintu. Ay sanya fag fagsuadan Nasadian masuadan sik gintu fag taya e bilug mana. Ay sanya yangay Arun at tulag at natandug, ay anggan fagduak dalifi fagrirukan Dius at nasadian.

⁵ Ay sis tungud fagsuadan e ngay awatan at ke fakfak, at fagsafulan te, Dius sanya. Ay at ngay fakfak glanbung fagfalyaman asalanan fag suklub. Dewa katanya, katsi wami mafafayamag sabaliwa kanya fagayu.

⁶ Kata kanya nu mafasinean ngay fagagbilugun sis Fagnansegan fag Bale. Ay ngay tagfon fanggalangun gsakbo gugat sa taguna fag suluk laman gfafasludan at fakamulun.

⁷ Ay at manansakbo sat faduak suluk, tiba tungud way lang fag tagfon fanggalangun, nustua sadi ginan way galay sik banwa. Ay galay kanya gsakbo sanya fag suluk, kanya gbuba sik fanggalangun fag taguk, laman famalyam at sadili asalanan ay anggan fagayu taw at yud algan fag ngay asalanan.

⁸ Kata kanya at Masine fag Falad nu gfasaful te, ya maluangan dalan tagsat Mafasamanan Fia fag Suluk sis banwa kaduge ban nu sanya yay bale ramit fagnansegan Dius.

⁹ Kafag bale ramit sik faydayuanan way sabaliwa katsi fag buknga. Nu katanya, mayamag te, ngay tagfon fanggalangun at nafon fag ngay fanggalangun wa mafafasine ngay tagseg at ngay amatanganan.

¹⁰ Kafag ngay tagfon fanggalangun at ngay nafakamulun sa way lang baliwas fakonun ay fanginum ay ngay balyawvtan nu gfegus, ay tagste swa daga fag ngay ugali. Takatanya fagayu sik famanya way yakmay andasug Dius nu gfabagu fagayu nusnge wain.

Tam Fun Isus at Taguk at Masuad

¹¹ Ay Dius at Nafili andasug laman tiba tungud fag tagfon fanggalangun. Ay kanya nafosuk sa antam sik fagmasineun, gtungud tua tam fagdalanun katsi. Ay katsi kanya gfakamulun sis fagnansegan Dius fag bale ramit, bunwa taw at nawat ay wa ste swa daga.

¹² Dius at Nafili sadi ginan way gsakbo sat Mafasamanan Fia fag Suluk, ay ansak wan. Ay gina kanya gsakbo at buba bunwa kambing ay baka riangan at taguk, nu bunway at sadili tua taguk, ay nafon tua sa antam sik fakalangfean at yud ban e fakatabuan kabavn.

¹³ Gfaning Muisis at Faugali, sik taw nu nke malong way, masine nu gramsig sa anya kambing ay lawis baka at taguk ay nagdafugan siginans fagirugan fanggalangun, laman famalyam kafag taw at malong.

¹⁴ Tam Fun Isus at taguk gtungud tua nu nafafasine tam amatanganan ay tam basad laman gtalyuyan watam at yud e tungkul fag fakamulun, ay gfaning tua tam tagleleg fag Dius. Tam Fun Isus di e malong, ay nafon at sadili sas Dius siginan at Masine fag Falad at yud e fakatabuan.

¹⁵ Ay sit bagu fag nasadian, tam Fun Isus wan tagwabilug Dius sat nafili fag ngay taw. Aroro siginan at nabulanan, kanya nafalyam wan ngay taw at fakamaboun sa taguna fag nasadian. Nu katanya, Dius at nafili fag ngay taw mul tua ban at nafatuyanan fag famonun at yud e fakatabuan.

¹⁶ Nu e rirukan ay nu e suguan taguyan, at masine nu gfatuyan te, anbul wan at nafakamulun katanya.

¹⁷ Aroro kanya fag rirukan ye tungkul kaduge kafag taw gleleg, nu kae tungkul gina ya kafag taw anbul.

¹⁸ Nu katanya, anggan dewa taguna fag nasadian we famaksvn nu dway ro nafon at ngay fanggalangun at taguk.

¹⁹ Muisis gina gfoyung Dius at longan sas fagayu taw, kanya nabul sik baka riangan at taguk ay kambing at taguk gsuglatan sik mamam, ay sik tupa sigyu maraska, ay sik balanuy, ay kanya nafaramsig sas Dius at Longan fag fafil ay sa sangay taw.

²⁰ Kadugenya, Muisis glong te, “Tuy fag taguk tagfaksvn nasadian Dius at suguan sa ayu.”

²¹ Ay Muisis nafaramsig taguk sat fagnansegan fag bale ramit ay anggan sas fagayu at fagagbilugun gina gseg.

²² Gfaning Muisis at Faugali, arvs fagayu nusnge wain nafasine sas taguk. Taguk nu dway anbusbus we mafafalyam asalanan.

Famalyam Asalanan siginan tua Isus at Nabulanan

²³ Fagayu nusnge wain tagsis bale ramit aninu yay lang tagsis banwa fag ngay fagagbilugun. Ay takatanya fag fanggalangun gfasine tagsis bale ramit fag ngay fagagbilugun. Dewa katanya, amasine yap fag fanggalangun tagfasine ngay fagagbilugun tagsis banwa fag bale ramit.

²⁴ Aroro tam Fun Isus at fagsakboan bunwa taw at nawat fag fagnansegan Dius fag bale ramit, nu bunway sa tuas banwa. Taw at nawat fag fagnansegan fag bale ramit sik aninu way at matuyan fag bale ramit tagsis banwa. Ay katsi tam Fun Isus si was Dius at daga salubangan, laman tam tagwabilug.

²⁵ Galay banwa taw Udyu at tiba tungud fag tagfon fanggalangun gsakbo sat Mafasamanan Fia fag Suluk gbuba at fanggalangun at taguk. Ay tam Fun Isus nu gsakbo sadi ginan way laman namon at sadili.

²⁶ Nu katanya way ro, tam Fun Isus ro gdog way gugat gidapan siginan ngay fagdaul daga nu bagu nkawat. Ay at matuyan, kanya sadi ginan way kasure, katsi gina fakatabuan fag ngay buknga, laman gfamin wan asalanan siginan nu gfon at sadili.

²⁷ Ay Dius at ke algan te, ngay taw nu kabul sayginan way, ay sanya ginan nanginsaful at ngay nafakamulun.

²⁸ Katanya yangay, tam Fun Isus sadi ginan way gfon at sadili laman sik fanggalangun famalyam fagayu taw at ngay asalanan, ay kanya ban gdog yay kadasug, bunwa te, laman namamin ngay asalanan nu bunway laman namalangfe tua fagayu tagfanya anya.