Ebreu 12 - Fanawbuid tagsibaliwas Fakayabian

Dius Tam Mama

¹ Nu katanya, dakngani maligung tam ngayuk taw tagfatuyan, gubun watam fagayu tagsalag antam ay tam asalanan tagfatawad gugat antam, ay gugatan tua tam gfataglayun gafanud, kata nu ggudgunan tam.

² Kabavn tam mata fasai tuas Isus. Aroro kanya wan at nafasigad tam fagafanudun ay kanya yangay tagfaksvn. Aroro tagfanya anya fagusegananun tua, kanya nagwantan nangabul sas fasulungan kayu, ay wa namatangan fakaplaun. Ay sanya ginan kanya malunggung sis Dius at fagmalunggungan at siun.

³ Masine nu gamatangan tuam fia te, maksvn tua Isus nu gagwantan tagfawayan anya fag ngay taw tagasalanan nu gfaidapan, laman ban diam kalufuy ay di kamomuy ay amatanganan.

⁴ Yam e nagdalanan sak nafaugwag ay taguk, aroro siginan nu gfawayan am asalanan.

⁵ Am at ngay sisian, o nalyam wam Dius at foyungan sa ayu, tagfabitsug ay amatanganan fag ngay longan te, “Ku sisian, lag o gfae yud e tungkul tam Fun nu gatul emu, ay lag o kamomuy am amatanganan kanya nu naatul emu.

⁶ Aroro tam Fun gatul tua at fakesugun fag ngay taw, ay gfalang tua fagayu at nafangayan te, at sisian.”

⁷ Agwantani ay fagnandalanun fag fagidapun tuga ay mama at fangatul ayu. Kanya sik fagsafulan te, Dius gngayan ayu te, at ngay sisian. Sinu fag sisian at mama yud gatul ya? Duan.

⁸ Fagayu sisian gatulan tua. Dius ro nu dway gatul ya ayu, at masuad bunwa am fia at sisian.

⁹ Dewa tam mama ste swa daga gatul tua antam, ay gsuyu tua tam anya. Nu katanya, faugati yap nu gfaning tam tam Mama tagsis banwa, laman ban e leleg tua tam.

¹⁰ Gina tam alay, tam ngay mama gatul tua antam, gfaning at amatanganan te, katanya at matuyan. Ay Dius gatul fia antam laman e fagmasineun tua tam, ay laman tam ugali gfaning tua anya.

¹¹ Kaduge nu gatul antam, wa tam guseganan nu bunway gidapan way tam. Dewa katanya nu nafaning tua tam at fangatulun, masine tua tam fakamulun, ay umke fagmanabayanun tua ban tam.

Ngay Famararang ay ngay Suguan

¹² Nu katanya, fabitsugi ay ngay take at mamomuy wan, ay ay ngay tud taglukmean.

¹³ Turunani tua nu glao am sat masine fag dalan laman ban at ngay mamomuy di galbi, abat ngate mabitsug tua.

¹⁴ Ugatani ugalii manabayan sis fagayu taw at daga salubangan, ay dangay e malong, aroro nusnga sinu fag taw wa ban lumag tam Fun nu e malong way.

¹⁵ Madiriani tua galay am at sadi laman nusnga sinu si ayu di ban natalyuyan Dius at fagmagalangun. Dirii tua laman ban nusnga sinu am diam kata sik menal fag tanum tagtugbung ay tagfaidapan ay tagfauri ngayuk taw.

¹⁶ Galay am at sadi madiriani mandi laman ban diam gfanugtug ay laman ban diam nafae yud e tungkul ay fagafanudun kata Isaw. Kanya e fagnamulun aroro kanya at kaka, ay kanya nafabangsi way at fagnamulun sa sik fakonun.

¹⁷ Nasaful wam kanya naet sat mama te, “Fadantei wa ngani sa angku.” Dewa katanya at mama wa nafon at fagetun, aroro Isaw at nafakamulun wa kafafoli ya, kanya ro dewa gugat get gwayway.

¹⁸ Wam ankakbang kata ngay taw Israel nu kakbang sa sik buksul takalag, sas Buksul Sinay at ke afuy tagigang, ay at maksvn nu madulum, ay ke tagmara maksvn.

¹⁹ Ay kanya fagayu nadungug budyung at awang, ay sik aringang. Ay nu nadungug kafag aringang, nafainfanyuan te, “Aragangi wan kanya nu garingang sa emi.”

²⁰ Kanya fag ngay taw wa makatu ya gdungugan kanya fag suguan te, “Nusnga sinu fag taw ay nusnge wain fag fagbaugun at nalao sas buksul, e gfana gang yakmay anbul.”

²¹ Ay maksvn nu malimu takalag sis buksul, ay anggan Muisis nalong te, “Maksvn nu gtadtaruyan au kalimu.”

²² Ay andasug am sas Buksul Siun ay sa tagleleg fag Dius at furuan, tagsis banwa fag Erusalem, nu inda at yud katap ya fag ngay tagbarita nu maful guseganan.

²³ Ay andasug wam sas Dius at ngay taw at maful, at natuyan te, at ngay sisian taguna kasalug. Kanya fagayu at ngay ngayan marirukan tua sis banwa. Ay andasug am sas Dius tagwabilug fagayu taw, ay sat matuyan fag ngay taw at ngay falad, Dius at nafayud e malong.

²⁴ Ay andasug wam sas Isus, Tagwabilug sat Bagu fag Nasadian. At taguk at kinbusbus gfalyam asalanan, ay di kata Abel at taguk taget famasud.

²⁵ Nu katanya, am madiriani tua laman diam kauri gdungugan tagfoyung ayu. Ebi fag ngay taw at yud kaylat gdungugan Muisis at foyungan, wa nasaruy faurianan. Ay kaugat waban itam nu yud tam kalangfe nu dway tam kaylat gdungugan tagsiginans banwa fag foyungan.

²⁶ Ebi gina Dius naringang, daga nauigan. Ay at fatuyanan katsi te, “Sik lao kya ban nanguig, bundi ban lang daga nu bunway anggan tua ban banwa.”

²⁷ Nalong te, “Sik lao ya ban.” At masuad te, Dius ban gfamin fagayu nusnge wain at awatan takauig, laman ban fagayu nusnge wain at yud kauig we fakatabuan kabavn.

²⁸ Useganani aroro tam fagnamulun ban siginans Dius fag fagfagtainanan di ban kauig. Nu katanya, segi fauseganani tam Dius. Alimui fia faningi anya ay suyui tua anya.

²⁹ Aroro tam Dius kata sik afuy at mafafamin nusnge wain.