Ebreu 5 - Fanawbuid tagsibaliwas Fakayabian

¹ Fagayu tiba tungud fag tagfon fanggalangun, anfili siginan sangay taw laman nanwabilug sas Dius ay sa sangay taw. Kanya gfon fanggalangun famalyam ngay taw at ngay asalanan.

² Ay aroro kanya sik taw yangay kata antam, kanya e fagmamomuyun yangay, ay kafanyu tua ngay taw at yud nasaful te, gsaruy wan siginan at matuyan fag dalan.

³ Ay aroro kanya e asalanan yangay, masine kanya nu gfon fanggalangun bundi lang famalyam at ngay iba at ngay asalanan, nu bunway anggan tua sat sadili asalanan.

⁴ Nusnga sinu fag taw wa msik tiba tungud fag tagfon fanggalangun at fagfausegananun nu at sadili way. Dius tua tagfili tiba tungud fag tagfon fanggalangun, kata nu gfili Arun.

⁵ Katanya yangay, bunwa tam Fun Isus at nafabat at sadili laman sik tiba tungud fag tagfon fanggalangun. Dius tua at nafili anya, ay nalong anya te, “O wan ku Baguama, ay katsi au wan am Mama.”

⁶ Sa tibak afud at Rirukan nalong yangay te, “Sik tagfon ban o fanggalangun kabavn kata Melkisedek.”

⁷ Ay Isus kaduge ste swa daga kanya gdarangin galiasun get sas Dius te, “Falangfei ban angku siginans fakabulun.” Ay Dius nadungug anya aroro kanya matuyan tua nu gfaning.

⁸ Kanya dewa Dius at Baguama, nadalan yay sa sangay fagidapun, laman siginan nu gagwantan sumaful sabaliwa nu gfaning Dius.

⁹ Ay kanya nu nafakamulun wan takatanya, kanya nafon tua at yud e fakatabuan fag fakalangfean sas fagayu taw tagfaning anya.

¹⁰ Nu katanya, Dius nafili anya laman tiba tungud fag tagfon fanggalangun, kata Melkisedek.

Famararang sabaliwa nu Gubun Fagafanudun

¹¹ Ngayu yay em fagyafoyungun sabaliwa takatatuy, dewa katanya gidapan ami gfafayamag sa ayu aroro maranan nu gtogdungug am.

¹² Katsi nangus sik ngay takamoyung wam. Ay dewa katanya dasug katsi fagfoyungun yayam gugat taguna fag foyungan sabaliwas Dius at Longan. Gayudan yayam gugat susu bilug, ay yam makatu kon at matugas fag fakonun.

¹³ Tagayudan susu bilug sisian yay, at yud yay nasaful sabaliwa at matuyan.

¹⁴ Ay at matugas fag fakonun kanya sa tua at mafagtainan at nasaful tua at matuyan ay at mauri.