Ebreu 2 - Fanawbuid tagsibaliwas Fakayabian

Tiba Tungud fag Fakalangfean

¹ Nu katanya, masine nu gbakvd tua tam fia tam ngay nadungug laman di tam kalyam.

² Ngay tagbarita at foyungan matuyan. Ay fagayu takamabo kafag foyungan nabul wan at kasakan fag faurianan laman sa anya.

³ Katanya yangay, wa ban tam masaruy faurianan nu dway tam gfae tungkul tuy fag fakalangfean at yud e gfasud. Tam Fun wan taguna at nafoyung sabaliwa kanya fag fakalangfean, ay ngay taw at ngay nadungug siginan anya, kanya fagayu tagfatuyan te, matuyan.

⁴ Dius nafatuyan yangay sabaliwa kafag fakalangfean siginan at ngay fakamulun at mabalyanan ay at madulo ay siginan at Masine fag Falad at fon, at nafon sa sangay taw kata at fakaylatun.

Isus Tam Tagfalangfe

⁵ Bunwa sat ngay tagbarita Dius at fagfagbilugan at bagu ban fag fagdaul daga em fagfoyungun sa ayu.

⁶ Nu bunway katatuy at nafatuyan si sik afud at Rirukan te, “Wa mafanud ngay taw laman gamatangan o sabaliwa anya fagayu. Ay wain am fakesugun tua fia anya fagayu?

⁷ Wa glugo sirut nafababa o at kamafanudan, ay wa kamafanud ya ngay tagbarita, dewa katanya, nafon tuo sa anya fagayu sik fagmasineun ay sik famauseganan kata nu sik fun,

⁸ ay nafasa o at daga fagmabalyananun fagayu nusnge wain.” Ay gina Dius nafasas taw at daga fagmabalyananun fagayu nusnge wain, we yud ya e nafasa at daga fagmabalyananun. Ay dewa katanya, katsi ya tam glag fagayu nusnge wain nu sis taw at daga fagmabalyananun.

⁹ Dewa katanya, nalag watam Isus. Sik buknga sirut Dius nafababa Isus at kamafanudan, ay ginanya Isus wa kamafanud ya at ngay tagbarita. Ay dewa katanya, katsi Dius nafae fagmasineun tua anya ay nafauseganan aroro kanya nadalan wan sas fakabulun laman at nabulanan e tungkul tua sas fagayu taw aroro siginans Dius at fagmagalangun.

¹⁰ Dius nawat fagayu nusnge wain laman sat sadili, ay kanya anke algan gfadasug at ngay sisian sat fagmasineun. Ay naylat Isus nu kasik yud e malong fag tagfangguna siginan at naidapanan, laman gfalangfe at ngay sisian.

¹¹ Isus, at nafa yud e malong antam, ay itam, sadi way tam Mama. Nu katanya, Isus wa kapla gtuyan antam te, at ngay faduksay.

¹² Ay kanya nalong te, “Gfoyung au sa ku ngay faduksay sabaliwa emu, ay galubad au sik fagusegananun sis fagngayuan taw.”

¹³ Ay kanya nalong yangay te, “Gafanud au sas Dius.” Ay nalong yay fia te, “Ste au magamut sis Dius at ngay sisian, at nafon angku.”

¹⁴ Dakngani at ngay sisian sik taw fia, anggan Isus sik taw yangay fia, kanya, kata kafag ngay taw, e faknul ay e taguk, laman siginan at nabulanan nababo wan Satanas ke fagmabalyananun sas fakabulun.

¹⁵ Ay siginan takatanya, Isus nafalangfe wan fagayu taw siginan kafag ngay taw at fakalimuun gugat kabul.

¹⁶ Mayamag te, Isus at fagnanggubukun bunwa ngay tagbarita, nu bunway Abrayam tua at ngay kasugfunanan.

¹⁷ Nu katanya, Isus ansik taw kata antam sas fagayu at kayaunanan, laman ban kanya at mafangafanyu fia ay at matuyan tam Tiba Tungud fag Tagfon Fanggalangun sis Dius at daga salubangan, ay mafon fanggalangun famalyam fagayu taw at asalanan.

¹⁸ Isus nadalan wan ngay fagidapun gina gafaskudan, nu katanya katsi kanya mafagubuk tua ngay taw tagdalan sa sangay famaskud.