Ebreu 6 - Fanawbuid tagsibaliwas Fakayabian

^1-2 Nu katanya, tam fagadalun sabaliwa tam Fun Isus, diwan ya taguna fag foyungan, nu bunway tagfaksvn tua tam fagafanudun. Lag tam gdog gadal sabaliwa nu gubun tam tam ngay nafakamulun at mauri tagfadasug antam sas fakabulun, ay sa baliwa nu setain nu gafanud tam sas Dius, ay sabaliwa nu gfasurung, ay sabaliwa nu e gfoli at daluap sas taw at alfuyu, ay sabaliwa at ngay kinbul nu gdog gleleg ay sabaliwa at yud e fakatabuan fag faurianan. Nu katanya yay gugat tam fagadalun, kata nu gdog tam nanturuk.

³ Nu bunway tam fagnangadalun at masuksuki tua fag foyungan, Dius nu kaylat.

⁴ We madog ya mafafoli sas fagafanudun ngay taw at natalyuyan Dius, kanya fag ngay taw at kinyamag oma ay at kinke afud wan sas Dius at nafon, ay at ke afud yangay sat Masine fag Falad.

⁵ Kanya fag ngay taw at nasaful wan Dius at longan at kamasinean, ay at fagmabalyananun takasure ban.

⁶ Kanya fag ngay taw at natalyuyan wan Dius, gdog yay natuktuk Dius at Baguama sas fasulungan kayu ay gbuba anya sas fakaplaun.

⁷ Dius gfon sik fagmasineun sa sik daga siginan nu gfarak gugat laman gfarugme, ay at natugbung fag ngay tanum grawvg laman e tungkul sa tagtanum.

⁸ Dewa katanya, tagtugbung sanya fag daga nu dugi way ay nu makmak way lang, we tungkul kafag daga, ay munakbang wan Dius nu gfauri anya. Ay sa ban at fakatabuan, girug wan.

⁹ Ku fakesugun fag ngay faduksay, dewa au nalong sa ayu takatanya, natuyan kwa te, matuyan si wam sfakalangfean.

¹⁰ Dius matuyan tua. Nu katanya, kanya di ban kalyam ay nafakamulun ay nu kesug am anya, ay dasug katsi gfataglayun tuam gfalag takatanya siginan nu ggubuk am at nafili fag ngay taw.

¹¹ Ay em fakaylatun galay am at sadi nu gfataglayun tuam ay fakamulun nu gugatan am gfalag ay fagmatuyanun sa ay ngay faduksay sitsigon bans fakatabuan laman ban mul tuam ay fagsegun.

¹² Nu katanya, dangay am momuy, nu bunway faningi tua ngay taw at nabul Dius at fatuyanan siginan at fagafanudun ay at fagagwantanun.

Dius at Fatuyanan Umfasludan

¹³ Dius nu gfatuyanan sas Abrayam, nalong at sadili ngayan laman at famatuyan, aroro we mafasud anya.

¹⁴ Kanya nalong sas Abrayam te, “Gfatuyanan au sa emu te, ggubuk kban emu ay gfayu kban am kasugfunanan.”

¹⁵ Ay Abrayam nagwantan fia nafanya, nu katanya kanya nabul tua Dius at fatuyanan.

¹⁶ Ngay taw gfatuyan at longan siginan nu glong sik ngayan tagtungud tua anya. Sik taw nu nafatuyan wan at longan, karagang wan nu gkamatoan.

¹⁷ Katanya yangay Dius at fakamulun. Kanya kaylat fia gfatuyanan sat ngay fagfatuyanan te, “Gfafasludan kban ku fatuyanan,” ay kanya nalong sik longan laman at famatuyan.

¹⁸ Dius di gbadbalian ay di kamuag sabaliwa at fatuyanan ay at famatuyan fag longan. Nu katanya, itam katsi tagsarig sa anya e fagbakvdun tua tam ay e fagsegun te, gfafasludan ban at fatuyanan.

¹⁹ Tam fagbakvdun fag fagsegun, kanya wan at mogat ay at maksvn, tagfatawad tam leleg. Kanya ndasug tsiuy baliwa fantaba fag ramit, sat Mafasamanan fia fag Suluk.

²⁰ Isus naguna antam nasakbo sanya. Kanya ban sik tiba tungud fag tagfon fanggalangun kabavn kata Melkisedek.