Ebreu 8 - Fanawbuid tagsibaliwas Fakayabian

Isus Tam Tiba Tungud fag Tagfon Fanggalangun

¹ Katatuy fagdaul ku foyungan ayu te, e tiba tungud tam fag tagfon fanggalangun at malunggung sis banwa sat mabalyanan fag Dius at siun.

² Kanya gfakamulun laman sik tagfon fanggalangun sis fagnansegan Dius fag bale ramit. Kanya, bunwa taw at nawat, nu bunway Dius tua.

³ Nafili fagayu tiba tungud fag ngay tagfon fanggalangun laman tagfon ngay famonun ay ngay fanggalangun. Nu katanya anggan nangus tam tiba tungud fag tagfon fanggalangun e famonun yangay.

⁴ Kanya ro nu ste way gugat swa daga, bunwa sik tagfon fanggalangun aroro e ngay tagfon fanggalangun wan at kinfili siginans Muisis at Faugali.

⁵ Kafag ngay tagfon fanggalangun at fagfakamulunan fag bale sik fafaskudanan way ay sik aninu tagsis banwa fag bale ramit. Aroro gina Muisis ganangawatun kafag bale ramit, maksvn Dius nu gsugu anya te, “Fakamuluni fagayu nusnge wain kata ku nafalag sa emu fag fagfaningan gina o sis buksul.”

⁶ Dewa katanya Isus at fakamulun amasine yap tua ngay tagfon fanggalangun at fakamulun. Ay kanya tagwabilug Dius ay taw at nasadian. Ay kanya fag nasadian gtungud tua at dan fag nasadian, aroro kanya fag nasadian siginan sangay fatuyanan tagtungud tua nu masine.

⁷ Taguna fag nasadian yaman e kurang yay, diwan ya ro at bagu fag nasadian.

⁸ Tam Fun nalag at furuan at kakurangan, ay kanya nalong te, “Kadasug ban sik menit, nangawat kban sik bagu fag nasadian sa sangay taw Israel ay sa sangay taw Uda.

⁹ Ay kanya ban fag nasadian di ban kata ku nasadian sat ngay mangaguyang, gina au gtaban anya fagayu siginans talun Igiptu. Kanya fag ngay taw wa nafataglayun nu masadi sa angku, nu katanya nafabayan kwan anya fagayu.”

¹⁰ Tam Fun nalong te, “Katatuy ban katsi ku nasadian fia sa sangay taw Israel: Nu ntabu ban kafag ngay menit, gtanum kban ku ngay longan sa kafag ngay taw at ngay basad, ay griruk kban sat ngay amatanganan. Ay au ban kafag ngay taw at Dius, ay kanya ban fagayu ku ngay taw.

¹¹ Kanya ban fagayu wa fagfoyungun ya, ay wa ban glong ya sat ngay iba te, ‘Toglagi tam Fun,’ aroro kanya ban fagayu tumoglag tua angku, dewa at mafalingun ay anggan tiba tungud fag taw.

¹² Aroro ginanya ban gfalyam kwan kafag ngay taw at fagmauriun, ay kwa ban gamatangan ya at ngay asalanan.”

¹³ Gina Dius nalong sabaliwa at bagu fag nasadian, kanya nafae yud e tungkul taguna fag nasadian. Ay nusnge wain at yud e masuad ya ay tagakalyamun wan, umkalyam wan.