Deuterunumyu 7 - Fanawbuid tagsibaliwas Fakayabian

Dius at Nafili laman at ngay Taw

¹ Ay Dius Yawi nu nataban ban ayu sa ay fagnamanwanan, ay fagnangagbilugun fag daga, kanya ban nangaiyan si ay daga salubangan fituk gaban taw ayu yap tua ayu ay tagtungud tua ayu nu mabalyanan: ngay taw Ket, taw Girgas, taw Amur, taw Kanaan, taw Peres, taw Kib ay ngay taw Ebus.

² Ay Dius Yawi ban nu nafon sa ayu kanya fag ngay taw, ay nu nababo ban am, fabuli ban anya fagayu laman sik fanggalangun sas Dius. Lag ban am kawat sik nasadian ay lag am kafanyu ya anya fagayu.

³ Lag am nangadadwa sa anya fagayu, ay lag am kaylat ay ngay sisian nu nangadadwa sa anya fagayu.

⁴ Aroro kanya fagayu namayayu way ay ngay sisian siginans Dius, laman namauseganan tibak fagsegan. Ay nu nafakamulun way ban am takatanya, Yawi ban namadasug at dotama sa ayu, ay kamin ban am masakit.

⁵ Abat ngate, nanrasras yakman am at ngay fagirugan, ay nanrufa am at fagsegan fag ngay gang, ay namuan am at ngay turuk fagtoglagan Asera fag fagsegan, ay nangirug am at ngay fagsegan.

⁶ Aroro ay Dius Yawi nafasaman ayu. Sas fagayu taw, am wan Yawi at nafili laman at fakesugun fag ngay taw.

⁷ Yawi nafili ay nesug ayu, bunwa te, ayu yap am tibak talun at taw, aroro yam kayu anya fagayu.

⁸ Kanya nafili ayu aroro kesug tua ayu, ay nafafasludan at fatuyanan sa ay ngay mangaguyang. Kanya wan at masuad at fagnafaduksun ayu siginans talun Igiptu siginan at fagmabalyananun ay at fagnafayayuun ayu siginan nu gafagsuguanan am Igiptu at fun.

⁹ Amatangani te, ay Dius Yawi sadi way. Kanya matuyan ay gfafasludan at ngay nasadian sa sangay kasugfunanan takesug anya ay tagfaning at ngay suguan.

¹⁰ Dewa katanya, kanya ban gfaurianan ay gfaidapan fagayu takauri anya.

At Famonun siginan at Fagmatuyanun

¹¹ Nu katanya, masine nu gfaning am ngay suguan ay ngay faugali ku nafon ayu katsi fag menit.

¹² Nung tua ban am gfafasludan ay gfaning masine ngay suguan, ay Dius Yawi gfafasludan ban at nasadian te, kesug ban ayu kata at nafatuyanan sa ay ngay mangaguyang.

¹³ Kanya ban kesug ay namaramraman ay namayu ayu. Ay namon ban sa ayu ngayuk sisian ay namayu ay ngay fananumun si ay daga, ay ngay trigu, fanlangu ay ay ngay langis. Ay namayu ban ay ngay fagbaugun gina ban am gbanwan sit nafatuyanan sa ay ngay mangaguyang ay sa ayu fag daga.

¹⁴ Kanya mafagubuk ayu gtungud yay nusnga sinu tagbanwan sis fagdaul daga. Ngay mangena si ayu we yud gsisian, katanya yangay anggan ay ngay fagbaugun.

¹⁵ Yawi namayayu ayu sas fagayu fakasaitun. Wa gfadasug sa ayu at malimu fag fakasaitun kata ay nalag sis talun Igiptu. Dewa katanya, namadasug ban takatanya sa ay ngay fawayan.

¹⁶ Masine nu gfabul am fagayu taw Yawi at nafon ayu. Lag am kafanyu ya anya fagayu, ay lag am namauseganan sat ngay fagsegan, aroro kanya fagayu sik famaylatan way sa ayu.

¹⁷ Malong am say ngay sadili te, “Kafag ngay talun at ngay taw amabalyanan yap tua antam, setain ban nu nangaiyan tam anya?”

¹⁸ Dewa katanya, lag am kalimu kanya fag ngay taw. Nu bunway amatangi tua Yawi at nafakamulun sas Igiptu at fun ay sas fagayu taw Igiptu.

¹⁹ Nalag am ngay famaskud ay ngay madulo nusnga setaw, ay Dius Yawi at nafasure siginan at fagmabalyananun, gina gfaduksun ayu. Katanya yangay ban, ay Dius Yawi at fakamulun sa ay fakalimuun fag ngay taw.

²⁰ Ay Yawi namadasug ngay mangan sa sangay taw Igiptu ay anggan sat nasuksuan yakmay kanya fagayu anbul.

²¹ Lag am kalimu anya aroro ay Dius Yawi galo tua ayu, at mabalyanan ay at madulo fag Dius.

²² Ay Yawi gfaurianan ban si ay daga salubangan fagayu talun at ngay taw. Lag am vtv gaiyan anya fagayu, aroro nung way ban am nafakamulun takatanya, kayu ban tagsis talun fag ngay mangilafang.

²³ Dewa katanya, ay Dius Yawi namon ayu kanya fagayu. Ay kanya ban fagayu galakayan ay kamin.

²⁴ Ay namon yangay ban sa ayu at ngay fun. Fabuli anya fagayu laman ban we kamatang ya nusdi sadi. We mababo ayu. Namabul am anya fagayu laman ban kanya fagayu wa kamatang ya.

²⁵ Nangirug am at ngay fagsegan, ay lag am galabian at gintu ay at sanbung salapi. Lag am gbul takatanya aroro sik famaylatan way sa ayu. Ay saruyani takatanya fagayu aroro maksvn nu mauri sa ay Dius Yawi.

²⁶ Lag am gbuba sa ay bale nusnga setaw at maksvn nu mauri, laman diam umkamin gasfuan kafag ngay fagagbilugun. Tuyani te, takatanya fag fagagbilugun masuya, ay masine nu kamin wan.