Ebreu 4 - Fanawbuid tagsibaliwas Fakayabian

¹ Dius nafatuyanan sa antam te, manangadasug tua ban tam sat fagfiangalayan. Nu katanya, masine nu mafalganan tuam gugat laman ban nusdi sadi si ayu diam yud umdasug sanya.

² Aroro nadungug yangay tam at Masine fag Barita sabaliwas fakalangfean kata tam ngay mangaguyang. Dewa katanya tam ngay mangaguyang wa nafae masuad at nadungug fag barita, aroro kanya fagayu wa gafanud.

³ Itam way ban lang fag ngay tagafanud at madasug sas Dius at fagfiangalayan. Kata Dius at Longan te, “Aroro kadotama au, nafaksvn au ku longan te, ‘Kanya ban fag ngay taw wa madasug sa ku fagfiangalayan.’ ” Dius nalong takatanya dewa antabu wan fagayu at fakamulun siginan ngay nu kawat fagdaul daga.

⁴ Sis Dius at Longan sik afud nafoyung sabaliwas fafituk menit te, “Dius nafiangalay sis fafituk menit nu ntabu wan at fakamulun.”

⁵ Ay Dius gdog yay nalong sanya fag afud Rirukan te, “Kanya ban fag ngay taw wa madasug sa ku fagfiangalayan.”

⁶ At naguna nadungug at Masine fag Barita wa nadasug sas Dius at fagfiangalayan, aroro kamabo way. Ay at matuyan, e dumasug tua ban sas Dius at fagfiangalayan.

⁷ Nu katanya, Dius nadog yay nafili sik menit, ay kanya fag menit, katsi wan. Nu nlangfe ngaduge kbuknga, kanya naringang siginans fun Dabid te, “Katsi, nu nadungug am Dius at aringang, lag am kamaogatun ya ay amatanganan.”

⁸ Uswe ro at fagfanggunaun fag ngay taw nu si di wa ro at matuyan fag fagfiangalayan, Dius ro wa nalong ya sabaliwa takadasug ban fag fagfiangalayan.

⁹ At masuad, e kadasug yay ban sik fagfiangalayan laman sas Dius at ngay taw.

¹⁰ Aroro nusnga sinu fag taw at kumdasug sas Dius at nafalganan fag fagfiangalayan kanya ban gfiangalay yangay kata Dius nu gfiangalay gina ntabu kawat fagayu nusnge wain.

¹¹ Nu katanya, masine nu gugatan tua tam nangadasug sanya fag fagfiangalayan, laman ban di tam umkata ebi fag ngay taw at nafamabo.

¹² Dius at Longan gleleg ay maksvn tua ay amaglat yap tua sik fiso tagsumbalian at uyup. Kanya gurus antam ay gtalfus sa tam falad ay sa tam amatanganan ay anggan sa tam ngay lufuan ay tam basad bini, ay saful yangay ngay taw at amatanganan ay at ngay algan.

¹³ We taw masuksuk sas Dius. Aroro fagayu nusnge wain masure way sa anya, ay kanya glag way fagayu. Ay sa ban anya nu namoyung tam tam ngay nafakamulun.

Isus Tam Tiba Tungud fag Tagfon Fanggalangun

¹⁴ Nu katanya, dakngani e tiba tungud tam at mabalyanan fag Tagfon Fanggalangun at nasakbo sas banwa, we tiba nu bunway Isus, Dius at Baguama, maksvni tua nu gbakvd tam tam fagafanudun.

¹⁵ Tam Tiba Tungud fag Tagfon Fanggalangun kanya nasaful tam ngay kamomuyan, aroro kanya nadalan wan fagayu famaskud kata antam, ay dewa katanya, kanya we asalanan.

¹⁶ Nu katanya, lag tam gaduanun nangakbang sas Dius at mafangafanyu at daga salubangan, laman mul tam at fakafanyun ay at fagmagalangun taggubuk antam gina tam gayudan.