Ebreu 11 - Fanawbuid tagsibaliwas Fakayabian

Ngay Taw Tagafanud sas Dius

¹ E fagafanudun tua tam nu gtuyan tua tam te, tam ngay fagfanyaun kadasug ban fia, ay nu gafanud tua tam te, lumag ban tam tam nayud yay batang glag.

² Dius maksvn nu guseganan ebi taguna fag ngay taw, aroro gafanud tua sa anya.

³ Aroro siginan tam fagafanudun sas Dius, nasaful tua tam te, Dius nawat fagdaul daga siginan at longan, nu katanya, fagayu nusnge wain takalag ankawat siginan at yud kalag.

⁴ Aroro Abel gafanud tua sas Dius, at fanggalangun amasine yap tua Kain at fanggalangun. Ay aroro kanya gafanud tua, Dius natap anya te, sik taw matuyan aroro naylat at ngay fanggalangun. Ay Abel dewa anbul wan, e fagfoyungun yay sa antam, siginan at fagafanudun sas Dius.

⁵ Aroro Inuk gafanud tua sas Dius, wa nadalan fakabulun aroro Dius nabuba anya sas banwa. “We nalag ya anya aroro Dius nabuba anya.” Ay gina yud yay nabuba anya, Dius guseganan tua anya.

⁶ Sik taw at yud e fagafanudun wa mafauseganan Dius. Nusnga sinu at nangakbang sas Dius masine nu gafanud tua te, e Dius tagleleg ay tagfon at masine sas fagayu tagrvbvy anya.

⁷ Aroro Nui gafanud tua sas Dius, kanya nafaning tua Dius at Longan sabaliwa takadasug ban at yud yay nalag. Nui nawat sik sakayan lino laman talmanugangan umlangfe. Ay siginan Nui at fagafanudun, Dius nafadasug faurianan sas fagayu taw, dewa katanya, aroro Nui e fagafanudun tua, Dius natap tua anya kata nu yud e asalanan.

⁸ Aroro Abrayam gafanud tua sas Dius, kanya nafaning tua Dius nu nalong sa anya te, “Loi wan sa ku nafatuyanan sa emu fag talun.” Ay kanya nalao deyud nasaful at fakadasugan ban.

⁹ Ay aroro kanya e fagafanudun tua, kanya kata sik betaw gbanwan sis Dius at nafatuyanan sa anya fag talun. Ay kanya gbanwan sis bale ramit. Ay anggan Isak ay Akub nabanwan yangay sis bale ramit, ay nangagbilug yangay Dius at nafatuyanan sa anya.

¹⁰ Abrayam nafakamulun takatanya aroro at fagrvbvyun sik furuan tua daul at mogat at yud ban kaiklas, Dius at nafalganan ay at nawat.

¹¹ Aroro Abrayam gafanud tua sas Dius, kanya dewa mafufuama wan, ay Sara dewa garanas, anke sisian yay, aroro Abrayam gafanud tua te, Dius gfafasludan at fatuyanan.

¹² Nu katanya, dewa Abrayam gakabulun wan, anke kasugfunanan yay ngayu, kayu ngay galeme sis banwa ay kayu lagnas sis tigyangan dagat.

¹³ Kanya fag ngay taw anggan anbul gafanud tua gugat sas Dius. Ay kanya fagayu deyud yay nabul Dius at nafatuyanan, gtuyan tua te, mul yay ban. Ay natuyan sat ngay sadili te, sik ngay betaw way kaduge ste swa daga.

¹⁴ Kafag ngay taw tagamatangan takatanya gfatoglag te, grvbvy sik talun laman at fagagbilugun ban.

¹⁵ Ay kanya fagayu at fagamatanganun nu sa yay ebi at fagbanwanan fag talun, e buknga yay kafoli.

¹⁶ Ay kanya fag ngay taw at fakaylatun sik fagbanwanan at masine, tagtungud tagste swa daga fag fagbanwanan, at masuad te, tagsi tuas banwa fag fagbanwanan. Nu katanya, Dius wa kapla kafag ngay taw nu gtuyan anya te, at Dius, aroro kanya nafalganan wan sik furuan daul laman sanya fag ngay taw.

¹⁷ Aroro Abrayam gafanud tua sas Dius, kanya nafon at sisian Isak laman at fanggalangun sas Dius gina Dius gfaskud anya. Kanya mafalganan laman namon at mafilian fag baguama,

¹⁸ Dius dewa nafatuyanan sa anya te, “Takatap ban fia am kasugfunanan tagsiginan way lang bans Isak.”

¹⁹ Ay Abrayam gafanud tua te, Dius mafaleleg way ngay kinbul. Ay Isak anfoli yay sat mama kata nu siginan at fagmabulanan.

²⁰ Aroro Isak gafanud tua sas Dius, kanya nafadante tua sat duksay Akub ay Isaw laman ban duksay e fagmanabayanun tua.

²¹ Aroro Akub gafanud tua sas Dius, gina kanya gakabulun, nafadante yay sas Use at munama fagdua, ay gseg Dius gina gbakvdan sit tulag.

²² Aroro Use gafanud tua sas Dius, kanya gina gakabulun, nafoyung yay te, ngay taw Israel ban glo siginans talun Igiptu. Ay nasugu te, “Bubai ban ku bini sas talun Kanaan.”

²³ Aroro Muisis at ngay fagtainan gafanud tua sas Dius, Muisis nu nsalug wan, at mama ay at mina nafasuksuan anya kaduge tuluk magdanun aroro nalag te, kanya sik masine fag sisian. Ay kafag dadwa wa kalimu Igiptu at fun at suguan.

²⁴ Aroro Muisis gafanud tua sas Dius, kanya gina an-gurang wa kaylat ya nu kangayan te, Igiptu at fun at fufu.

²⁵ Muisis nafili tua te, amasine yap tua at nangidapan gasfuan Dius at nafili fag ngay taw, nu gamut ban nu nagbilug at yud sirut ngaduge fag fagmasineun siginans asalanan.

²⁶ Muisis namatangan te, gtungud yay ban nu e tungkul at nagwantan at maidap aroro sa tam Fun Isus, abat ngate, nangagbilug talun Igiptu at fagmaramramanun, aroro nu gdama sa tua baliwa at fagnamulun ban fag famonun.

²⁷ Ay siginan yangay at fagafanudun, kanya naubun wan talun Igiptu, ay wa kalimu kafag talun at fun dewa kadotama anya. Kanya maksvn tua at amatanganan aroro kata wa nu nalag at yud kalag fag Dius.

²⁸ Ay siginan yangay at fagafanudun, kanya nafae fagmafulun sabaliwa Tagbarita nu Glangfe, ay kanya nasugu sa sangay taw Israel te, rarusi taguk sat ngay mesa ligung sakbawan bale, laman ngay tagbarita wa gfabul ngay taw Israel at ngay sisian tiba kaka.

²⁹ Aroro ngay taw Israel gafanud tua sas Dius, kanya fagayu andife tua sis Dagat Maraska, ay kanya fagayu glao kata nu sit matat fag daga. Ay gina tagfafalo fag ngay taw Igiptu gdife, kanya fag ngay tagfawayan ankapnut.

³⁰ Ay siginan yangay ngay taw Israel at fagafanudun sas Dius, kanya fagayu naligungan furuan Eriku kaduge fituk menit, ay kafag furuan at alad anrufa.

³¹ Aroro Rakab fag mangena takamatugtug anke fagafanudun tua sas Dius, kanya di nfaurianan gasfuan ngay taw takamabo Dius, aroro kanya nafasakbo tua sat bale duak mangama, ngay taw Israel at suguan laman at nanfangalga.

³² Nataw ya at masine ku famamut? Kwe buknga ya gfoyung sa ayu sabaliwas Gidyun ay Barak ay Samsun ay Efta ay Dabid ay Samwel ay Dius at ngay taglong at ngay nafakamulun.

³³ Ay aroro kanya fagayu gafanud tua sas Dius, kanya fagayu nababo tua tibak talun at ngay fun, ay gfakamulun tua at masine, ay nagbilug tua Dius at ngay nafatuyanan. Ay kafag ngay taw nafafagvm tua ngay liun,

³⁴ ay nafarabung tua tagigang fag afuy, ay anlangfe tua sit fawayan at fiso. Ay Dius nafon tua fagmabitsugun sas fagayu at mamomuy, laman maseganama tua nu gfawayan at ngay fawayan, ay nu katanya at ngay fawayan tagsiginan tibak talun nababawan.

³⁵ Ay aroro tibak mangena gafanud tua sas Dius, kanya fagayu nalag yay Dius nu gfadog gfaleleg at ngay kinbul. Ay e nafaurianan tibak tagafanud ay wa kaylat ya kalfas, aroro natuyan te, magbilug tua ban at masine tsiuy baliwa fag leleg.

³⁶ Tibak taw nafalingunan, ay tibak taw nafalangan, ay tibak taw ankubung masiukan salambitan.

³⁷ Tibak taw nafanan gang yakmay anbul. Tibak taw e nafawabilug sas duak afud at bilug. Ay tibak taw e nafabul siginans fiso. Kafag ngay taw at lanbung tupa way lang ay kambing at balat. Kanya fagayu maksvn nu gayudan, ay nu gafalingunan ay nu gafaurianan.

³⁸ Ste sfagdaul daga at ngay taw wa masine ya magamut anya fagayu. Kanya fagayu glo way lang glulian sas talun at yud e taw ay sas talun buid, ay nanuksuan sa sangay luib ay sa tiba yak fagsuksuanan sis daga.

³⁹ Aroro kafag ngay taw gafanud tua, Dius gtoglag tua ban anya fagayu kabavn. Dewa katanya, Dius at fatuyanan ya nfasludan gina kafag ngay taw gleleg.

⁴⁰ Fakatanyaun Dius e masine fag algan sa antam, laman ban gina Dius nafafasludan at fatuyanan sa anya fagayu, e fagnamulun yangay tam gasfuan kafag ngay taw.