Deuterunumyu 9 - Fanawbuid tagsibaliwas Fakayabian

Nu Gbabo siginans Dius at Gubuk

¹ Ngay taw Israel, dungugani. Katsi ro nandife am Liskung Urdan laman nangagbilug ngay talun at ngay taw tagtungud tua nu ngayu ay nu mabalyanan. Gbia at ngay furuan ay e ngay alad gang kata nu gdasug sas banwa.

² Ay tagbanwan sanya fag ngay talun mabitsug ay ngabat kata ngay taw Anak. Nasaful am sabaliwa at kasugfunanan ay nadungug am te, we mafawayan anya fagayu.

³ Dewa katanya, katsi lumag am ay Dius Yawi nu gfangguna ayu ay namamin fagayu ay ngay fawayan kata afuy nu gfamin. Kanya ban namabo anya fagayu laman masakit nu gaiyan am ay gfamin kata Yawi at fatuyanan sa ayu.

⁴ Ay Dius Yawi ban nu naiyan wan anya fagayu siginan ay daga salubangan, lag ban am glong sa ay ngay sadili te, “Yawi nataban antam stae fag talun laman nangagbilug tam aroro matuyan tam.” Duan, Yawi at fagnaiyanun kanya fag ngay talun at ngay taw aroro mauri.

⁵ Gagbilug ban am at ngay daga bunwa te, matuyan am, nu bunway, kanya fagayu mauri, ay umfasludan ay Dius Yawi at fatuyanan sa ay ngay mangaguyang Abrayam, Isak, ay Akub.

⁶ Nu katanya, amatangani te, ay Dius Yawi at fagnafonun ayu tuy fag daga at masine, bunwa te, matuyan am. At mafanud, kamaogatun wayam ay amatanganan.

⁷ Amatangani nu setain nu kauri am ay Dius Yawi gina am sis talun at yud e gbanwan. Siginan nu gduksun am fag menit siginans talun Igiptu dasug katsi, kamabo wayam gugat Yawi.

⁸ Ay dewa am sis Buksul Sinay, ankuri am Yawi, nu katanya, kanya kaylat wan gfabul ayu.

⁹ Gina au gundaud sas buksul laman namul ngay dalifi fagrirukan Yawi at nasadian at nawat sa ayu, sanya kway gugat kaduge ufatk safuluk menit ay ufatk safuluk yabi, ay kadugenya kwa gfangon ay kwa ginum.

¹⁰ Yawi nafon angku duak dalifi, ay kanya nariruk sanya at ngay suguan at nalong ayu siginans afuy sis Buksul Sinay gina am maful.

¹¹ Nu nlangfe ufatk safuluk menit ay ufatk safuluk yabi, Yawi nafon angku duak dalifi nu inda nasadian nu marirukan.

¹² Sanya ginan, Yawi nalong sa angku te, “Tagbungi wan aroro am fagfanggunaun fag ngay taw siginans talun Igiptu mauri wan. Kanya fagayu masakit nu gtalyuyan ku ngay suguan sa anya, ay nawat fagsegan laman at fagnansegan.”

¹³ Ay Yawi nalong yay fia sa angku te, “Nalag au nu se aksvn kanya fag ngay taw nu kamaogatun at ngay amatanganan.

¹⁴ Fabayani wan angku nu namamin au anya fagayu, laman ban kwa gamatang ya anya fagayu. Ay o ban ay am ngay kasugfunanan nama sik gaban kban abalyanan yap ay ayu yap tua anya fagayu.”

¹⁵ Nu katanya, natagbung au siginan tagigang fag buksul. Gbuba au duak dalifi nu inda nu marirukan nasadian fag ngay faugali.

¹⁶ Ay nalag au nu gasalanan am sa ay Dius Yawi, siginan nu kawat am ay fagsegan takata sik baka riangan. Masakit way nu gtalyuyan am ay Dius Yawi at ngay suguan sa ayu.

¹⁷ Nu katanya, naukas au si ay salubangan kanya fag duak dalifi ay anrufa.

¹⁸ Ay namalub au sis Yawi at daga salubangan kaduge ufatk safuluk menit ay ufatk safuluk yabi. Kadugenya kwe naon ay kwe nainum, aroro sa ay nafakamulun fag ngay asalanan. Ay nafakamulun am at mauri sis Yawi at daga salubangan, ay siginan takatanya nafadotama am anya.

¹⁹ Anlimu au, aroro Yawi maksvn nu kauri ayu, ay gamatangan au te, mafabul ro ayu. Dewa katanya, Yawi nadungug yay angku.

²⁰ Ginanya, maksvn yangay Yawi nu kadotama Arun ay kaylat yangay gfabul anya. Dewa katanya, ginanya nadarangin kyangay laman sa anya.

²¹ Ay sanya ginan, nabul au ay nawat fag fagsegan baka riangan, at nafae asalanan ayu, ay nairug au, ay narufa au kata lukbu ay nafalimus sasad liskung tagfamilugan siginans buksul.

²² Ay nafadotama yangay am Yawi sis Tabera, sis Masa ay sis Kibrut-Ataaba.

²³ Gina Yawi nafalao ayu siginans Kades-Barnea, kanya nalong ayu te, “Loi wan ay nangagbilug am ku nafon ayu fag daga.” Dewa katanya, nafamabo am ay wam nafaning Yawi at suguan, ay wam nafanud ay nafaning anya.

²⁴ Siginan nu gtoglag au ayu kamabo wayam.

²⁵ Kanya wan ku fagnamalubun sis Yawi at daga salubangan kaduge ufatk safuluk menit ay ufatk safuluk yabi aroro Yawi nalong te, namamin ayu.

²⁶ Nu katanya, gdarangin au sas Yawi te, “Fun Dius Yawi, lag o gfaurianan am ngay taw, aroro siginan am fagmabalyananun nafalangfe tuo ay nafalfas anya fagayu siginans talun Igiptu.

²⁷ Lag o gamatangan ngay taw at fakamaogatun, ay at fagmauriun, ay at asalanan, nu bunway amatangani yakman am ngay taglong Abrayam, Isak ay Akub.

²⁸ Nu nafabul ban o am ngay taw, ngay taw Igiptu ban lumong te, ‘Yawi nafabul anya fagayu aroro wa makatu gtabanan sat nafatuyanan fag daga.’ Ay lumong ban te, ‘Yawi nafabul anya fagayu aroro kauri. Kanya nafalfas anya fagayu siginans talun Igiptu ay nataban sas talun at yud e taw laman namabul.’

²⁹ “Dewa katanya, kanya fagayu am ngay taw. Kanya am fagagbilugun fag ngay taw am nafalfas siginans talun Igiptu siginan am fagmabalyananun.”