Ebreu 10 - Fanawbuid tagsibaliwas Fakayabian

¹ Muisis at Faugali sik malikbug yay fag aninu, sik fafaskudanan sat masine takadasug yay ban. Kafag Faugali bunwa kanya at matuyan, nu katanya wa mafafasine fagayu taw at nangakbang sas Dius siginan at ngay fanggalangun at fagnamonun galay banwa.

² Aroro kafag ngay tagseg nu nsine di, wa ro nangus gamatangan ya gugat sabaliwa at ngay asalanan, ay nafaragang wa nangus nu gfon fanggalangun.

³ Ay aroro mangaro kanya fagayu nu gfon gugat at ngay fanggalangun galay banwa, gfamatang way anya fagayu sat ngay asalanan.

⁴ Aroro baka tama at taguk ay kambing at taguk wa mafafalyam taw at ngay asalanan.

⁵ Aroro katanya, gina tam Fun Isus andasug ste swa daga, kanya nalong sas Dius te, “Wo kaylat ngay fanggalangun ay ngay famonun. Fakatanyaun nafalganan o ku bilug laman sik matuyan fag fanggalangun.

⁶ Wo kaylat ngay fagirugun fag famonun ay ngay famalyam asalanan fag fanggalangun.

⁷ Ay nalong au te, ‘Ku Dius, andasug au laman gfakamulun au am fakaylatun, kata sit Rirukan sis Dius at Longan sabaliwa angku.’ ”

⁸ Taguna kanya nalong te, “Wo kaylat ay wo guseganan ngay fanggalangun ay ngay famonun, ay fagirugun fag ngay fanggalangun ay famalyam asalanan fag ngay fanggalangun,” dewa kanya, gfaning Muisis at Faugali, kanya fagayu nafon kafag ngay fanggalangun.

⁹ Ay kanya nalong yangay sat Mama te, “Andasug au laman gfakamulun au am fakaylatun.” Dius naukas wan taguna fag fanggalangun ay nafaungbus tam Fun Isus.

¹⁰ Aroro tam Fun Isus nafaning tua Dius at fakaylatun, tam ngay asalanan nalyam wan, siginan tam Fun Isus nu gfon antam at sadili.

¹¹ Kayu menit fagayu tagfon fanggalangun malayun nu gfon fanggalangun. Katanya way gugat at ngay fon fag ngay fanggalangun ay wa ngap mafalyam taw at ngay asalanan.

¹² Ay tam Fun Isus sayginan way gfon fanggalangun laman famalyam tam ngay asalanan. Ay sanya ginan, kanya malunggung sas Dius at siun.

¹³ Kanya gfanya nu dyakmay Dius nafasa at daga darafa at ngay fawayan.

¹⁴ At masuad, siginan nu gfon fanggalangun fag sadi ginan, kanya nafae yud wan e malong kabavn ban at nafasine fag ngay taw.

¹⁵ At Masine fag Falad nafoyung yangay antam sabaliwa takatanya. Taguna nalong te,

¹⁶ “Katatuy ban ku nasadian fia sanya fag ngay taw, nu ntabu ban kafag ngay menit, tam Fun nalong te, gtanum kban ku ngay longan sa kafag ngay taw at ngay basad, ay griruk kban sat ngay amatanganan.”

¹⁷ Ay kanya nalong yangay te, “Kwa ban gamatangan ya kafag ngay taw at ngay fagmauriun ay at ngay asalanan.”

¹⁸ Ay aroro kanya nafalyam wan tam ngay asalanan, wa ban gdog ya namon fanggalangun laman famalyam asalanan.

Akbangi sas Dius

¹⁹ Nu katanya, ku ngay faduksay, katsi masakbo tua tam sat Mafasamanan Fia fag Suluk, siginan Isus at nabulanan.

²⁰ Ay gsakbo tam sanya sa sik bagu fag dalan tagsas leleg tam Fun Isus at naluang sa antam. Kanya kadasug tsi baliwa fantaba fag ramit daul, ay kanya we tiba nu bunway Isus at bilug.

²¹ Ay katsi, e tiba tungud tua tam fag tagfon fanggalangun tagfagtainan Dius at taw.

²² Nu katanya, masinei tua tam amatanganan nu kakbang tam sas Dius aroro tam ngay basad ansine wan, ay tam ngay bilug anfegus wan, kata nu nfegus tam sat malyo fag mamam.

²³ Faksvni tua tam fagsegun ay lag tam gawabilugan, aroro at nafatuyanan sa antam matuyan tua.

²⁴ Ay ugatani fuloi tam ngay iba sabaliwa nu mafangesug, ay nu gfakamulun tam sat masine.

²⁵ Ay lag kalyam nu nangaful tam, kata tibak taw at fakamulun, nu bunway fataglayuni nu gfadfamatangan tam, kaugat wan katsi nasaful watam te, munakbang wan tam Fun at menit nu kadasug.

²⁶ Aroro nu gtikis yay tam gfataglayun sas asalanan, ay nasaful oma tam at matuyan, we fagnamonun ya fanggalangun laman famalyam tam ngay asalanan.

²⁷ Takadasug ban faurianan way lang at maksvn nu malimu, ay at masugba fag afuy daul, at namamin ban Dius at ngay fawayan.

²⁸ Sik taw nu nafamabo way Muisis at Faugali, ay nu e nafatuyan way duak taw ay mannga tuluk taw, we afanyu ya gfabul anya.

²⁹ Kaugat wa ban nu gafaurianan sik taw nu nafauri way Dius at Baguama, ay at yud gfae tungkul at taguk at nafasine tam nasadian sas Dius, ay at nafalyam kafag taw at ngay asalanan, ay taglong at mauri sat Masine fag Falad tagfadasug Dius at fagmagalangun.

³⁰ Aroro nasaful watam at nalong te, “Au waban tagfasud, ay au waban at namafoli sas nusnga sinu at ke fagmauriun.” Ay kanya yangay at nalong te, “Tam Fun waban at nanginsaful ngay taw at asalanan.”

³¹ Maksvn ban nu malimu tagleleg fag Dius at faurianan sas fagayu taw tagfakamulun takatanya.

³² Amatangani ayu ebi at kinlangfe fag ngay menit, gina am nayamagan. Nagwantan am ay nadalan fag ngay famaskud.

³³ Tibaginan e gfalingun ayu ay e gfauri ayu sis salubangan fagngayuan taw. Ay tibaginan kataip am sa tagafaurianan fag ngay taw.

³⁴ Kafanyu tuam at ngay maubungan, ay guseganan tuam gagwantan dewa e nabul ay ngay ramraman, aroro nasaful tuam te, umke ramraman ban am at yud e fakatabuan, tagtungud tua ay ngay ramraman.

³⁵ Nu katanya, lag am kamomuy ay amatanganan aroro e famonun at mafalganan sa ayu.

³⁶ Agwantani tua, laman mafafaning tuam Dius at fakaylatun, ay laman ban magbilug tuam at fatuyanan.

³⁷ “Aroro wa glugo ya, kadasug wan tagakadasugun.”

³⁸ “Ku ngay taw at matuyan gleleg tua ban siginan at fagafanudun sa angku, ay dewa katanya, kanya ban nu natalyuyan way angku, kwa ban guseganan ya anya.”

³⁹ Ay itam di tam katap sa sangay taw at natalyuyan ay tagafaurianan ban, nu bunway katap tua tam sa sangay taw tagafanud sas Dius ay at kumlangfe.