Ebreu 3 - Fanawbuid tagsibaliwas Fakayabian

Isus Gtungud Yay Muisis

¹ Ku ngay faduksay sas fagafanudun, ay sik ngay nafili yangay kata angku laman at nangaful sas banwa, masine nu gamatangan tuam gugat sa tam Isus, kanya sik nasugu laman tam Tiba Tungud fag Tagfon Fanggalangun sa tam fagafanudun.

² Tam Isus matuyan tua sat nafili anya, kata Muisis nu matuyan fia nu gfangguna Dius at ngay taw.

³ Sik taw takawat bale, at fagmasineun gtungud tua at fakawatun fag bale, ay katanya yangay tam Isus at fagmasineun gtungud tua Muisis at fagmasineun.

⁴ Nasaful tam te, galay sik bale e nawat, ay dewa katanya, Dius tua at nawat fagayu nusnge wain.

⁵ Muisis, Dius at fagsuguan, matuyan tua nu gfangguna Dius at ngay taw, ay fagayu at nafakamulun sik fafaskudanan sabaliwa takafasludan yay ban.

⁶ Ay dewa katanya tam Fun Isus matuyan tua nu gfunan Dius at ngay taw, aroro sia wan Dius at baguama. Ay itam wan Dius at sisian nu maksvn tua tam fagafanudun ay gbakvd tua tam fia tam fagsegun.

Dius at ngay Taw at Famiangalay

⁷ Nu katanya, kata at Masine fag Falad at longan te, “Katsi nu nadungug am Dius at aringang,

⁸ lag am kamaogatun ya ay amatanganan kata ay ngay mangaguyang ebi gina kanya fagayu gfawayan ay gfaskud Dius sis talun at yud e taw.

⁹ Dius nalong te, Sanya wan ay ngay mangaguyang nu gfaskud angku, dewa nalag wan ku ngay nafakamulun kaduge ufatk safuluk banwa.

¹⁰ Nu katanya, kadotama au kafag ngay taw, ay glong au te, kabavn at ngay amatanganan ngayayu way si angku, ay wa gfaning ku foyungan.

¹¹ Ay aroro kadotama au anya fagayu, nafaksvn au nu glong au te, ‘Kanya ban fag ngay taw wa madasug sa ku fagfiangalayan.’ ”

¹² Ku ngay faduksay, nu katanya, dirii tua laman diam gamatangan sat mauri ay di kalyam ay fagafanudun ay tumalyuyan tagleleg fag Dius.

¹³ Nu katanya, kayu menit ay kaduge e buknga yay, masine nu gfadfamatangan am, laman diam e gadayan asalanan tagfae fakamaboun ayu.

¹⁴ Fagayu tam ansadi watam fia sa tam Fun Isus nu maksvn tua ban gugat nu gafanud tam sa anya sitsigons fakatabuan.

¹⁵ Katatuy at longan sit Rirukan te, “Katsi nu nadungug am Dius at aringang, lag am kamaogatun ya ay amatanganan kata ay ngay mangaguyang ebi gina kanya fagayu gfawayan Dius.”

¹⁶ Sinu at nafawayan Dius dewa nadungug at aringang? O nunda bunwa Muisis at nataban fag ngay taw siginans talun Igiptu?

¹⁷ Sinu Dius at fakadotamaun kaduge ufatk safuluk banwa? O nunda bunwa kafag ngay tagasalanan at kinbul sis talun at yud e taw?

¹⁸ Dada Dius at fagfaksvnan at longan te, “Kanya fag ngay taw wa ban madasug sa ku fagfiangalayan”? O nunda bunwa sa kafag ngay taw takamabo?

¹⁹ Nu katanya, mayamag wan kanya fag ngay taw at fagyudun andasug sas Dius at fatuyanan fag daga aroro kanya fagayu wa gafanud sas Dius.