Ebreu 13 - Fanawbuid tagsibaliwas Fakayabian

At Mafauseganan Dius

¹ Fataglayuni nu kedkesugan am aroro tagfaduksay am sa tam Fun Isus.

² Lag kalyam gfasakbo ngay betaw. E nafakamulun wan takatanya, ay kanya wa saful te, at nafasakbo fag ngay betaw Dius wa mangaro at ngay tagbarita.

³ Ay afanyui yangay at ngay maubungan, kata nu maubungan yangay am. Ay afanyui yangay tagafalingunan, kata nu gafalingunan yangay am.

⁴ Fagayu am atuyani te, fakadadwaun mafanud, ay lag am gfanugtug ay namatugtug, aroro Dius gfaurianan ban nusnga sinu tagfakamulun takatanya.

⁵ Lag am galabian salapi. Useganani wan nusnga seyu ay ramraman. Aroro Dius nalong te, “Kdi gubun ay kdi gfabayan emu.”

⁶ Watam gawabilugan ya glong te, “Tam Fun wan ku taggubuk, nu katanya, kdi e fakalimuun. Nu katanya nataw ya ngay taw at fagmafakamulunun sa angku at mauri?”

⁷ Amatangi ay ngay tagfangguna at nafoyung Dius at longan sa ayu, ay amatangani nu setain kanya fagayu nu gugali at matuyan anggan anbul, ay faningi tua kafag ngay taw at ke fagafanudun.

⁸ Tam Fun Isus di gbadbalian. Nu setain kanya ebi, katanya yangay anggan katsi ay kabavn ban.

⁹ Lag am gatabanan sa tibak foyungan tagsaman ay nasaful. Masine nu gfaksvn tua tam tam ngay amatanganan siginans Dius at fagmagalangun, abat ngate tam gfaning ngay suguan sabaliwas fakonun. We tungkul nu gfaning tam takatanya fag ngay suguan.

¹⁰ Ngay tagfon fanggalangun tagfakamulun sis Dius at bale wa masine namasfuan antam nangon sa tam fagirugan.

¹¹ Tiba tungud fag tagfon fanggalangun gbuba fagbaugun at taguk sat Mafasamanan Fia fag Suluk, laman at fanggalangun famalyam asalanan, ay kafag ngay fanggalangun at ngay bilug nangirug wan sas day furuan.

¹² Katanya yangay, Isus anbul sas day furuan, ay siginan at sadili taguk, kanya nafayud e malong fagayu taw.

¹³ Nu katanya, nangakbang watam sas Isus sas day furuan ay nanginkaplan tam kata anya.

¹⁴ Aroro bundi ban ste swa daga tam fagbanwanan, nu bunway gfanya yay tam takadasug ban.

¹⁵ Nu katanya gfataglayun tam gugat gfauseganan Dius. Katanya tam fanggalangun sa anya siginan nu gfoyung tam te, gafanud tua tam sas Isus.

¹⁶ Ay lag tam kalyam gfakamulun at masine ay ggubuk tam iba aroro kanya wan tam Dius at fagusegananun fag fanggalangun.

¹⁷ Faningi tua ay ngay tagfangguna aroro kanya fagayu tagalaga ayu sabaliwas fanfalad fag famanwanun. Ay sa ban tibak menit kanya fagayu mesa namoyung sas Dius sabaliwa at ngay nafakamulun. Nu gfaning tuam anya fagayu, kanya fagayu guseganan tua gfakamulun at ngay fanambagun, ay di gidapan. Aroro nu gfaidapan way am anya fagayu, we fanambagun sa ayu.

¹⁸ Darangini emi. Natuyan ami te, masine tua em amatanganan, aroro kaylat tuami gugali at matuyan sas nusnge wain em fakamulun.

¹⁹ Ay kaugat yay nu get au sa ayu te, darangini angku laman ban masakit nu kafoli au sa ayu.

²⁰ Dius tagfon fagmanabayanun, kanya wan at nafadog yay nafaleleg tam tiba tungud fag Tagalaga, tam Fun Isus. Aroro siginan at nabulanan sas fasulungan kayu, at taguk nafaksvn at yud e fakatabuan fag nasadian.

²¹ Dius nangus gfon antam nusnge wain at masine laman namakamulun tam at fakaylatun, ay namakamulun sa antam nusnga setaw tagfauseganan anya siginan tam Fun Isus. Kabavn fauseganani anya. Anud.

Taguyan at Longanan ay at Darangin

²² Ku ngay faduksay, maksvn nu glong au sa ayu te, dungugani fia masine ku foyungan sa ayu. Munagud way tuy ku rirukan sa ayu.

²³ Kaylat au gfasaful ayu te, em faudgufudan tam faduksay Timuteu nalfas wan siginans fagubungan. Ay kanya ban nu ndasug di vtv stae, gtaban kban anya gina au sa ayu.

²⁴ Longi sa ay ngay tagfangguna ay sas Dius at ngay taw te, O manabayan tuam? Ay tam ngay faduksay sis talun Italya glong yangay ayu te, O manabayan tuam?

²⁵ Sumawa nangus fia ayu Dius at fagmagalangun.